Published:Updated:

ஜெ.ஜெயலலிதா என்னும் நான்... - அம்மாவின் கதை - 16

ஜெ.ஜெயலலிதா என்னும் நான்... - அம்மாவின் கதை - 16
பிரீமியம் ஸ்டோரி
News
ஜெ.ஜெயலலிதா என்னும் நான்... - அம்மாவின் கதை - 16

இளமைக்கால காதல்எஸ்.கிருபாகரன் - படம் உதவி: ஜெயபாபு

ம்மு சர்ச் பார்க்கில் படித்துவந்தபோது, பள்ளியின் சீனியர் மாணவி ஒருவர் அம்முவின் திடீர் தோழியானார். அம்மு வசித்த அதே தி.நகர், சிவஞானம் தெருவில்தான் அவரின் வீடும் இருந்தது. பள்ளி முடிந்ததும் தினந்தோறும் அம்முவின் வீட்டுக்கு வரும் சீனியர் மாணவி, அம்முவை வலுக்கட்டாயமாக மாடிக்கு அழைத்துச்சென்று எதையாவது பேசிக் கொண்டிருப்பார். அது செயற்கையாக இருக்கும். அம்முவுக்கு அது புரியவுமில்லை. பல நாள்கள் இதுதொடர்ந்தன.    

ஜெ.ஜெயலலிதா என்னும் நான்... - அம்மாவின் கதை - 16

ஒருநாள் சந்தியா, ‘‘அம்மு, அந்தப் பெண்ணோடு ஏன் இத்தனை நெருக்கமா பழகுறே? சரியாப்படலை, பார்த்துக்க...” எனக் கண்டித்தார். வழக்கமாகத் தன் தோழிகளுடன் அன்பாகப் பேசிப்பழகும் அம்மா, சீனியர் மாணவியின் மீது சீற்றம் காட்டியது அம்முவுக்குக் குழப்பமாக இருந்தது.

மறுநாள்,  அந்த மாணவியின் செய்கைகளை உற்றுக்கவனித்தார் அம்மு. அப்போதுதான் பல விஷயங்கள் தெரியவந்தன. அந்த சீனியர் மாணவி தன் வீட்டருகே வசிக்கும் ஒரு பையனைக் காதலித்துவருகிறாள். கண்டிப்பான தன் பெற்றோரை ஏமாற்றி, அவனுடனான தனது காதலைத் தொடரவே, அவள் திட்டமிட்டு அம்முவை நட்பாக்கிக் கொண்டிருக்கிறாள். விஷயம் தெரியவந்ததும் அம்மு அவளிடம் கோபத்தை வெளிப்படுத்த, மன்னிப்பு கேட்ட சீனியர் மாணவி, தன் காதலுக்கு உதவிபுரியும்படி அம்முவிடம் கெஞ்சினாள். அதாவது, அவள் மாடிக்கு வராத  நேரங்களில், அவளது காதலனுக்கு அம்மு சமிக்ஞை தகவல் தெரிவிக்க வேண்டும் எனக் கெஞ்சினாள். ஒன்றும்புரியாத வயதல்லவா… தலையாட்டிவிட்டார். ஒருநாள் சீனியர் மாணவி வராதபோது அம்மு சமிக்ஞை கொடுத்துக்கொண்டிருந்ததை, அந்தத் தெருவில் பால் விநியோகம் செய்துவரும் பெண்மணி ஒருவர் பார்த்துவிட்டார்.

பருவ வயதில் ஓர் ஆணும் பெண்ணும் மொட்டை மாடியில் நின்று சைகையில் பேசிக் கொண்டிருப்பதைப் புரிந்துகொண்டார். இன்னொரு நாள், சீனியர் மாணவியும் அந்தப் பையனுடன் சைகை மொழியில் பேசிக்கொண்டிருந்ததை அவர் பார்த்துவிட... வம்பாகிவிட்டது விவகாரம். விறுவிறுவென சீனியர் மாணவியின் வீட்டுக்குச் சென்று, “அந்த நடிகைவீட்டுப் பெண்ணோட உங்க பெண்ணைப் பழகவிடாதீங்க… அந்தப் பையனோடு அவளுக்குக் காதல். இப்போ ஒண்ணும் தெரியாத உங்க பொண்ணையும் அழைச்சிட்டுப்போய் அவளுக்கு நட்பு ஏற்படுத்திக் கெடுக்கப் பார்க்கிறா… நடிகை குடும்பம் அப்படி இப்படித்தான் இருப்பாங்க. அவ வீட்டுக்கு இனி உங்க பெண்ணை அனுப்பாதீங்க’’ எனச் சொல்லிவிட்டுச் சென்றார்.

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
ஜெ.ஜெயலலிதா என்னும் நான்... - அம்மாவின் கதை - 16


 
அன்றுமுதல் அம்முவைச் சந்திக்க சீனியர் மாணவிக்குத் தடை போடப்பட்டது. தோழி சில நாள்களாக வராததால், நேரில் விசாரிக்க அவளது வீட்டுக்குச் சென்றார் அம்மு. “இனி எங்க வீட்டுக்கு வராதே. எங்க வீட்ல உன்னோட பேசவோ, பழகவோ கூடாதுன்னு சொல்லிட்டாங்க. பால்கார அம்மா எல்லாத் தகவலையும் சொல்லிவிட்டார்” எனக் கதவுக்குப் பின்னாலிருந்து சீனியர் மாணவியின் குரல் மட்டுமே வந்தது. வெறும் அதிர்ச்சி அல்ல; பெரும் அதிர்ச்சி. அவளது காதலுக்கு அம்முவைப் பயன்படுத்திவிட்டு, ஆபத்து என வந்தபின் அவளைக் காத்துக்கொள்வதற்காக, `எனக்கு ஒன்றும் தெரியாது' என்றும் `அம்முவுக்கும் அந்தப் பையனுக்கும்தான் பழக்கம்' என்றும் தன் வீட்டாரிடம் சொல்லித் தப்பித்துக்கொண்டிருக்கிறாள் என்பது அம்முவுக்குப் பிறகுதான் தெரியவந்தது. தனது அறியாமையைப் பயன்படுத்திக்கொண்டதோடு ஆபத்து வந்ததும் தன்மீது பழிபோட்டு தப்பித்துக்கொண்ட சீனியர் மாணவியின் துரோகச் செயலை எண்ணி அன்றிரவு முழுவதும் தூங்கவே இல்லை அம்மு. மொட்டை மாடிக்குச் சென்று இரண்டு மணி நேரம் அழுது தீர்த்தார்.

பால்கார அம்மாவின் தவறான புரிதல் பேச்சு காரணமாக அந்தத் தெருவில் பலருக்கும் அம்மு தவறான பெண்ணாகவே சித்திரிக்கப்பட்டார். ‘நிபந்தனையற்ற அன்பு என்ற ஒன்று எப்போதும் இருந்ததில்லை’ என்பதையும், `மனிதர்களை எடைபோடத் தெரியாமல் அவர்களுடன் நட்புகொள்வது எப்படிப்பட்ட ஆபத்தில் கொண்டுபோய் நிறுத்தும்' என்பதையும் அம்மு புரிந்துகொள்ளக் காரணமானது இந்தச் சம்பவம். அதற்கு அம்மு கொடுத்த விலைதான் அதிகம்.

மனிதர்களைப் புரிந்துகொள்ளாமல் போனதால், தனக்குத் தீராத அவப்பெயரை ஏற்படுத்திச்சென்ற அந்தத் தோழியின் நினைவு வரும்போதெல்லாம் அம்முவின் மனம் சகமனிதர்களிடமிருந்து சற்று விலகியே நிற்கும். அவர்களை நம்ப மறுக்கும். அதனால், அவர்களின் தகுதியை உரசிப்பார்க்க வைத்த பரீட்சைகளால், பல நல்ல நட்புகளை இழந்திருக்கிறார் அம்மு.

சீனியர் மாணவியின் காதலுக்கு உதவப்போய் அவமானப்பட்ட அம்முவின் மனதில் முதல் காதல் பூத்தபோது அவருக்கு 13 வயது.

அம்முவின் மனதில் இடம்பிடித்த அவர் ஒரு பிரபல நடிகர். அம்முவைவிட 27 வயது மூத்தவர். ஆனால், திரையில் அவர் துள்ளிக்குதித்து வந்து வசனம் பேசினால், சொக்கிப்போவார்கள் அன்றைய இளம்பெண்கள். அம்மு அவரது படங்களைத் திரும்பத் திரும்பப் பார்த்து  ப்ரியத்தை வளர்த்துக்கொண்டிருந்தார். எங்கும் எப்போதும் அவரையும் அவரது படங்களைப் பற்றியும் சிலாகித்துப் பேசுவது, செய்தித்தாள்களில் அந்த நடிகரின் படங்கள் தென்பட்டால், உடனே அதைக் கத்தரித்துத் தனியே ஆல்பத்தில் சேர்த்துவிடுவது என அம்முவின் ப்ரியம் முற்றிப்போனது அந்நாளில்.      

ஜெ.ஜெயலலிதா என்னும் நான்... - அம்மாவின் கதை - 16

`சினிமாக்கார வீட்டுப்பெண் இல்லையா… அதான் சினிமா நடிகர் மேல் லவ் வருது' எனத் தோழிகள் கிண்டலடித்தனர். ஒருநாள் அந்த நடிகரின் படங்களை ஒட்டி வைத்திருந்த ஆல்பத்தைப் பள்ளிக்குக் கொண்டு சென்றிருந்தார்.

அதைப் பார்த்துவிட்ட ஆசிரியை, ``என்ன அம்மு இது?’’ என ஆல்பத்தைப் பற்றிக் கேட்க, “எனது விலைமதிக்க முடியாத பொக்கிஷம்” என அம்மு சொல்ல, கோபத்தின் உச்சிக்கே போனார் ஆசிரியை. “என்ன திமிர்... ஒரு நடிகரின் படங்கள் ஒட்டப்பட்ட ஆல்பத்தைப் பொக்கிஷம் என்று சொல்கிறாயே...’’ எனப் பிரம்பால் பின்னி எடுத்துவிட்டார் அம்முவை. முதல் காதல் முடிவுக்கு வந்தது இப்படித்தான். 

அதுசரி... அம்முவின் மனதில் இடம்பிடித்த அந்த நடிகர் யார் தெரியுமா? 60-களில் தன் நளினமான நடிப்பாற்றலாலும் கட்டுடலாலும் கல்லூரிப் பெண்களின் கனவு நாயகனாகக் கொண்டாடப்பட்ட கம்பீர நடிகர் ராக் ஹட்சன்... 1985-ல் உடல் இளைத்து, தசை சுருங்கி அழகுகுலைந்து, ‘உலகிலேயே, எய்ட்ஸ் பாதித்த முதல் சினிமா கதாநாயகன்’ என்ற அவப்பெயருடன் இறந்துபோன அமெரிக்க நடிகர்.

காதல் உணர்வைக் கடந்து வராதவர்கள் இந்த உலகில் யாரும் இருக்க முடியாது. உண்மையில், பள்ளிப்பருவத்தில் சினிமா நடிகர்மீது ஈர்ப்பு ஏற்படுவது இளம்பெண்களின் உளவியல் வெளிப்பாடுதான். அப்படி அம்மு தன் பருவ வயதில், ராக் ஹட்சன் மட்டுமல்லாமல், அன்றைய பிரபல கிரிக்கெட் வீரர்களான நாரி கன்டிராக்டர்,  மன்ஸூர் அலிகான் நவாப் பட்டோடி ஆகியோருக்கும் வெறித் தனமான ரசிகையாக இருந்திருக்கிறார்.

சென்னையில் கிரிக்கெட் நடைபெறும் போது, எத்தனை அலுவல்கள் இருந்தாலும் மைதானத்துக்கு ஓடி வந்துவிடுவார் அம்மு. அவ்வளவு பைத்தியம் அவர்கள்மீது. ஸ்டேடியத்தில் நடக்கும் ஆட்டத்தைப் பார்ப்பதைவிட்டு அவர்களின் செயல்களை பைனாகுலர் வழியாகப் பார்த்து ரசிப்பார் அம்மு.
 
இப்படி சினிமா நடிகர்கள், கிரிக்கெட் வீரர்கள்மீது ஒருவித ப்ரியம் கொண்டிருந்த அம்முவின் வாழ்விலும் பின்னாளில் ஒரு நிஜமான காதல் வந்துபோனது. 

(அம்முவின் கதை அறிவோம்)