சொல்வனம்

தலைமுறை சாயல்

. வழக்கம்போல் எதையேனும் மறந்து

. அவசரமாக வீடு திரும்புகையிலும்

. மனைவியுடனான முன்கோபச் சண்டையின்போதும்

. சிரித்துக்கொண்டே சொல்வார் அம்மா

. அப்படியே அப்பாவைப்போல் இருக்கிறேனென்று.

. சமயங்களில் தாத்தாவைப் பார்ப்பது,

. வயதாகிவிட்ட அப்பாவைப் பார்ப்பதுபோல இருக்கிறது.

. நாளை முதல் பள்ளி செல்லவிருக்கும்

. என் சிறுவயது மகனைக் காணும்போதெல்லாம் குழந்தையாகிவிட்ட அப்பாவையும் தாத்தாவையும்

. ஒருசேரக் காண்பதுபோலிருக்கிறது.

. இப்படி போலிருக்கிறது என்பதில்தான்

. எல்லாமும் இருக்கிறதுபோல.

. - தர்மராஜ் பெரியசாமி

. ஜொலிக்கும் புன்னகை

. தொங்கும் நிழலை இழுத்து

. வழியும் வெயிலைத் துடைத்து

. சுங்கச்சாவடிப் பேருந்துகளைத்

. துரத்திக் கூவி விற்கிறாள்

. பாலித்தீன் பையில் நட்டமாய் நிற்கும்

. நறுக்கிய வெள்ளரிக்காய்களை.

. காசை நீட்டியவனுக்கு

. காரப்பொடி தடவுவதற்குள்

. பேருந்து நகர்ந்தது.

. மீண்டும் துரத்தியோடினாள்

. பேருந்து ஜன்னலை.

. காசை நீட்டியவனுக்கு

. வெள்ளரிக்காய் சுவைத்தது.

. வெள்ளரிக்காரிக்கும்

. புன்னகை ஜொலித்தது.

. - பச்சோந்தி

. கேள்வி

. யாதும் ஊரே

. யாவரும் கேளிர்

. எப்படி வந்தது சேரி

. - வாலிதாசன்

. சிறுமியும்... குழந்தையும்...

. ஆடு மேய்க்கும் சிறுமி

. தடவிப்பார்க்கிறாள்

. கம்பளிப் போர்வையை.

. விளக்கு ஒளிர்ந்ததும்

. அமைதியானது

. அழுத குழந்தை.

. டே.துளசிராஜா

. அங்குசம்

. அங்குசத்தைக் கண்டாலே கொஞ்சம்

. பயம்தான் அந்த யானைக்கு.

. மெல்லிய மடல்களை அதன் கூர்மை

. பதம்பார்த்த வடுக்கள் நிரம்பிக் கிடக்கின்றன.

. சுயமறியா யானையின் தூக்கத்தில்

. இப்போதெல்லாம் கானகக் கனவுகள்.

. பாகன் அருகிலில்லா சமயம்

. தரையில் கிடந்த அங்குசத்தை

. அச்சத்தோடே தடவிப்பார்த்தது.

. அடுத்தடுத்த சந்தர்ப்பங்களில்

. அதைவைத்தே விளையாடவும் செய்கிறது

. பாகன் அறியாவண்ணம்.

. தும்பிக்கையில் இலகுவாகப் பிடித்து

. காற்றில் சுழற்றிப்பார்க்கிறது.

. இப்போது அங்குசம் கையாளக்

. கற்றுக்கொண்டுவிட்டது யானை

. இனி பாவம்தான்

. சின்னக் காதுகளுடைய அந்தப் பாகன்.

. - சுந்தர் தர்ஷன்

சொல்வனம்

Vikatan Correspondent