சொல்வனம்!

உணர்ந்தறிதல்

. வெ ருண்டு உருண்டு கண்கள் மருண்டு

. காற்றும் நீருமாய் நாசி நடுநடுங்க...

. காது விரைக்கக் கழுத்து அதிர்ந்து...

. கால்கள் துவண்டு கன்னங்கள் கிட்டித்து...

. உடம்பு கிடுகிடுக்க உள்ளுக்குள் வெடிவெடிக்க...

. பெருமுச்சுக் குவியலில் உயிர்மூச்சுக் கலகலத்து...

. இதுவரை கேட்டறியா விதங்களில் கதறலிட்டு...

. முன்னுடம்பு குறுக்கி பின்னுடம்பு பிதுக்கி...

. பூமிப் பந்தை ஒரு நிமிடம் புதிதாகப் பிறக்கவிட்டு...

. கன்று ஈன்று நாக்கிட்ட காராம் பசு பார்த்து,

. உடலெல்லாம் சிலிர்ப்போடி உள்ளம் வியர்த்து நின்றேன்

. வீட்டில்

. கர்ப்பிணியாய்

. மனைவி!

. - ராஜ திருமகன்

. காணாமல் போன நிலா!

. நி லவை இடியாப்பமென யாரோ சொல்லிவைத்திருந்தார்கள்

. தெருவில் இடியாப்பம் விற்கும் ஆச்சியின் குரல் கேட்ட திசையில் தட்டை நீட்டிவிடுகிறாள் யாத்வி குட்டி ரூபாய்க்கு இரண்டு நிலவைத் தரச் சொல்லி

. அப்பா படித்துவிட்டுப் போன புத்தகத்தைப் புரட்டி 'கல்பனா சாவ்லா’வைக் காண்பிக்கிறாள்

. 'பறந்து போன இந்த அக்காதான் பசிக்கும்போது தெனமும் இடியாப்பத்தைப் பிச்சுப் பிச்சுத் தின்றாளா?'வென தாத்தாவிடம் கேட்டுவைக்கிறாள்

. தேடிய பதிலேதும் கிடைக்காமல் சின்னதாய்ப் பொய் சொல்லி படுக்கைக்கு அழைக்கிறோம் 'யாத்வி... சீக்கிரம் படுடா பறக்கும் தட்டு வந்துடும்'' 'அப்ப அதுல இடியாப்பம் இறங்கி வருமா?'வென்கிறாள்

. மேகம் மூடி மறைத்துவிட்ட நிலவைக் காணாது இடியாப்பத்தை எவரோ திருடிவிட்டதாய்ச் சொல்லி தேம்பித் தேம்பி அழுகையைத் துவக்குகிறாள்

. பெரும் இடி இரைச்சலோடு அழத் தொடங்கியது பெருமழை

. தொலைந்துபோன நிலவை காலையில் தேடித் தருவதாய்ச் சொன்ன அம்மாவின் பதில் கேட்டு விரல் சூப்பிக்கொள்கிறாள்.

. - கொ.மா.கோ.இளங்கோ

. சாமியாடி கருப்பையா

. த னக்காய் நேர்ந்துவிட்ட ஆடுகளை அறுக்க கருப்பையாவிடம் இறங்கியுள்ளார் கருப்பசாமி. அதற்கீடாய் ஆடறுக்கும் இடைவெளிகளில் கருப்பையாவை ஒரு பீடி வலிக்க அனுமதிக்கிறார் கருப்பசாமி.

. - கு.விநாயகமூர்த்தி

. கால அதிர்வு

. ப ள்ளிக்குச் செல்லும் அக்காவைப் பார்த்துவிட்டு, 'இன்னிக்கே என்னை ஸ்கூலுக்குக் கூட்டிட்டுப் போ’ என அடம்பிடித்தது குழந்தை 'நாளைக்குப் போகலாம்’ சமாதானம் சொன்னாள் அம்மா. 'அப்படீன்னா... என்னை இன்னிக்கே நாளைக்குக் கூட்டிட்டுப் போ!’ என்றது குழந்தை திடுக்கிட்டது காலம்.

. - ப.உமாமகேஸ்வரி

சொல்வனம்!

Vikatan Correspondent