Published:Updated:

‘லைஃப் இஸ் ப்யூட்டிஃபுல் !’ - கவிதை

ஒட்டுமொத்த விகடனுக்கும் ஒரே ஷார்ட்கட்

Use App
‘லைஃப் இஸ் ப்யூட்டிஃபுல் !’ - கவிதை
‘லைஃப் இஸ் ப்யூட்டிஃபுல் !’ - கவிதை

வெய்யில் - ஓவியம்: கார்த்திகேயன் மேடி

பிரீமியம் ஸ்டோரி
‘லைஃப் இஸ் ப்யூட்டிஃபுல் !’ - கவிதை

நீங்கள் பார்த்துக்கொண்டிருக்கும் நீலப்படத்தில்
சன்னமாக எரியும் குண்டு பல்பு நான்
சகிக்க முடியாத சாராயக்கடையின் கனத்த கூரையைத்
தாங்கிக்கொண்டிருக்கும் தோலுரிந்த சவுக்குமரம் என் தந்தை
பிரியாணிப் பொட்டலம் சுற்றிய நாளிதழில்
கைப்பை திருடர்கள் பற்றிய செய்திக்குள்
மூச்சிரைக்க ஓடும் நிழல் அம்மாவுடையது
பேருந்துகளில் விற்கப்படும் அகரவரிசைப் புத்தகத்தில்
ஆப்பிளுக்கு அருகிலிருக்கும் அழகிய பூனை என் தங்கை
நீங்கள் நினைப்பதுபோல் அல்ல
இது மகிழ்ச்சியான ஒரு குடும்பத்தின் கதைதான்
இதமான பனிப்பொழிவோடு டிசம்பர் பிறந்தது
இளஞ்சிவப்பு நிற கிறிஸ்துமஸ் நட்சத்திரத்தை
சவுக்குமரத்தின் நெற்றியில் கட்டினார்கள்
கொஞ்சம் கவனித்துப்பாருங்கள்
அதற்குள் ஒளிரச் சிரித்துக்கொண்டிருக்கும் குண்டுபல்பு
என்னைப்போலவே இல்லை?
பூனைக்குட்டியின் விரல் பற்றியபடி
கேக் வாங்கிக்கொண்டிருக்கும் அந்த அம்மா
கடைக்காரரிடம் அப்படி என்னதான் எழுதச் சொல்கிறாள் அதில்?
‘லைஃப் இஸ் ப்யூட்டிஃபுல் !’
எனக்காக மூன்று முறை அதை உரக்கச் சொல்லுங்களேன்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு