Published:Updated:

குடி குடியைக் கெடுக்கும் - 24

குடி குடியைக் கெடுக்கும் - 24
பிரீமியம் ஸ்டோரி
குடி குடியைக் கெடுக்கும் - 24

#BanTasmac தொடர்பாரதி தம்பி, படம்: எம்.முத்துக்குமார்

குடி குடியைக் கெடுக்கும் - 24

#BanTasmac தொடர்பாரதி தம்பி, படம்: எம்.முத்துக்குமார்

Published:Updated:
குடி குடியைக் கெடுக்கும் - 24
பிரீமியம் ஸ்டோரி
குடி குடியைக் கெடுக்கும் - 24
குடி குடியைக் கெடுக்கும் - 24

ரு சிக்கலைத் தீர்ப்பதற்கு, ஆகச்சிறந்த ஜனநாயகபூர்வமான வழி என்ன? அதில் சம்பந்தப்பட்டவர்களிடம் கருத்துக் கேட்டு, பெரும்பான்மையானோர் என்ன சொல்கிறார்களோ, அதைச் செயல் படுத்துவது. டாஸ்மாக் கடைகளை மூடுவதா... வேண்டாமா என்பதில் ஒரு முடிவை எடுக்கவும் இதுதான் தீர்வு. ஆனால், இந்த விஷயத்தில் வாக்கெடுப்பு எதுவும் நடத்தாமலேயே முடிவு நமக்குத் தெரியும்.

‘கடைகளை மூடு’ என்பதுதான் பெரும்பான்மை மக்களின் கருத்து. அவர்கள் ஏன் அப்படிச் சொல்கிறார்கள் என்றால், அந்தக் கடை, அவர்களை வாழவிடாமல் துன்புறுத்துகிறது; உயிர்களைப் பலியாக்குக் கிறது; குடும்பத்தை நரகமாக்குகிறது. ஆனால் அரசோ, ‘மூட முடியாது. முடிந்ததைப் பார்த்துக்கொள்’ என்கிறது. `மக்களால் முடியுமா... முடியாதா?' என்பதுதான் இப்போது எஞ்சி நிற்கும் கேள்வி.

நமது செல்போன்களில், திடீரென காலர் ட்யூனை ஆக்டிவேட் செய்துவிடுவார்கள். நாம் தேர்ந்தெடுத்த திட்டத்தில் இருந்து இன்னொன்றுக்கு மாற்றிவிட்டுவிடுவார்கள். போன் செய்து கேட்டால், ‘நீங்க வேணும்னா டிஆக்டிவேட் பண்ணிக்குங்க’ என்பார்கள். `நான் டிஆக்டிவேட் செய்வது இருக்கட்டும்... முதலில் யாரைக் கேட்டு என்னை அந்தத் திட்டத்தில் சேர்த்தீர்கள்?'என்போம். இந்தக் கதைதான் இப்போது டாஸ்மாக்கில் நடக்கிறது.

என் வீட்டு வாசலில் என்னைக் கேட்டா டாஸ்மாக் கடையைக் கொண்டுவந்தாய்? இப்போது கடையை மூடுவதற்கு மட்டும் எதற்கு நான் உன்னைக் கேட்க வேண்டும்? இப்படிக் கேட்பது, விதண்டாவாதம் அல்ல; சட்டத்தை மீறுவதும் அல்ல. சமூகத்துக்குத் தீங்கு விளை விக்கும் எந்த ஒன்றையும் தானாக முன்வந்து தடுப்பது, ஒரு ஜனநாயக நாட்டில் உள்ள மக்களின் கடமை. தேசபக்தி என்பதன் உண்மை யான அர்த்தம் இதுதான். இந்தக் கடமை அரசுக்குத்தான் முதன்மையானது. ஆனால், அந்தத் தீங்கை விளைவிப்பதே அரசுதான் எனும்போது, தவிர்க்க இயலாத வகையில் மக்கள் அந்தப் பொறுப்பை கையில் எடுக்க வேண்டி யுள்ளது.

சரி, இப்படி எல்லாம் அதிரடி செய்யாமல் சாத்வீகமான வழியில் டாஸ்மாக் கடைகளை மூடுவதற்கான வாய்ப்புகளே இல்லையா? இருக்கிறது. அரசு அதிகாரிகளிடம் அல்லது நாம் வாக்களித்துத் தேர்ந்தெடுத்த மக்கள் பிரதிநிதிகளிடம் மனு கொடுக்கலாம். பெரும்பாலும் எம்.எல்.ஏ., எம்.பி போன்ற மக்கள் பிரதிநிதிகளை இந்த விஷயத்தில் மக்கள் நம்புவதே இல்லை. டாஸ்மாக் கடையை மூடுவதற்கு அவர்களிடம் எவரும் மனு கொடுப்பதும் இல்லை. ஏனெனில், இவர்களால் ஒன்றும் முடியாது அல்லது இவர்களும் அந்தக் கள்ளக்கூட்டில் ஓர் அங்கம் என்பதை மக்கள் தெளிவாகத் தெரிந்துவைத்துள்ளனர். எனவே, அவர்கள் மனு கொடுப்பது என முடிவு எடுத்துவிட்டால் அரசு அதிகாரிகளிடம்தான் போகின்றனர். முக்கியமாக, மக்களின் நம்பிக்கைக்கு உரிய அதிகாரியாக இருப்பவர் மாவட்ட ஆட்சியர். சாராயக் கடைகளை மூடுவதற்கு மட்டும் அல்ல... தங்களுக்கு ஊறு விளைவிக்கும் எந்த ஒன்றையும் தடுக்கவோ, நிறுத்தவோ மக்கள், ஆட்சியரிடம்தான் மனு கொடுக்கிறார்கள். ஆனால், அவரால் இதுபோன்ற திட்டங்களைத் தடுக்க முடியுமா... அதற்கான நிர்வாக அதிகாரம் அவருக்கு உண்டா?

நிச்சயம் இல்லை. அவர் டாஸ்மாக் கடையைத் திறக்க வேண்டுமானால் உதவுவார்; மூடுவதற்கு உதவ மாட்டார். இதை ஒரு வாக்கிய அழகுக்காகச் சொல்லவில்லை. ஒரு மாவட்ட ஆட்சியரின் அதிகார வரம்புகள் என்னென்ன... அவர் எதற்காக ஆட்சியராக இருக்கிறார்? அரசு கொண்டுவரும் பல்வேறு வகையான திட்டங்களை, முழுவீச்சில் செயல்படுத்தவும், அதன் பயன்கள் மக்களைச் சென்றடைவதை உறுதிப்படுத்தவுமே அவர் ஆட்சியராக இருக்கிறார். மாறாக, அரசின் திட்டங்களைத் தடுத்து நிறுத்துவதற்காக அல்ல. அப்படியானால், `டாஸ்மாக்' என்ற திட்டத்தின் பயன்கள் மக்களைச் சென்றடைவதை உத்தரவாதப் படுத்துவதுதான் அவருடைய வரையறுக்கப் பட்ட பணி. ஆனால் நாம் என்ன செய்கிறோம் என்றால், கடையை மூடுவதற்கு அவரிடமே மனு கொடுக்கிறோம். டாஸ்மாக் மட்டும் அல்ல... எந்த ஓர் அரசுத் திட்டத்தையும் ஓர் ஆட்சியரால் தடுத்து நிறுத்திவிட முடியாது. திட்டங்களை நிறுத்துவது அல்ல, செயல்படுத்துவதே அவரின் வேலை. அதற்குத் தடை ஏற்பட்டால் போலீஸைக் கொண்டு சட்டம்-ஒழுங்கைக் கட்டுக்குள் வைத்திருப்பது அவர்களின் கடமை. எனவே, மாவட்ட ஆட்சியர் என்பவரை சர்வவல்லமை படைத்த நபராக நாம் நினைத்துக்கொள்வதும், அரசுத் திட்டங்களுக்கு எதிராக அவரிடமே மீண்டும் மீண்டும் மனு கொடுப்பதும், இந்த அரசு என்ற பிரமாண்ட நிறுவனம் குறித்த நமது மூடநம்பிக்கைகளில் ஒன்று.

சகாயம் போன்ற சில அதிகாரிகள் நேர்மை யாகவும் அதிரடியாகவும் செயல்படுகிறார்கள் என்றால், அது அவர்களின் தனிப்பட்ட துடிப்பு; ஆர்வம். அதை அந்த வேலைக்கான வரை யறையாகக் கூற முடியாது. ஒருவேளை அதுவே வரையறையாக இருந்திருந்தால், எல்லா மாவட்ட ஆட்சியர்களும் அதைச் செய்யவோ, செய்ய முயற்சித்திருக்கவோ வேண்டும்.

குடி குடியைக் கெடுக்கும் - 24

ஒட்டுமொத்த விகடனுக்கும் ஒரே ஷார்ட்கட்!

நாம் வாக்களித்துத் தேர்ந்தெடுக்கும் மக்கள் பிரதிநிதிகளே, மக்கள் நலனில் அக்கறை கொள்ளாமல் ஒதுங்கும்போது, மேல் இருந்து நேரடியாக அரசின் நிர்வாகிகளாக நியமனம் செய்யப்பட்டவர்களுக்கு, மக்கள் நலன் என்பது ஒரு வேலை நிபந்தனையாக இருக்க முடியாது. எனவே, மனு கொடுத்து டாஸ்மாக் கடையை மூடிவிடலாம் என்பது எந்த வகையிலும் வேலைக்கு ஆகாது.

வேறு என்ன செய்யலாம்? நமது ஜனநாயக அமைப்பில் உள்ளாட்சிக்கு இருக்கும் அதிகாரம் முக்கியமானது. ஒரு கிராம ஊராட்சியில், `டாஸ்மாக் கடை வேண்டாம்' என, கிராம சபை கூட்டத்தில் முடிவு எடுத்து தீர்மானம் நிறைவேற்றினால், அந்தக் கடையை அங்கு தொடர்ந்து நடத்தக் கூடாது. இப்படிப் பல ஊர்களில் தீர்மானம் நிறைவேற்றியும் கடையை அகற்றவில்லை. அந்தத் தீர்மானத்தை மதித்து, உள்ளாட்சி அமைப்புக்கு இருக்கும் சுயேட்சை அதிகாரத்தை உணர்ந்து செயல்படவேண்டிய மாவட்ட ஆட்சியர், அதை மதிப்பது இல்லை. இப்போது என்ன செய்வது?

அடுத்த வழி, நீதிமன்றம். டாஸ்மாக் கடைகளுக்கு எதிரான பல வழக்குகள் நீதிமன்றங்களுக்கு வந்தவண்ணம் உள்ளன. அவற்றில் குறிப்பான சில கோரிக்கைகள் வரும்போது நீதிமன்றம் தலையிடுகிறது. நெடுஞ்சாலைகளில் கடை வைக்கக் கூடாது; விபத்துகள் அதிகரிக்கின்றன என்றால் அதில் தலையிட்டு, கடையை அகற்றச் சொல்கிறது. கோயில், பள்ளிக்கூடங்களுக்கு அருகே கடை வேண்டாம் என்றால், அதில் தலையிடுகிறது. இப்படித் தலையிட்டு, கடையை அகற்ற வேண்டும் என நீதிமன்றம் தீர்ப்பு சொன்னால்கூட அதையும் செயல்படுத்த மறுக்கிறார்கள்.

கன்னியாகுமரி மாவட்டம் உண்ணாமலைக் கடை என்ற இடத்தில் இருந்த டாஸ்மாக் கடையை அகற்ற வேண்டும் என, அந்த ஊர் மக்கள் மதுரை உயர் நீதிமன்றக் கிளையில் உத்தரவு பெற்றார்கள். அந்த உத்தரவு நகலை மாதக்கணக்கில் வைத்துக்கொண்டு, கடையை மூடுவதற்காக மாவட்ட நிர்வாகத்திடம் முறை யிட்டார்கள். எதுவும் நடக்கவில்லை. கடைசியில் சசிபெருமாள் உண்ணாமலைக் கடைக்குச் சென்று செல்போன் டவரில் ஏறி உயிரை விடவேண்டியிருந்தது. அதற்குப் பிறகே அந்தக் கடையை மூடினார்கள்.

இப்படி மாநிலம் முழுவதும் உள்ள சுமார் 6,000 கடைகளையும் மூடுவதற்கு ஒரு கடைக்கு ஒருவர் வீதம் உயிரிழக்க வேண்டுமா? ஏற்கெனவே ஒவ்வொரு கடைக்கும் பல நூறு பேர் குடித்துக் குடித்து உயிரை விட்டுக்கொண்டுதான் இருக்கிறார்கள். நீதிமன்றம், குறிப்பான பிரச்னைகளில் தலையிடுவதோடு மட்டும் நிறுத்திக்கொள்ளாமல், ஒட்டுமொத்த டாஸ்மாக் கடைகளையும் அகற்ற உத்தரவு இடவேண்டும் என்றால், ‘அது அரசின் கொள்கை முடிவு. நாங்கள் தலையிட முடியாது’ என ஒதுங்கிக்கொள்கிறது.

அப்படியானால் அரசின் கொள்கை முடிவை மாற்ற வேண்டும். `சாராயக் கடை எங்கள் ஊருக்கு வேண்டாம்' என பீஹார் முதலமைச்சர் நிதீஷ்குமார் இப்போது முடிவு எடுத்திருக்கிறார். அதைப்போல நம் ஊரிலும் முடிவு எடுக்க வேண்டும். அரசின் கொள்கை முடிவுகளைத் தீர்மானிப்பவர்கள்தான் மக்கள் பிரதிநிதிகள். தமிழ்நாட்டில் உள்ள பெரும்பாலான சாராய ஆலைகள் நேரடியாகவும் மறைமுகமாகவும் இவர்களுடன் தொடர்புடையவை. காய்ச்சுவதே அவர்கள்தான். அதை அரசின் கொள்கையாக வகுப்பதும் அவர்கள்தான். அவர்களிடமே போய் கடைகளை மூடச் சொன்னால் எப்படிச் செய்வார்கள்? அவர்களுக்குக் கோபம் வரத்தானே செய்யும்? அதனால்தான் ‘மூடு... டாஸ்மாக்கை மூடு...’ எனப் பாடிய கோவன் மீது தேசத்துரோக வழக்கு பதிவுசெய்தார்கள். அதற்காக உச்ச நீதிமன்றம் வரை கழுவி ஊற்றியும் அதைப் பற்றி மாநில அரசு கவலையேபடவில்லை.

இப்போது மறுபடியும் கோவன் உள்ளிட்ட பலர் மீது, தேசத்துரோக வழக்கு பதிவு செய்திருக்கின்றனர். அந்த எஃப்.ஐ.ஆர் பட்டியலில் 5 வயது சிறுமியும் 10 வயது சிறுமியும் இருக்கிறார்கள். `சாராயம் விற்காதே' எனச் சொன்னதற்காக ஒரு  சிறுமி மீது எஃப்.ஐ.ஆர் போடுகிறோமே, அதுவும் தேர்தல் நேரத்தில்...என எந்தப் பதற்றமும் தயக்கமும் அரசுக்கு இல்லை.

`தாயைப் பழித்தாலும் தண்ணியைப் பழித்தவனை விட மாட்டேன்' எனச் சொல் வதைப்போல வேறு எதுவும் சொன்னால்கூட விட்டுவிடுவார்கள்போல, `டாஸ்மாக்கை மூடு!' எனச் சொன்னால் மட்டும் அடிமடியில் கை வைத்ததுபோல பொங்கி எழுகிறார்கள். எனவே, இவர்கள் ஒன்றுசேர்ந்து கொள்கை முடிவு எடுத்து, கடையை மூடுவது என்பது... அ.தி.மு.க மந்திரிகள் சுயமரியாதையுடன் இருப்பதைவிடவும் கஷ்டமான வேலை.

ஆக, கவுன்சிலர், எம்.எல்.ஏ., எம்.பி., கலெக்டர் போன்றோரிடம் மனு கொடுப்பது எதுவுமே வேலைக்கு ஆகாதவை. இவர்கள் அத்தனை பேரும், கடையை நடத்துவதற்காகத்தான் இருக்கின்றனர்; மூடுவதற்காக அல்ல. நீதிமன்றத்துக்குப் போனால், ‘கொள்கை முடிவு’ எனக் கைவிரிக்கிறார்கள். எனவே, நம் முன் எஞ்சியிருக்கும் ஒரே வாய்ப்பு, உறுதியான மக்கள் போராட்டங்கள் மட்டுமே. எப்போதும் ஒரு போராட்டத்தில் எதிரியைவிட எண்ணத்திலும் செயலிலும் இரு மடங்கு தீவிரம் இருந்தால் மட்டுமே இலக்கை அடைய முடியும். இங்கு எதிர்த்தரப்பு என்பது, சர்வ வல்லமை பொருந்திய அரசு. அதை எதிர்த்து ஒரு கோரிக்கையுடன் திரளும்போது பன்மடங்கு உறுதியுடன் நிற்க வேண்டும். ‘அது எப்படிங்க, ஓர் அரசாங்கத்தை எதிர்த்து கடையை மூட முடியுமா?’ என எண்ணத் தேவை இல்லை. மாநிலத்தின் பல பகுதிகளில் பல கடைகள் அப்படி மூடப் பட்டிருக்கின்றன.

குடி குடியைக் கெடுக்கும் - 24

விருத்தாசலம் அருகே உள்ள மேலப்பாளையூர் என்ற கிராமத்தில் இருக்கும் டாஸ்மாக் கடை கடந்த ஆறு மாதங்களுக்கும் மேலாகப் பூட்டிக் கிடக்கிறது. காரணம், அந்த ஊர்மக்கள் அனைவரும் ஒன்றிணைந்து விடாப்பிடியாக நின்று போராடியதன் விளைவு. இதற்காக இந்த ஊரைச் சேர்ந்த பலர் மீது போலீஸ் பிணையில் வெளிவர முடியாத பிரிவுகளில் வழக்கு பதிவு செய்துள்ளது. ஆனாலும் அவர்கள் கலங் கவில்லை. தங்கள் கோரிக்கையில் உறுதியுடன் நின்று மதுக்கடையை விரட்டி அடித்துள்ளனர்.

தஞ்சாவூர் மாவட்டம் ஒரத்தநாடு அருகே வடக்கூர் என்ற ஊரில் ஆற்றங்கரையில் இருந்த இரண்டு டாஸ்மாக் கடைகளை மக்கள் போராடி இழுத்து மூடியுள்ளனர். ஏழெட்டு மாதங்களைத் தாண்டியும் கடை பூட்டப்பட்டுத்தான் கிடக்கிறது. திருவண்ணாமலை மாவட்டம் செய்யாறு அருகே உள்ள அழிவிடைதாங்கி என்ற கிராமத்தில் இருந்த டாஸ்மாக் கடை ,போராட்டத்தால் ஓர் ஆண்டுக்கும் மேலாக இழுத்து மூடப்பட்டுள்ளது.

யாரோ உத்தரவிட்டு கடையை மூடுவார்கள் என நாம் இனியும் எதிர்பார்த்துக் காத்திருக்க முடியாது. நம் வீட்டு வாசலில் இருக்கும் கடையை மூடுவதற்கு யாருடைய உத்தரவும் தேவை இல்லை. இன்னும் எத்தனை உயிர்களை இழப்பது? இன்னும் எத்தனை பெண்கள் தாலியறுப்பது? மனிதர்களிடம் இருந்து மனிதனுக்கு உரிய பண்புகளை அகற்றி, அவனை மிருகமாக மாற்றும் இந்த டாஸ்மாக் மதுக் கடைகள், இனியும் நமக்கு வேண்டாம்.

குடி குடியைக் கெடுக்கும் - 24


இழுத்து மூடுவோம் டாஸ்மாக் கடைகளை!

- நிறைவடைந்தது