சட்டைப்பையில் வீட்டைச் சுமந்துகொண்டிருப்பவன் - கவிதை

ச ட்டைப்பையில் வீட்டைச்

. சுமந்துகொண்டிருப்பவன்

. அதை அடிக்கடி எடுத்து வருடிக்கொடுக்கிறான்

. ஒரு நாய்க்குட்டியை வருடும் வாஞ்சையோடு

. சட்டைப்பையில் இருக்கும் வீடு

. எப்போதாவது குரைக்கும்போது

. அவன் பதறுகிறான்

. சட்டைப்பையில் வீடு உள்ளவன் கழுத்தில்

. மாலை ஆறு மணி நீளத்துக்கு

. ஒரு கயிறு கட்டப்பட்டுள்ளது

. வழக்கத்தின் உலர்ந்த புல்வெளிகளில்

. சீதோஷணமற்ற வானிலைகளில்

. தன் மரிகளை மேய்த்துத் திரும்புகிறான்

. சட்டைப்பையில் வீடுள்ளவன்

. பிரம்புகளின் மொக்கை நகைச்சுவைக்குப் பல்லை இளிக்கிறான்

. எளிய மிரட்டல்களுக்கு

. மரித்துப் பிழைக்கிறான்

. சட்டைப்பையில் வீடுள்ளவன்

. மூன்றாவது ரவுண்டில் எலுமிச்சை கடிக்கிறான்

. முகநூலில் பொங்கல் வைக்கிறான்

. சட்டைப்பையில் வீடுள்ளவன்

. தொலைதூரப் பிரயாணங்களில்

. ரயிலின் கடைசிப் பெட்டியாக

. தன் வீட்டையும் இணைக்கிறான்

. இறங்கும்போது கவனமாக அதை

. தன் சட்டைப்பையில் வைத்துக்கொள்கிறான்