இந்‘தீ’ பரவும் சர்ச்சை... பற்றும் தமிழகம்! | Anti Hindi agitations - Ananda Vikatan | ஆனந்த விகடன்

வெளியிடப்பட்ட நேரம்: 06:00 (06/06/2019)

இந்‘தீ’ பரவும் சர்ச்சை... பற்றும் தமிழகம்!

மீண்டும் வெடித்திருக்கிறது ‘இந்தித்திணிப்பு’ சர்ச்சை. இந்தி எதிர்ப்புப் போராட்டத்தின் மூலம் ஆட்சியை இழந்த காங்கிரஸ் கட்சியும் ‘இந்தித் திணிப்பு’க்கு எதிராகக் குரல் எழுப்பியதுதான் விநோதம்.

புதிய தேசியக் கல்விக்கொள்கையை வரையறுப்பது குறித்து ஆராய்வதற்கு கஸ்தூரி ரங்கன் தலைமையில் அமைக்கப்பட்ட நிபுணர் குழு, தனது வரைவு அறிக்கையை மத்திய மனிதவள மேம்பாட்டு அமைச்சர் ரமேஷ் பொக்ரியாலிடம் அளித்துள்ளது. அதில், ‘மும்மொழிக் கொள்கை பின்பற்றப்பட வேண்டும்’ என்கிற பரிந்துரையும் இடம்பெற்றுள்ளது.

இருமொழிக்கொள்கை பின்பற்றப்படும் தமிழகத்தில், மும்மொழிக்கொள்கையை மத்திய அரசு கொண்டுவருவதாகவும், இந்தியைத் திணிக்கிறது என்றும் எதிர்க்கட்சிகள் கொந்தளிக்கின்றன. ‘‘தமிழர்களின் உணர்வுகளோடு விளையாட வேண்டாம். தேன்கூட்டில் கல்லெறிய வேண்டாம்” என்று எச்சரித்துள்ளார், தி.மு.க தலைவர் ஸ்டாலின். இன்னொருபுறம், ‘இவர்களுக்கு எப்போதும் இதே வேலைதான். தமிழகத்தில் தனியார் பள்ளிகளிலேயே இந்தி கற்றுக்கொடுக்கப்படுகிறது. ஏன், தி.மு.க-வினர் நடத்தும் பல பள்ளிகளிலேயே இதுதான் நிலைமை. மொழிகளைக் கற்றுக்கொள்வதன் மூலம் வாய்ப்புகள் விரிவடையும். திராவிடக் கட்சிகளின் இந்தி எதிர்ப்பு என்பது இரட்டை வேடம்’ என்கிறார்கள் பா.ஜ.க-வினர்.

“ ‘மும்மொழிக் கொள்கை’ என்கிற ஒன்று இந்திய அரசமைப்புச் சட்டத்தில் கிடையாது. அவரவர் தாய்மொழியில் கல்வி கற்க வேண்டும். இரண்டாவதாக இன்னொரு மொழியைக் கட்டாயம் கற்றுக்கொள்ள வேண்டும். இரண்டாவது மொழியாக ஏற்கெனவே ஆங்கிலம் இருக்கிறது. ஆங்கிலத்துக்குப் பதிலாக இந்தியையோ, வேறு மொழியோ கற்றுக்கொள்ள யாராவது விரும்பினால், நமக்கு ஆட்சேபனை இல்லை. ஆனால் தமிழ், ஆங்கிலம் ஆகியவற்றுடன் இந்தியையும் கட்டாயமாக்குவதை ஏற்றுக்கொள்ள முடியாது” என்கிறார், தமிழ்த் தேசிய விடுதலை இயக்கத்தின் பொதுச்செயலாளர் தியாகு.

நீங்க எப்படி பீல் பண்றீங்க