Published:Updated:

சொல்வனம்

சொல்வனம்

சொல்வனம்

சொல்வனம்

Published:Updated:
##~##

சிட்டி கேர்ள்

நைட் கிளப் வாசலில்
நடுநிசியில் காணலாம்
நகரம் எனும் பீடத்தில்
அடுத்த பெண் பலி

ஒட்டுமொத்த விகடனுக்கும் ஒரே ஷார்ட்கட்!

மெள்ள மெள்ள
மென்மை இழக்கிறாள்
முட்டுச் சந்தில்
மாட்டிக்கொண்ட பூனை
புலிக் குணம் கொள்வதைப்போல்

செயற்கையாய் இமை அசைக்கிறாள்
செயற்கையாய் நடக்கிறாள்
செயற்கையான செடிகள் வளர்க்கிறாள்
செயற்கையாய் சிரிக்கிறாள்
முறைக்கிறாள்
பேசுகிறாள்
இயற்கையானதொரு
வெப்பம் தகிக்கிறது - அவள்
தாய் வழிக் கதிரொளியிடமிருந்து

சொல்வனம்

முக நூலின்
நண்பர் வட்டாரம்  
தொள்ளாயிரத்தைத் தொட்டுவிட்டது
அடுக்கு மாடியின்
ஒற்றைச் சுவர் பிரித்த
அடுத்த வீட்டுப் பெண்
அனிதாவோ அலமேலுவோ?!

காளை அடக்க வேண்டாம்
கல்யாணக் கல் தூக்க வேண்டாம்
காதலி இருந்தாலும் மன்னிக்கப்படும்
காதலன் இல்லாதவனாய் இருந்தால்
மட்டும் விண்ணப்பிக்கவும்

மெல்லிய கொடி இடையாள்
மருண்ட மான் விழியாள்
வழக்கொழிந்தன
கணினிக் கன்னி
கை பேசிச் சொல்லினள் என  
மாறின சொலவடைகள்

செந்தேன் தாய்
தமிழ் மொழி மறந்து
உடைந்த ஆங்கிலத்தை
ஒட்டவைக்க முயற்சிக்கிறாள்
நகர் எனும் பெருங்கடலின் அலைகளில்
கால் நனைக்கத் துவங்கியவள்
மாதமொரு முறை
அழகு நிலையம்.

தோல் பராமரிப்பு
சிகை அலங்காரம்
புருவம் திருத்துதல்
நகம் களையவும்கூட...

வீடிருக்கும் ஊர் சென்று  
விடுதி திரும்பும்போதெல்லாம்
மறவாமல் இட்டு வருகிறாள்
முற்றத்து மருதாணியை
வட்ட வட்டமாக.

விளக்கு வைக்கும் முன்
வீடு வந்து சேர் என்கிறாள்
பத்தாம் பசலிகளில்
பதினோராம் தாயாக.

முகமறியா இளம் பெண்
சிதைந்த சேதி அறியும்போதெல்லாம்
அடைகாக்க முயல்பவளைப்போல
அப்படித்தான் இருப்பாள்
அம்மா.

கிராமத்துத் தோழி கேட்கிறாள்
'எப்படி இருக்கிறது நகரம்?' என
மேகங்களின் வடிவங்களுக்குப்
பெயர் சூட்டியபடி...

மின் கம்பிகளின் நடுவே
திட்டுத் திட்டாய் வானம்
ஒட்டியிருக்கிறதென்றும்
பகிர்ந்துண்ணுவதில்லை
பறித்து உண்ணுகின்றன
காகங்கள் என்றும்
ஒலிப்பான்களின் நடுவே தேய்ந்தன
பட்சிகளின் கானமென்றும்
என் பசைக் கோலம் கண்டு
ஏமாந்த எறும்புகள்
'பிடி சாபம்’ என்றதையும்
எப்படிச் சொல்ல!

- சபிதா இப்ராகிம்

சொல்வனம்