Published:Updated:

சொல்வனம்

சொல்வனம்

விரல் பொருள் 

கட்டைவிரலை உயர்த்திக் காட்டி சவாலையும்

கீழ்நோக்கி கவிழ்த்துக் காட்டி தோல்வியையும்

காட்டுகிறான் ஒருவன்.

ஒற்றைவிரலொன்றையும் இரட்டை விரலையும் காட்டி

உபாதைகளைத் தெரிவிக்கிறான் சிறுவன் ஒருவன்.

ஆட்காட்டி விரலை எச்சரிக்கவும்

இருவிரல் காட்டி வெற்றியையும் காட்டுகிறான் ஒருவன்.

கட்டை விரலை காதுக்கும்

சுண்டு விரலை வாயருகிலும் வைத்து

தொலைபேசியில் பேசுவதை நினைவூட்டுகிறான் ஒருவன்.

நடுவிரலைக் காட்டி எதிரியைக் கோபமூட்டுகிறான் ஒருவன்.

ஐந்து விரல்களை இட வலமாக ஆட்டி

பிரிவையும் அன்பையும் தெரிவிக்கிறான் ஒருவன்.

வாயில் உள்ளங்கையை அழுத்தி

எல்லா விரல்களையும் எதிர்த்திசை நீட்டி

காற்றில் முத்தங்களைப் பறக்கவிடுகிறான் ஒருவன்.

விரல்களனைத்தையும் இறுக்கமாக மூடி

கையுயர்த்தி ஒற்றுமையை உணர்த்தச்சொல்கிறான் ஒருவன்.

அவற்றை உள்ளுக்குள் பேசி மகிழ்கிறான்...

பக்கத்தில் இருந்து பார்க்கும்

கரங்கள் இழந்த ஒருவன்.

 - ந.கன்னியக்குமார்

சொல்வனம்

என்ன பேசிக்கொண்டிருக்கும்?

அப்பா திண்ணையில்தான்

பல் துலக்க வருவது முதல் படுத்திருப்பார்

சீரகத் தண்ணியோ, கருப்பட்டிக் காபியோ

வேண்டுமென்றால்

கைத்தடியால்தான் சமிக்ஞை செய்வார்

ஓரடி ஈரடியென்று

ஒவ்வொன்றிற்கும் அர்த்தமிருக்கும்

அம்மாவும் பதிலுக்கு

வளையொலியால் பேசுவாள்.

வெகுநாளாக மூலையில்

சிலந்திவலை சுமந்திருக்கும்

அப்பாவின் கைத்தடியும்

கழற்றிப் போட்டு காலமாகியிருந்தாலும்

இன்னும் உருண்டையாயிருக்கும்

அம்மாவின் நெகிழி வளையலும்

என்ன பேசிக்கொண்டிருக்கும்?

 - கனவுதிறவோன்

சொல்வனம்

தொலையாத பயணம்

நெடுஞ்சாலை பேருந்துப் பயணம் சுகமானது

பெயர்ப் பலகைகளே இல்லாத ஊர்களுக்குள்  

உணவு தேநீர் இளநீர் அருந்தி

வெள்ளரிப் பிஞ்சு கடலைமிட்டாய் தின்று

சற்றே இளைப்பாறித் தென்படும் மனிதரிடம்

ஊர் பெயர் கேட்டு ஆடு மாடுகளையும்

சந்தைகளையும் முண்டாசு மீசைகளையும்

கண்டாங்கிச் சேலைகளையும்

கோடாலிக் கொண்டைகளையும்

பிளந்துகொண்டு வாகனங்கள்

திணறிச் செல்லும் அழகே அழகு.

இப்போது சாலைகளெங்கும் பளபளவென

அம்புக்குறியிட்ட பெயர்ப் பலகைகள்

மட்டுமே தென்படுகின்றன.

ஊர்களும் மரங்களும் மட்டுமல்ல

கேட்டுத் தெரிந்துகொள்ள மனிதருமின்றி

வெறிச்சோடிக்கிடக்கிறது பூமி.

சொல்வனம்

வாகனங்கள் உருளும் நெடுஞ்சாலைகள்

செத்த பாம்பாகக் கிடக்கின்றன ஜீவனற்று...

இரவு நேர தேநீர் கடைகளில் நம்மோடு

தொற்றிக்கொண்ட இளையராஜா மட்டும்

40 வருடங்களாக விடாது

கூடவே வந்துகொண்டிருக்கிறார் தாலாட்டியபடியே.

விபத்துக்குள்ளானாலும்கூட சுகமானது

நெடுந்தூர அரைத்தூக்க

விரைவுப் பேருந்துப் பயணம்.

- ஜெயாபாரதிப்ரியா