10 செகண்ட் கதைகள்!

சந்தேகம்

. ``உனக்கு எப்போ கல்யாணம்?'' எனக் கேட்டான் காதலன், காதலியிடம்!

- கிருஷ்ணகுமார் தர்மலிங்கம்

. பதற்றம்

. இன்டர்வியூ நேரம் நெருங்க நெருங்க பதற்றம் அதிகமானது, முதன்முதலாக இன்டர்வியூ செய்யவந்த புது ஆபீஸருக்கு! - அ.ரியாஸ்

. மரியாதை

. ஆசிரியர் வகுப்பில் நுழைந்ததும் ஒரு நிமிடம் எழுந்து நின்றோம். பிரதியாக அவர் ஒரு மணி நேரம் நின்றார்!

- எஸ். சுந்தரராமன்

. ஹெல்த்

. ``நோ... நோ... ஹோட்டல்ல சாப்பிட்டா உடம்புக்கு நல்லது இல்லை. நீங்க ஒரு தோசை மாவு பாக்கெட்டும் இட்லிப் பொடி பாக்கெட்டும் வாங்கிட்டு வாங்க. வீட்லயே நல்லா சாப்பிடலாம்’’ என்றாள் நித்யா!

-அ.ரியாஸ்

. ஆசை

. ஹீரோயினோடு ஒரே ஒரு செல்ஃபி எடுத்துக்கொள்ள ஆசைப்பட்டார், வருமான வரி சோதனை நடத்தவந்த அதிகாரி! - பெ.பாண்டியன்

. செயற்கை

. `இயற்கை விவசாயத்தில் விளைந்தவை’ - காய்கறி, பழங்களின் மேல் ஸ்டிக்கர் ஒட்டப்பட்டது!

- எம்.விக்னேஷ்

. அடையாளம்

. ``என்னை அடையாளம் தெரியலையா? நான் உங்க ஃபேஸ்புக் ஃப்ரெண்ட் சார்’’ என்றார், திருமணத்துக்கு வந்தவர்!

- பெ.பாண்டியன்

. சந்தோஷம்

. ``கண்ணாடியில் பார்க்கும்போதுதான் முகம் டல்லா தெரியுது. செல்ஃபியில் பார்த்தா, எப்பவுமே சந்தோஷமாத்தான் தெரியுது’’ என்றாள் மாதவி, தன் அப்பாவிடம்!

- கே.சதீஷ்

. ஞாபகம்

. மூக்கைப் பொத்திக்கொண்டனர் பயணிகள் அனைவரும், ஆற்றைக் கடந்தபோது!

- பெ.பாண்டியன்

. தொடக்க விழா பூஜை

. பேய் படத்துக்கு பூஜை போடப் போனார் கோயில் பூசாரி!

- கோ.பகவான்

. அதிகபட்சம் 10 நொடிகளுக்குள் வாசித்துவிடக்கூடிய ‘நச்’ கதைகள் அனுப்ப வேண்டும். பிரசுரமானால் பரிசு ` 500. உங்கள் கதைகளை 10secondstory@vikatan.com என்ற ஐ.டி-க்கு அனுப்பலாம்!