Published:Updated:

சொல்வனம்!

ஓவியம் : ராஜ்குமார் ஸ்தபதி

சொல்வனம்!

ஓவியம் : ராஜ்குமார் ஸ்தபதி

Published:Updated:
##~##

ஒரு துரோகத்தின் முன்னால்...

 ரு துரோகத்தின் முன்னால்
எப்படி நடந்துகொள்ள வேண்டும்
என்பதைப் பற்றிச் சில குறிப்புகள்...

சற்றும் எதிர்பாராத நேரத்தில்
வந்து நிற்கும்
அழையா விருந்தாளிபோல
துரோகம் ஒன்று
முன்னே வந்து நிற்கலாம்

ஒருவேளை
வெகு அருகிலேயே
ஒரு திருடனைப் போல
ஓடி ஒளிந்துகொண்டிருக்கலாம்

அதன் முன்பு
கண்ணீர்விட்டோ
அழுது புலம்பியோ
ஒரு துளி இரக்கத்தைப்
பெற்றுவிடலாமென்று
நினைத்துவிடாதீர்கள்

அது
அன்பை... காத்திருப்பை
தியாகத்தை... துயரத்தை
ஒருபோதும்
ஏறிட்டுப் பார்க்காது

மூக்கு நுனியில்
நாற்காலியிட்டு அமர்ந்திருக்கும்
உங்களின் பெருங்கோபம்
நியாயமானதென்றாலும்
மற்றவர் முன்னிலையில் அதனை
அடையாளம் காட்டியோ
சத்தம் போட்டோ
பேசிட வேண்டாம்

உங்களைக் குற்றவாளியாக்கிப் பார்த்திட
ஓராயிரம் பொய்களைப்
புனைந்து வந்திருக்கும் அது

சொல்வனம்!

சற்றும் பொருட்படுத்தாது
விட்டுவிடுங்கள் அல்லது
புன்னகை ஒன்றை ஏற்றி
வாசல் வரை சென்று
வழியனுப்பிப் பாருங்கள்
தலைகுனிந்தவாறு
விடைபெறாமலேயே
சென்றுவிடக்கூடும்

அதிகம் கடினம் என்றாலும்
பெருங்கருணைகொண்டு
மன்னித்துவிடுங்கள்
அடுத்த நிமிடமே
அது இறந்துவிடும்!

- சுமதிராம்  

வேண்டுகோள்

பஞ்சுமிட்டாய்க்காரன்
தேநீர் அருந்தும்
ஒற்றைக் கணத்திற்குள்
தன்னை விடுதலை செய்து
அழைத்துப் போய்விடுமாறு
அநேக குழந்தைகளிடம்
கேட்டுவிட்டிருப்பாள்
பொம்மைப் பொம்மி!

- ஆத்மார்த்தி

வேர்கள்

மாமரத்தடி
பேருந்து நிறுத்தம்
என்கிறார்கள்
வேப்பமரத்தடி
பேருந்து நிறுத்தம்
என்கிறார்கள்
புளியமரத்தடி
பேருந்து நிறுத்தம்
என்கிறார்கள்
அந்த நிறுத்தங்களில்
எந்த மரமுமே இல்லை
கொடி மரத்தடி
பேருந்து நிறுத்தம்
என்கிறார்கள்
அந்த நிறுத்தத்தில் மட்டும்
இருக்கின்றன
ஐந்தாறு கொடி மரங்கள்!

- மு.பெரியசாமி

சொல்வனம்!