வி(அ)ஞ்ஞானம்

`உடம்பு சரியில்லை’ என டாக்டரிடம் போன அர்ச்சகரிடம், `நேரம் சரியில்லை’ என ஹோமம் நடத்த நாள் குறிக்கச் சொன்னார் டாக்டர்.

- பிரகாஷ் ஷர்மா

கிஃப்ட்

வீட்டில் இருந்த நகைகள் அனைத்தையும் அடகுவைத்துக் கிடைத்த பணத்தை, அட்வான்ஸாகக் கொடுத்து பிளாட் புக் பண்ணியதற்கு, கிஃப்ட்டாக இரண்டு கிராம் கோல்டு காயின் கொடுத்தார்கள்.

 - கே.லக்‌ஷ்மணன்

ஆள் பாதி...

10 கிலோ கத்திரிக்காயை கோணிப்பையில் கொண்டுவந்த பயணியிடம், ``லக்கேஜ் எடுத்தியா?’’ என எரிந்து விழுந்த கண்டக்டர், 20 கிலோ சூட்கேஸ்காரரிடம் ``சார்... டிக்கெட் ப்ளீஸ்!’’ என்றார்.

- பழனியா பிள்ளை


திருட்டுத்தனம்

``கிளாஸ் டைம்ல நாலு தடவை வாட்ஸ்அப் பார்த்திருக்கீங்க. நான் உங்க லாஸ்ட் சீன் மெசேஜ் பார்த்தேன்’’ என்ற ஹெட்மாஸ்டரைப் பார்த்து, திருட்டு முழி முழித்தார் ஆறுமுகம் வாத்தியார்.

 - சாய்ராம்

காமராஜர் ஆட்சி

`` `காமராஜர் ஆட்சி அமைப்போம்’னு நீங்க மேடையில சொன்னது உண்மைனு நம்பி நேர்காணலுக்கு வந்துட்டேன். என்கிட்ட அவ்ளோ பணம் இல்லை. வர்றேன் தலைவரே’’ என்றபடி எழுந்தார் லோகநாதன்.

 -  ச.ஜான் பிரிட்டோ

ஹோம்... வொர்க்!

ஹோம்வொர்க் செய்யும் மகள் மான்யா, வொர்க் ஃப்ரம் ஹோம் செய்யும் கணவன் பிரகாஷ் இருவருக்கும் டின்னர் தயார்செய்துகொண்டிருந்தாள் ஹோம்மேக்கர் ஹேமா.

 - பர்வீன் யூனுஸ்

டியூட்டி டைம்

தூங்குவதற்கு முன் அதிகாலை 4 மணிக்கு எழுந்திருக்க அலாரம் வைத்துக்கொண்டிருந்தான், அந்த அப்பார்ட்மென்ட்டில் ‘நைட் டியூட்டி’ பார்க்கும் வாட்ச்மேன் கந்தசாமி.

 - நெய்வேலி தேன்ராஜா

பயம்

நள்ளிரவில் யாரோ கதவைத் தட்டும் சத்தம் கேட்டு, திடுக்கிட்டான் திருடன்!

 - பெ.பாண்டியன்

முதல் இடம்!

டாப் 10–ல் எட்டாவது இடத்தில் இருந்த படம், சேனல் வாங்கிய மறுவாரமே முதல் இடத்தைப் பிடித்தது.

- அஜித்

காணாமல்போன விமானம்!

யாரும் இல்லாத இடத்தில் விழுந்து நொறுங்கிய விமானத்தை, தனியாகவும் ரகசியமாகவும் தேடிக்கொண்டிருக்கிறது அதை ஓசி வாங்கி விளையாடிய குழந்தை!

- கி.ரவிக்குமார்

அதிகபட்சம் 10 நொடிகளுக்குள் வாசித்துவிடக்கூடிய ‘நச்’ கதைகள் அனுப்ப வேண்டும்.

பிரசுரமானால் பரிசு ரூ. 500. உங்கள் கதைகளை 10secondstory@vikatan.com என்ற ஐ.டி-க்கு அனுப்பலாம்!