சொல்வனம்

நீள்வட்டம்...

. பிராய்லருக்குப் புரிவதில்லை

. ஒரு கோழிமுட்டையின் வாழ்வு

. அடைகாக்கும் கோழிக்கு அதிர்ஷ்டமிருந்தால்

. பிள்ளைமுகம் பார்க்கும்

. இல்லையென்றால்

. பிள்ளை, பொடித்த வெங்காயம் சேர்த்து

. ஆவி பறக்கும் ஆம்லெட்டாகிச் சுவைதீர்க்கும்

. அவித்து இறக்கி ஆடை நீக்கினால்

. இளமங்கையின் தளுக்குக்காட்டிச் சிரிக்கும்

. பத்து மணி தாண்டி

. பாண்டியன் கபே பக்கம் வந்தால்

. முட்டைப் பொடிமாஸாகி

. பங்காளிகளுக்கு நாவினிக்கும் சைட்டிஷ்ஷாகும்

. பாலைவனத்துக் கையளவு நீரென

. ஹாஃப்பாயிலாக மிதந்து நின்று

. நாவூறும் வெற்றிலையாகும் சிலருக்கு

. இவை எதுவுமறியாமல் கண்ணாடிப் பெட்டிக்குள்

. தீயில் சுழலும் பிராய்லர் முண்டம் உணருமா

. வாழ்க்கை ஒரு வட்டமென்றால்

. கோழிமுட்டைக்குக் கொஞ்சம் நீள்வட்டம்தானென்று.

. - சச்சின்

. போலச் சிறக்குமொரு வாழ்வு...

. காடுபோல ஒரு காடு செய்திருக்கிறார்கள்

. நதிபோல ஒரு நதி

. குன்றுபோல ஒரு குன்று

. கடல்போல ஒரு கடல்

. புலிபோல ஒரு புலி

. மீன்போல ஒரு மீன்

. குளம்போல ஒரு குளம்

. பூபோல ஒரு பூ

. காற்றுபோல இருந்த காற்றில்

. மனிதர்கள்போல இருந்த மனிதர்கள்

. உலவி அலைந்து

. வீடுபோல இருந்த வீடு திரும்பினர்.

. காசுபோல இருக்கும் காசு கொடுக்காமல்

. காசேதான் கொடுக்கவேண்டியிருந்தது.

. - உமாமோகன்

. முனீஸ்வரன் கோயில் தாயத்து...

. நறுக்கிய பனையோலையை

. கூட்டல்குறிபோல் அமர்த்துக

. அதன் மத்தியில் குத்தி

. வெளிப்படும் காரைமுள் கூர்முனையை

. உலர் சோளத்தக்கையில் செருகுக

. இப்போது சுளுவாக

. ஒரு காற்்றாடியைத் தயார்பண்ணும்

. வித்தையைக் கற்றீர் நீங்களும்

. அதிவேகமாகச் சுழலும்

. அக்காற்றாடியை ஏந்திக்கொண்டு

. வீசும் காற்றுக்கு எதிர்திசையில்

. விரைந்தோடும்போது

. ஒரு கிராமத்துச் சிறுவனாகி

. முனீஸ்வரன் கோயில் முன்னர்

. மூச்சிரைக்க நிற்கும்

. உங்களுக்குத் தாயத்தொன்று

. பரிசளிக்கப்படுகிறது

. மற்றும்

. அது கைவசம் இருக்கும் வரை

. ஒரு மயிரும் செய்யாது

. பிசாசுகளும் பூதங்களும்

. என்று அறிவுறுத்தப்படுகிறீர்

. அதை ருசுப்படுத்தும்விதமாக

. சோளம் திணை சாமை

. குதிரைவாலி அரிசி கொள்ளு

. உள்ளிட்ட சிறுதானியங்களுடன்

. ஒரு ராட்சதப் பேரங்காடிக்குள்ளிருந்து

. கனத்தப் பையுடன் வெளியேறுகிறது

. ஒரு பெருமாநகரத்து மத்தியதரம்.

. - வெ.வெங்கடாசலம்

சொல்வனம்

Vikatan Correspondent