அஞ்சல்காரர்கள்

அ ஞ்சல் முகவரியாக

. அலுவலக முகவரியைக் கொடுப்பது

. என் வழக்கம்.

. வீடு போல் புறநகரிலன்றி

. நடுநகரிடை அலுவலகம் என்பதால்

. கடிதங்கள் ஒருநாள் முன்பாகக் கிடைக்கும்.

. நரசிம்மன் என்கிற மூத்த அஞ்சல்காரர்

. பத்துப் பதினைந்து ஆண்டுகள் வரை

. கடிதம் கொடுத்தார்.

. அலுவலகப் படிக்கட்டில் அமர்ந்துதான்

. கடிதங்களைப் பகுப்பார்.

. அவர் காலடியில்

. தெருநாய் ஒன்றும் முன்கால் நீட்டி அமர்ந்து

. வேடிக்கை பார்க்கும்.

. கோடையில்

. தம் சிவந்த மேனி வியர்வையில் ஊற

. வினையொன்றே நோக்காகக்

. கடிதங்கள் அடுக்குவார்.

. அவர் மிகுதியாய்ப் பேசி நான் பார்த்ததில்லை.

. பேசுகையில் வல்லினங்களை

. அழுத்திப் பலுக்குவார்.

. ஓய்வுக்கு பத்தாண்டுகள் முன்புதான்

. அவருக்குத் திருமணமாயிற்று.

. அதன் பின் நரசிம்மனின் பேச்சு

. முற்றாக முடங்கிற்று.

. புத்தாண்டுக் கொண்டாட்டங்களுக்கு

. என் கட்டடத்தார் அவரையும் அழைப்பர்.

. மொடாக்குடியர் என்று அப்போதுதான் தெரிந்தது.

. குடித்ததோடு குத்தாட்டமும் போட்டார்.

. மறுநாள் அவரிடம்

. ஆடிய கூத்துகளைச் சொன்னபோது

. வெட்கினார்.

. தீபாவளி... பொங்கலுக்கு

. ஐம்பது, நூறு பெறுவார்.

. தராதபோதும் முகமாற்றம் இராது.

. புதியவர் ஒருவர் அஞ்சல் தந்தபோதுதான்

. நரசிம்மன் ஓய்வுபெற்றதை அறிந்தோம்.

. பிறப்பூர் நோக்கிப் பெயர்ந்துவிட்டது தெரிந்தது.

. பின்னொரு பெரியம்மா

. அஞ்சல் தரத் தொடங்கினார்.

. வெய்யிலில் காய்ந்து வருகையில்

. அமரச் சொல்வேன்.

. குடிநீரோ தேநீரோ தருவதுண்டு.

. வழியிடையில் கண்டாலும்

. அஞ்சல் அடுக்குகளைக் கலைத்து

. 'இன்று ஒன்றுமில்லை...’ என்று

. சொல்லிவிட்டே அகல்வார்.

. பிறிதொரு நாள் அமர்கையில்

. தம் குடும்பக்கதை பகர்ந்தார்.

. முப்பெண்டுகளில்

. மூத்தது கணவனைப் பிரிந்தது.

. இரண்டாவது பணிக்குச் செல்கிறது.

. மூன்றாவது படிக்கிறது.

. தனியாளாய்க் கடிதஞ்சுமந்து உழைத்து

. விதியோடு போராடுகிறார்.

. இப்படியிருக்க

. அண்மையில் எனக்கு வரவேண்டிய கடிதங்கள்

. காலந்தாழ்ந்தன; கை மாறிக் கிடைத்தன.

. அடுத்தக் கட்டடத்தார்

. கொண்டுவந்து கொடுத்ததும் நிகழ்ந்தது.

. முகவரியறியாப் புதியவரிடம்

. என் கடிதங்கள் தடுமாறுகின்றனவோ

. என்று ஐயுற்றேன்.

. இன்று விடை கிடைத்தது.

. பள்ளிச் சிறுமிபோல்

. நீலச் சீருடை அணிந்த இளம்பெண்

. விரைவஞ்சலில் வந்த புத்தகக் கட்டோடு

. என் பெயர் வினவினாள்.

. 'தாமே புதிதாய்ப் பொறுப்புக்கு வந்த

. அஞ்சல்காரி’ என்று அறிமுகம் தந்தனள்.

. போதும்

. அவளைப் பற்றி எதுவும்

. எனக்குத் தெரிய வேண்டா.

. இப்பெண்ணாள் ஓய்வுபெறும்போதும்

. என் அலுவலக முகவரி

. இதுவாகவே இருக்குமென்பது மட்டும்

. எனக்குத் தெரியும்!

அஞ்சல்காரர்கள்

Vikatan Correspondent