Published:Updated:

நவீன ஓவியம் - புரிதலுக்கான சில பாதைகள் -3 - சி.மோகன்

நவீன ஓவியம் - புரிதலுக்கான சில பாதைகள் -3 - சி.மோகன்
பிரீமியம் ஸ்டோரி
நவீன ஓவியம் - புரிதலுக்கான சில பாதைகள் -3 - சி.மோகன்

பன்.இம்ப்ரஷனிஸம்பால் செசான்: நவீன ஓவியத்தின் தந்தை

நவீன ஓவியம் - புரிதலுக்கான சில பாதைகள் -3 - சி.மோகன்

பன்.இம்ப்ரஷனிஸம்பால் செசான்: நவீன ஓவியத்தின் தந்தை

Published:Updated:
நவீன ஓவியம் - புரிதலுக்கான சில பாதைகள் -3 - சி.மோகன்
பிரீமியம் ஸ்டோரி
நவீன ஓவியம் - புரிதலுக்கான சில பாதைகள் -3 - சி.மோகன்
நவீன ஓவியம் - புரிதலுக்கான சில பாதைகள் -3 - சி.மோகன்

மகால வாழ்வியக்கச் சலனத்தின் ஒரு கணத்தை, மனம் கிரஹித்து உணர்ந்த விதத்தில், ஒரு வரைமாதிரியின் அநாயாசமான தன்மையோடு, ஒளி மற்றும் வண்ணம் சார்ந்து ஓவியங்களாக்கிய இம்ப்ரஷனிஸவாதிகளின் அணுகுமுறையை பால் செசான் நிராகரித்தார். நவீன ஓவியமானது, நித்திய மதிப்புமிக்கதாக, புதிய அழகியல் அம்சங்களை உட்கொண்டிருக்க வேண்டுமென்று அவர் கருதினார். இம்ப்ரஷனிஸம் என்பது இன்னும் திட்பமானதாகவும், மிகத் துல்லியமான வெளியீட்டு அம்சங்களைக் கொண்டதாகவும் அமைய வேண்டுமென விரும்பினார். பிரயாசைப்பட்டார்; ஓவியத்திற்கான புதிய விதிகளை வகுத்துக்கொண்டார்; கண்டடைந்தார்; ஒரு காட்சியைக் கண் உள்வாங்கும் எல்லாப் பின்னங்களோடும் நுட்பங்களோடும் வடிவமைப்புகளோடும், பிரத்தியேகப் பார்வையோடும் ஓவிய வெளியில் உருவாக்க தொடர்ந்து முனைப்புடன் ஈடுபட்டார். அவர் தன்னுடைய படைப்புப் பொருளைப் பகுத்துப் பார்க்கவும் தொட்டு உணரவும் விரும்பினார். இந்தப் பயணத்தில் ‘பார்த்தல்’ என்பதைத் ‘தொடுதல்’ என்னும் ஓர் அழகிய மாயமாகக் கண்டடைந்தார்.

ஓவியப் பயணத்தின் தொடக்கத்தில் இம்ப்ரஷனிஸ பாணியில் படைப்பாக்கங்களில் ஈடுபட்ட செசான், அதன் போதாமையை உணர்ந்து, அதிலிருந்து விலகி, காட்சியை நுட்பமான பகுப்புகளாகப் பிரித்தறிந்து சித்திரிக்கும் ஒரு புதிய பாணிக்குத் தன்னைத் தீவிரமாக உட்படுத்தினார். பாரம்பரியக் கலை மரபில் உருவான மேதைகளின் படைப்புகள் பற்றிய அவருடைய ஆழ்ந்த அறிவு, வடிவம் மற்றும் கட்டமைப்பின் அழகியலை இம்ப்ரஷனிஸம் இழந்திருப்பதை அவருக்கு உணர்த்தியது. அதை மீண்டும் கைப்பற்றும் முனைப்பு கொண்டார். இதன் காரணமாக, 19-ம் நூற்றாண்டின் பிற்பாதியில் உருவான இம்ப்ரஷனிஸ இயக்கத்துக்கும், 20-ம் நூற்றாண்டின் தொடக்கத்தில் உருவான புதிய சிந்தனைகளுக்கும் தேடல்களுக்கும் புதிய ஓவிய பாணிகளுக்கும் ஒரு பிணைப்பாகவும் கலை ஆளுமையாகவும் திகழ்ந்தார். அவரைத் தொடர்ந்து உருவான ஓவிய ஆளுமைகளான மத்தீஸ் மற்றும் பிக்காஸோ போன்றோர், ‘எங்கள் எல்லோருக்குமே அவர் தந்தை’ என்றனர்.

பால் செசான், இயற்கையை நேருக்கு நேராக அணுகியபோது – இம்ப்ரஷனிஸவாதிகள் எவ்விதக் குறிக்கோளுமின்றி அணுகியதற்கு மாறாக – இயற்கையில் காணப்படும் கோடுகள், தளங்கள் மற்றும் வண்ணங்களை மிகவும் நுட்பமாகக் கண்டறிந்து, அவற்றை ஓவிய வெளியில் வெகு தீர்க்கமாகவும் அறிவார்த்தமாகவும் வடிவமைப்பதில் மிகவும் சிரத்தை எடுத்துக்கொண்டார். கோடுகள், தளங்கள் மற்றும் வண்ணங்களுக்கிடையேயான உறவுகளையும் அவற்றின் தனித்துவப் பண்புகளையும் கண்டறிந்தார். வண்ணங்களும் அவற்றின் பல்வேறு சாயைகளும் காட்சியைப் புலப்படுத்துவதில் வெவ்வேறு மதிப்புகள் கொண்டிருப்பதை அறிந்தார். இதமான வண்ணங்களைப் பின்னோக்கி நகர்த்தியும், அழுத்தமான வண்ணங்களை முன்னோக்கி நகர்த்தியும் சூழலின் மாயத்தை வசப்படுத்தினார்.

நவீன ஓவியம் - புரிதலுக்கான சில பாதைகள் -3 - சி.மோகன்

ஒட்டுமொத்த விகடனுக்கும் ஒரே ஷார்ட்கட்!

பால் செசான், அவருடைய வீட்டுக்கு அருகில் இருந்த புனித விக்டோரியா மலையை வெவ்வேறு கோணங்களில், தட்பவெட்ப நிலைகளில் பல்வேறு ஓவியங்களாகத் தீட்டியிருக்கிறார். தன்னுடைய படைப்புப் பொருளை வெவ்வேறு காலகட்டங்களில் மீண்டும் மீண்டும் மறு உருவாக்கம் செய்வதை, அவர் ஒரு கலைப் பயிற்சியாகத் தொடர்ந்து மேற்கொண்டு வந்திருக்கிறார்.

இந்த ஓவியத்தின் பிரதான காட்சி வெளி, ஓவிய வெளிக்கு அப்பாலும் முன்னும் பின்னுமாக நீட்சி பெற்றிருக்கிறது. ஓவிய வெளிக்குள் சாலைகள், நிலங்கள், வீடுகள், பள்ளத்தாக்கு, பாலம், பிரதானமான மலை எனப் பல்வேறு காட்சிக் கூறுகள் அதனதன் தன்மைக்கேற்பவும் அமைப்புக்கேற்பவும் உள்ளடங்கியிருக்கின்றன. முன்புல மற்றும் பின்புல மேடு பள்ளங்களை அல்லது காட்சித் தளங்களைக் கட்டமைத்திருக்கும் விதத்தில், படைப்பின் பிரதானமான மிகப் பெரிய மலையானது, அருகாமையிலும் தொலைவிலும் இருப்பதான ஒரு மாயத்தை உருவாக்கியிருக்கிறார்.

ஒரு நிலக் காட்சியின் மாறுபட்ட தளங்களைப் பல்வேறு வடிவங்களாகப் பகுத்துப் பார்த்து, அழுத்தமான மற்றும் இதமான வண்ணங்களாலும் அவற்றின் சாயைகளாலும் துண்டுதுண்டாகவும் அதே சமயம் ஓர் இசைமையோடும் இந்தப் படைப்பு கட்டமைக்கப்பட்டிருக்கிறது. இதை வண்ணங்களின் அலாதியான கட்டுமானம் எனக்கொள்ளலாம். அதன் காரணமாகவே, அவருடைய முதிர்ச்சியும் மேதமையுமிக்க படைப்பு
களில் ஒளிரும் அரூப குணம் இவ்வோவியத்தில் சுடர்வதைக் காணலாம். காட்சியின் யதார்த்தத்திலிருந்து விடுபட்டு, படைப்பு தனதான யதார்த்தத்தை உட்கொண்டிருப்பதை அறியலாம்.

இந்த ஓவியத்தையும், பால் செசானின் படைப்புக் கோட்பாட்டையும், அவர் வகுத்துக்கொண்ட புதிய விதிகளையும், அழகியல் அணுகுமுறையையும் நன்கு அறிய, சக ஓவியருக்கு அவர் எழுதிய ஒரு கடிதக் குறிப்பு உதவும்:

“இயற்கையைக் கோள வடிவமாகவும் உருளை வடிவமாகவும் கூம்பு வடிவமாகவும் அணுக வேண்டும். அதன் ஒவ்வொரு தளத்தையும், தளத்தின் ஒவ்வொரு பக்கத்தையும் சரியான முறையில் அணுகுவதன் மூலமே படைப்பின் இலக்கை நோக்கி அதை நகர்த்த முடியும். தொடுவானத்துக்கு இசைவாக அமையும் இணைகோடுகள் அகன்றதோர் பரப்பை வெளிப்படுத்துகின்றன. அது இயற்கையின் ஒரு பகுதி. அந்தத் தொடு
வானத்துக்கு செங்குத்தாக அமையும் கோடுகள் காட்சிக்கு அடர்த்தியை அளிக்கின்றன. ஆனால் நம்மைப் பொறுத்தவரை, இயற்கையானது அதன் புறத்தோற்றத்தைவிடவும் ஆழமானது. அடர்த்தியானது. அதைக் காட்சிப்படுத்த நாம் ஒளியின் அதிர்வுகளில் கவனம் செலுத்த வேண்டும். சிவப்பு வண்ணங்களாலும் மஞ்சள் வண்ணங்களாலும் அதற்கு ஒளியூட்ட வேண்டும். போதுமான அளவிலான நீலம், காற்றின் தன்மையை வசப்படுத்த உதவும்.”

நவீன ஓவியம் - புரிதலுக்கான சில பாதைகள் -3 - சி.மோகன்

செசானுடைய இந்தக் குறிப்பு, ‘புனித விக்டோரியா மலை’ ஓவியத்தோடு நாம் நெருக்கமாக உறவுகொள்ள வழிகாட்டும்.

தீர்க்கமான கோடுகள், நிலக் காட்சியில் உள்ளுறைந்திருக்கும் பல்வேறு தளங்களைத் துல்லியமாகப் பகுத்தறியும் அணுகுமுறை, வண்ணங்களின் குணாம்சங்கள், ஓவிய வெளியின் வடிவம் மற்றும் கட்டமைப்பு, புதிய அழகியல், எளிமை மற்றும் செய்நேர்த்தி, அரூபத்தின் தொனி எனப் புதிய பாணியில் செசான் தன் படைப்புகளை வெகு சிரத்தையாக உருவாக்கியிருக்கிறார். அவருடைய படைப்புப் பொருள் இம்ப்ரஷனிஸத்தன்மை கொண்டது என்றாலும் அவருடைய ஓவிய அணுகுமுறை முற்றிலும் புதியது. செறிவானது. தீர்க்கமானது. இந்த பாணியே பின் - இம்ப்ரஷனிஸம் என அறியப்பட்டது.

‘சீட்டாட்டக்காரர்கள்’ என்ற அவருடைய இன்னொரு பிரசித்திபெற்ற ஓவியத்தைப் பார்க்கலாம். இதன் படைப்புப் பொருளையும் அவர் வெவ்வேறு கால கட்டங்களில் ஐந்துக்கும் மேற்பட்ட முறை மறுஉருவாக்கம் செய்திருக்கிறார். ஒரே பொருளை மீண்டும் மீண்டும் படைத்துப் பார்க்கும் அவருடைய தீவிர அணுகுமுறையும் மனோபாவமும் ஓவிய ஆக்கத்தில் புதிய சாத்தியங்களைக் கண்டடைய, அவருக்குப் பெரிதும் உதவியிருக்கின்றன.

இரண்டு சாதாரணமான தொழிலாளர்கள், எதிரெதிராக அமர்ந்துகொண்டு, தங்களுடைய சீட்டாட்டத்தில் ஆழ்ந்து ஈடுபட்டிருக்கிறார்கள். ஒயின் பாட்டிலில் பிரதிபலிக்கும் ஒளி ஓவியத்தின் மைய அச்சாக அமைந்திருக்கிறது. ஓவியத்தின் கட்டமைப்பு, வடிவவியல் சார்ந்த செறிவையும் ஒழுங்கமைவையும் கொண்டிருக்கிறது. இட மற்றும் காலச்சூழல் வசப்படுத்தப்பட்டிருக்கிறது. காலம் நிலைத்ததொரு பரிமாணமாக அமைந்து, ஒரு காலாதீதச் சூழலை மாயமாய் கைப்பற்றியிருக்கிறது.

வாழ்வியல் சலனத்தின் ஒரு கணப் பதிவு என்ற வகையில் இந்த ஓவியப் பொருள் இம்ப்ரஷனிஸத்தன்மை கொண்டது என்றாலும், இம்ப்ரஷனிஸ பாணியின் அநாயாசமான வரைமாதிரித் தன்மை முற்றிலுமாகப் புறக்கணிக்கப்பட்டு, வெளியீட்டில் பூரணத்துவம் பெற்றிருக்கிறது. வண்ணத்தின் மீதான லகுவான, அர்த்தபூர்வமான அணுகுமுறை, அழுத்தமான தூரிகைத் தீட்டல்கள், வடிவவியல் சார்ந்த செறிவான கட்டமைப்பு என ஒரு புதிய ஓவியப் பாதையை செசான் வகுத்துக் கொடுத்திருக்கிறார். இவ்வோவியம் உட்கொண்டிருக்கும் அடர்த்தியும் செறிவும் ஆற்றலும் ஈர்ப்புவிசையும் நயங்களற்ற இம்ப்ரஷனிஸ பாணிக்கு அப்பாற்பட்டு நித்திய மதிப்புமிக்க புதிய அழகியலை வடிவமைத்திருக்கிறது. அதேசமயம், மரபான ஓவியங்களில் காணப்படும் மையப்பார்வை, அலங்காரங்கள், குறுங்கதையாடல் போன்ற அம்சங்களை நிர்தாட்சண்யமாகப் புறக்கணித்திருக்கிறார். படைப்பின் மெய்யான சாரத்தைக் குலைக்கும் எந்தவொரு அம்சத்திலும் செசான் அக்கறை காட்டியது இல்லை.

நவீன ஓவியம் - புரிதலுக்கான சில பாதைகள் -3 - சி.மோகன்



செசானுடைய தொடர் வரிசை ஓவியங்களில் மிகவும் நவீனமானது என்று கருதத்தக்கது ‘குளிப்பவர்கள்’ வரிசை. உருவங்களின் இசைமையான தொகுதியை, இயற்கையோடு இணைப்பதென்பதை அவர் எப்போதுமே படைப்புப் பொருளாகக் கையாள்வதில் ஆர்வம் கொண்டவராக இருந்திருக்கிறார்.

இந்த ஓவியத்தில் நிர்வாணப் பெண் உடல்களின் அளவானது, உடலமைப்பிலும், தோற்றப்பாங்கிலும் குறைக்கப்பட்டு மிகவும் நளினமாக ஓவியப் பரப்பில் கட்டமைக்கப்பட்டிருக்கிறது. உருவச் சித்திரிப்பிலும் அரூபத்தின் சாயலை எட்டுவதற்கான ஒரு முன்னோடி முயற்சி இது. இந்த ஓவியத்தில் இயற்கையின் சித்திரிப்பு அரூபரீதியான வடிவமைப்பையே பிரதானமாகக் கொண்டிருக்கிறது. இந்தத் தன்மை, ஆழ்ந்த மன அதிர்வையும் அடர்த்தியையும் படைப்புக்குத் தந்திருக்கிறது.

ஓவியப் படைப்பை நிரந்தர மதிப்புமிக்கதாகக் கோடுகள், வண்ணங்கள், வடிவம், கட்டமைப்பு சார்ந்து பூரண அழகியல் அம்சங்களோடு உருவாக்க அவர் மேற்கொண்ட அதிதீவிரப் பிரயாசைகளின் மூலமாகத்தான், 20ஆம் நூற்றாண்டின் தொடக்கத்தில் பல்வேறு கலை இயக்கங்கள் மலர்ந்து செழித்தன. அவை எல்லாமே பொதுவாக எக்ஸ்பிரஷனிஸம் என அறியப்பட்டன.

படைப்புப் பொருளின் வடிவமைப்பை நுட்பமாகப் பகுத்துப் பார்த்து, ஓவிய வெளியில் வடிவவியல் சார்ந்து கட்டமைக்கும் அவருடைய தீட்சண்யமான கலை அணுகுமுறைதான், பின்னர் க்யூபிஸ இயக்கம் உருவாகவும் முகாந்திரமாக அமைந்தது.

நவீனத்துவ அழகியலும் செவ்விய அழகியலும் அற்புதமாக முயங்கிய கலை ஆளுமையாக செசான் திகழ்ந்தார். இத்தகைய கலை ஆளுமையில் உருவான ஓவியங்கள், அடுத்த கட்டப் பாய்ச்சல்களுக்கு ஆதாரமாக அமைந்ததால்தான், அவர் நவீன ஓவியத்தின் தந்தை எனப் போற்றப்படுகிறார். நவீனக் கலை உலகின் பெருமிதமாக அவர் என்றென்றும் கொண்டாடப்படுவார்.

இக்காலகட்டத்தில்தான், ஓவியக் கலை வெளியில் ஒரு மகத்தான சக்தி, எவ்விதக் கவனிப்புமின்றி, ஒளிரத் தொடங்கியது. அந்த ஒளிதான், உள்ளார்ந்த தகிப்பிலும் உணர்ச்சிக் கொந்தளிப்பிலும் கலை நுட்பங்களோடு தன் படைப்புகளை உருவாக்கிய அபூர்வமான கலை ஆளுமையான வின்சென்ட் வான்கா எனும் சூரியக் குழந்தை.