சொல்வனம்

நெல் வயலின் மகசூலை அதிகரிப்பவள்

. கம்மாயில் நீர் இறைப்பவர்கள்

. பிடித்து கரையில் போட்டிருந்த

. வெண் கெண்டைமீன்களைக்

. கொத்திப் பறந்த நாரை

. நீ களை பறித்த வயலின்

. வரப்பில் அமர்ந்தபோது

. தலையுயர்த்திப் பார்த்தாய்.

. மடை மாற்றி நீர் பாய்ச்ச

. அதே வரப்பில் காத்திருந்த நான்

. வாய்க்காலில் ஓடும் சிறு மீன்களென

. உன் கண்களைச் சந்தித்தேன்.

. பச்சைப் பயிர்களுக்கிடையே

. ஊடாடும் உன் கைகளில்

. மரகதப்பச்சை வளையல்களின் சிணுங்கல்கள்.

. சலசலவென நீர் பாயும் பாத்திகளில்

. கெண்டைக்கால் வரை சகதியில் மூழ்க

. களையெடுப்பில் முந்திப் போகிறாய்.

. உன் உரசல் கசியவிடும் சுகத்தில்

. பொன்னியின் மகசூல் கூடும் என்பதை

. கண்ணெட்டும் தூரம் வரை

. பசேலென இருக்கும் வயலுக்கு

. யாரும் சொல்லியிருக்க வாய்ப்பில்லை.

. அறுவடைக் காலத்தில்

. நீ களை பறித்த வயலைப் பார்ப்பவர்கள்

. குமைந்துபோய் நிற்பதை

. வயலின் உரிமையாளன்

. என்னவென்று புரிந்துகொள்வானோ!

. - மௌனன்

. யானை நிறத்தவள்

. ஒரு பயணத்தின்போது உடனிருந்த அவள்

. தூய இருளைப் போலிருந்தாள்

. ஆதிக் கருவறையின் நினைவூட்டினாள்

. போட்டான்கள் பிறந்தே இருக்காத

. பெருவெடிப்பின் முந்தைய நொடியவள்

. இரவுக்கடலின் வெள்ளிக் கப்பல்களாய்

. அகண்ட இமைகளில் பொதிந்த கண்கள்

. வேட்டை விலங்கின் தோலுரிக்கும்

. வலிமையான கரங்கள் அவளுக்கு

. ஒளியை விழுங்கிச் செரித்திருக்கும்

. துங்கக் கரியின் தூய நிறத்தவள்

. அதீதமான உதடுகள் உதிர்த்த

. அதிர்ந்த சொற்களில் அலட்சிய பாவம்

. அழகுப் போட்டிகள் நிராகரிப்பதை

. காதல் கவிஞர்களின் புறக்கணிப்பை

. திரைப்படங்களின் தீரா அவமதிப்பை

. விளம்பரங்கள் விலக்கிவைப்பதை

. திருமணங்கள் தள்ளிப்போவதை

. மின்னும் பற்களிடையே நிறையப் பேசினாள்

. ஒரு கருமாரி அம்மன் கோயில் நிறுத்தத்தில்தான்

. இறங்கி கண் நிறைந்துபோனாள்.

. - ஷான்

. ஓ... கேண்டி க்ரஷ் பெண்ணே!

. வார்த்தைகளை இனிப்பாக்கிக்

. கொஞ்சம் வாசமும் சேர்த்துவிடுகிறாள்

. பன்னீர் இதழ்கள்கொண்டு

. புள்ளிகளுக்குப் பதிலாக

. முத்தங்களைத் தூவுகிறாள்

. சோகம் இழையோடும் ஸ்டேட்டஸ்களுக்கு

. மாற்றாக நேசம் கிளறும் கவிதைகளை

. டிஸ்பிளே பிக்சர் ஆக்குகிறாள்

. சொர்க்கத்தின் நிறத்தை அப்புகிறாள்

. ரிப்ளைகளின் வழியாக

. சுவாசங்களின் சத்தங்களைப்

. பாடலாகப் பதிவுசெய்கிறாள்

. அவ்வப்போது புன்னகைக்கும்

. புகைப்படங்களும்கூட தரவிறங்குகிறது

. வனாந்திர நிலமாகிக் கிடந்த

. எனது வாட்ஸ்அப்

. ஸ்மைலிகளின் கூடாகிறது

. ஓ... கேண்டி க்ரஷ் பெண்ணே

. உன்மீது இப்படித்தான் நான்

. காதல்கொண்டேன்!

. - விக்னேஷ் சி செல்வராஜ்

சொல்வனம்

Vikatan Correspondent