சொல்வனம்

சாந்திகளாய் மாறிய முனியம்மாக்கள்!

. டெல்லியில்

. சற்று வசதியானவர் வீடுகளுக்கு

. வேலைக்குச் செல்கிறார்கள்

. சாந்திகளாகவும் ராணிகளாகவும்

. பெயர் மாற்றம்கொண்ட முனியம்மாக்கள்.

. அலுவலகம் செல்வோரின் குழந்தைகளுக்கு

. பகுதிநேரத் தாயாகி உணவூட்டுகையில்

. நினைவுக்கு வருகிறார்கள்

. கிளம்பும்போது உறங்கிக்கொண்டிருந்த

. மூன்றும் நான்கும் படிக்கும்

. தனது குழந்தைகள்.

. பாத்திரங்கள் துலக்கியும்

. துணிகள் துவைத்தும்

. வீட்டைப் பெருக்கி சுத்தம் செய்தபோதும்

. அவ்விடம் எதிர்கொள்ள நேரிடுகிறது

. மனதில் அழுக்கேறிய பாத்திரங்களை.

. கால் வைக்குமளவு

. தாராள இடம்கொண்ட வீடுகளில்

. வசிக்கும் இவர்கள்

. டெல்லியறியா உறவுகளின் கற்பனையில்

. உயர்ந்து நிற்கிறார்கள்

. செல்வச்சீமாட்டிகளாக.

. தங்கள் விசுவாசத்தின் மீது

. அவ்வப்போது விழும் கற்களை

. சகிப்புடன் அகற்றியவாறு

. வாழ்க்கையை நகர்த்தும் இவர்கள்

. எப்பாடுபட்டேனும்

. வருடம் ஒருமுறை உறவுகளுடன் குலவி

. சுதந்திரமாய்ச் சுவாசித்து ஆசுவாசம்கொள்ள

. சொந்த ஊருக்கு ரயிலில் பயணமாகிறார்கள்

. தற்காலிகமாய்

. தங்கள் இடத்தில்

. வேறொரு சாந்தியையும் ராணியையும்

. நியமித்துவிட்டு!

. - ஜோதி பெருமாள்

. சிறகுகள்

. ஏழு கடல்

. ஏழு மைல் தாண்டி

. மந்திரவாதியின்

. உயிரைத் தேடிப் போனவன்

. எப்படிப் போனான்

. என்று கேட்கவே இல்லை

. எந்தக் குழந்தையும்

. அவர்கள் வசம் சிறகுகள் இருந்தன!

. ஒரு

. ஒரே ஒரு ஊரில் இருக்கும்

. ஒரே ஒரு ராஜாவுக்கு

. இன்னும் வயசாகவுமில்லை;

. சாகவுமில்லை!

. வாசம்

. அயர்ந்து உறங்கிக்கொண்டிருக்கும்

. குழந்தையின் அருகில்

. அமர்ந்துகொண்டு

. எழுதப்பட்டுக்கொண்டிருக்கும்

. இக்கவிதையில் கமழும்

. பால் வாசனையை

. ரசிக்கிறீர்கள்...

. சற்று நேரத்தில்

. கிளம்பும் மூத்திர வாடையையும்

. சகித்துக்கொள்வீர்கள்தானே!

. - இரா.பூபாலன்

. மின் குரலின் கட்டளை

. 'ப்ளீஸ் க்ளோஸ் தி டோர்’

. என அதே பெண் குரல்தான்

. தவறாது

. மின் கட்டளை தருகிறது

. அடுக்குமாடியின்

. மின் ஏற்றத்தில்

. நாம் தனியாகப்

. பயணிக்க நேரிடும்

. ஒவ்வொரு முறையும்.

. நீதான்

. தவறாக அர்த்தம்செய்து

. உடல் மூடிக்கொள்கிறாய்

. உன் மாராப்பு சேலையை!

. - பிராஸ்பர்

. பொய்ச் சோழிகள்

. பாதையோரச் சோதிடன்

. சோழிகள் குலுக்கி

. எத்தனை முறை போட்டாலும்

. விழவில்லை தாயம்

. ஆதலால்

. தன் காலைப் பசியின் தொடர்

. மதியத்துக்குமென

. தனக்கான சோதிடத்தால்

. தளர்ந்தவன் நிமிர்ந்தான்

. வாராத தலையோடு

. வந்தமர்ந்தாள் ஒரு கிழவி

. சோழிப் பொய் சொல்லியும்

. சோறு கிடைக்கப்போவதால்

. மகிழ்ந்தவன்

. கைகளை இணைத்துப்

. பொய்களை வேகமாய்க் குலுக்கத் தொடங்கினான்!

. - செல்மா காமராசன்

சொல்வனம்

விகடன் விமர்சனக்குழு