Published:Updated:

டோரா குட்டியும் செல்லம்மா பாட்டியும்!

டோரா குட்டியும் செல்லம்மா பாட்டியும்!
பிரீமியம் ஸ்டோரி
டோரா குட்டியும் செல்லம்மா பாட்டியும்!

பி.விஜயலட்சுமி - ஓவியம்: ப.செல்வம்

டோரா குட்டியும் செல்லம்மா பாட்டியும்!

பி.விஜயலட்சுமி - ஓவியம்: ப.செல்வம்

Published:Updated:
டோரா குட்டியும் செல்லம்மா பாட்டியும்!
பிரீமியம் ஸ்டோரி
டோரா குட்டியும் செல்லம்மா பாட்டியும்!

ந்து வயதான டோராவுக்கு காமிக்ஸ் என்றால் உயிர். அதைவிட செல்போன் கேம்ஸ் என்றால் கேட்கவே வேண்டாம். சோறு, தண்ணீர் இல்லாமல் விளையாடுவாள். கேண்டி கிரஷ், டெம்பிள் ரன், ஆங்க்ரி பேர்ட்ஸ் இப்படியே செல்போன், டேப்லட்டில் இருக்கும் எல்லா கற்பனை விளையாட்டுகளுக்கும் அடிமையாகிப் போனாள் டோரா.

டோரா குட்டியும் செல்லம்மா பாட்டியும்!

டோராவின் அப்பா, ஒரு சயின்ட்டிஸ்ட். அம்மா, ஒரு டாக்டர். அப்பா ஆராய்ச்சிக் கூடமே    பழியென்று கிடந்தால், அம்மா பேஷன்ட்களுடனேயே தன்னுடைய ஒருநாளின் அதிக நேரத்தைச் செலவிடக்கூடியவள். அதனாலேயே, தனிமையை விரட்ட செல்போன் விளையாட்டுகளை விளையாட்டாக விளையாட ஆரம்பித்த டோரா, அவற்றினுள் மூழ்கிப் போக ஆரம்பித்தாள்.

இவை எதுவும் தெரியாத அவளின் தாய் தந்தையோ ஹாயாக தங்களது வேலையே கதியென்று இருந்தனர். விர்ச்சுவல் விளையாட்டுகளில் ஆர்வம் அதிகரிக்க, அதிகரிக்க, டோராவுக்குப் படிப்பின் மீதான ஆர்வம் குறைந்துகொண்டே போனது. பள்ளியில் முதல் மதிப்பெண் பெறும் மாணவியாக இருந்த டோரா, குறைந்தபட்ச தேர்ச்சி மதிப்பெண் பெறுவதே கடினம் என்ற நிலைமைக்குத் தள்ளப்பட்டாள்.

ஆசிரியர்கள் எத்தனையோ முறை அழைப்பு விடுத்தும் டோராவின் அப்பா அம்மாவுக்குப் பள்ளிக்குச் சென்று, டோராவுக்கு  அப்படி என்னதான் பிரச்னை என்று கேட்க நேரமில்லை. அப்படிப்பட்ட ஒருநாளில்தான் டோராவின் தூரத்து உறவுப் பாட்டியான செல்லம்மா, அவர்களது வீட்டுக்கு விருந்தாளியாக வந்து சேர்ந்தார்.

ஒட்டுமொத்த விகடனுக்கும் ஒரே ஷார்ட்கட்!

டோரா குட்டியும் செல்லம்மா பாட்டியும்!



டோராவின் அப்பாவும் அம்மாவும் பாட்டியை அனுசரணையாக உபசரித்தபோதும், குழந்தையிடம் மட்டும் ஏதோ ஒரு வெறுமை நிலவுவதை அந்த அனுபவம் நிறைந்த பாட்டி கண்டுபிடித்துவிட்டார். எந்நேரமும் செல்போனும் கையுமாக இருந்த டோராவுக்குப்  பிரச்னை அவளது அம்மா அப்பாதான் என்பதையும் கண்டறிந்தார் பாட்டி.

குழந்தையிடம் நேரடியாகச் சொல்லிப் புரியவைக்கமுடியாது; முதலில் டோராவின் அப்பா அம்மாவைத்தான் திருத்த வேண்டும் என்று டோராவின் அப்பாவையும், அம்மாவையும் உட்காரவைத்துப் பேசி, டோராவின் தனிமையைப் புரியவைத்தார் பாட்டி. அப்போதுதான், அவளது நிலையைப் புரிந்துகொண்ட பெற்றோர், அதிர்ச்சியின் உச்சிக்கே சென்றுவிட்டனர். டோராவின் டாக்டரம்மா, அவளுடன் கூடவே நேரம் செலவழிக்க ஆரம்பித்தபோதும், விர்ச்சுவல் விளையாட்டில் டோராவுக்கு இருந்த மயக்கத்தை அவரால் போக்கமுடியவில்லை.

டோரா தன் தனிமையைப் போக்க ‘விர்ச்சுவல் கேம்ஸ்’ உலகுக்குள் சென்று அங்கேயே சிக்கிக் கிடக்கிறாள் என்பதையும், அவளைச் சாதாரணமாக மீட்டெடுக்க முடியாது என்பதையும் பெற்றோரும் செல்லம்மா பாட்டியும் புரிந்துகொண்டனர். உடனடியாக இதற்கு ஓர் உபாயம் கண்டுபிடித்த செல்லம்மா பாட்டி, அதை டோராவின் அப்பாவிடம் சொன்னார். சயின்ட்டிஸ்ட்டான டோராவின் அப்பாவுக்கு இந்த ஐடியா பிடித்துப்போயிற்று.

அன்றிரவு, டோராவுக்குப் பிடித்த நெய் சப்பாத்தியும், காய்கறிக் குருமாவும் செய்து சாப்பிடக் கொடுத்தார் செல்லம்மா பாட்டி. அவளோ அதை ருசித்துச் சாப்பிடாமல், ஜாம்பிஸ் விளையாட்டில் மூழ்கியபடியே  சாப்பிட்டு முடித்து, தூங்கச் சென்றுவிட்டாள்.  
 
நல்ல தூக்கத்தில் அவள் மூழ்கிப்போனபோது, ஒரு வெற்றிடத்தில் டோரா தனியாக நின்றுகொண்டு, கேண்டி ஒன்றைச் சுவைத்துச் சாப்பிட்டுக்கொண்டிருக்கிறாள். அப்போது திடீரென்று அந்த வெற்றிடத்தில் சூரியகாந்திச் செடி ஒன்று முளைத்து, சூரியன்களை வெளிவிடத் தொடங்குகின்றது. சுற்றிலும் வெண்ணெய் எறியும் செடிகளும், காய்களைத் தூக்கியெறியும் செடிகளும் முளைவிடத் தொடங்குகின்றன. உடனடியாகக் குஷியான டோரா சூரியன்களைக் கையில் பிடித்தும், வெண்ணெய் செடிகளில் இருந்து வெண்ணெயை வழித்துச் சாப்பிட்டும் ஜாலியாகிறாள். அப்போது, ஒரு கொடூரமான சத்தம். என்னவென்று பார்த்தால்,  கூட்டம் கூட்டமாக ஜாம்பிக்கள் அவளைத் துரத்தத் தொடங்குகின்றன.

பயந்துபோன டோரா அங்கிருந்து ஓட ஆரம்பிக்கிறாள். ஓடிக்கொண்டிருக்கும்போது, ஓர் ஆறு அவளது வழியில் குறுக்கிடுகிறது. அதை வேகமாகத் தாண்டிக் கடக்கும் டோராவுக்கு அடுத்த ஆபத்து, அந்த ஆற்றின் அக்கரையில் காத்துக்கிடக்கிறது. ஒரு கரிய, பெரிய பூதமொன்று டோராவை வெறித்தனமாகத் துரத்தவும், அவள் மீண்டும் ஓடுகிறாள். வழியில் கிடைக்கும் பொற்காசுகளையும் சேகரித்துக்கொள்ளும் டோரா, ஓடிஓடிக் களைத்துப்போய் ஒரு கோயிலைச் சென்றடைகிறாள். அங்கொரு பெரிய தளத்தில் வரிசையாகக் கட்டம் கட்டமாக இருக்கிறது. டோரா சரியாக அந்தக் கட்டத்தில் சென்று நின்றதும் அவளைச் சுற்றி சாக்லேட் மற்றும் கேண்டி மழை பொழிகிறது. மறுபடியும் மகிழ்ச்சியடையும் டோரா, ஒரு சிவப்பு வெள்ளைக் கேண்டியைச் சாப்பிட ஆரம்பிக்கும்போதே, அவள் ஓர் உண்டிவில்  கயிற்றில் கட்டப்படுகிறாள். ‘என்னை விடுங்க... என்னை விடுங்க’ என்று டோரா கத்திக்கொண்டிருக்கும்போதே, ஒரு சிவப்பு நிற குண்டுப் பறவையும், மஞ்சள் நிற முக்கோணப் பறவையும் அவளின் இரண்டு கைகளையும் பிடித்துக்கொண்டு வானத்தில் பறக்கின்றன. 

டோரா குட்டியும் செல்லம்மா பாட்டியும்!

வேகமாகத் தலைசுற்ற வானத்தில் பறக்கும் டோரா, வேகமாகப் பயணிக்கிறாள். இரண்டு பறவைகளும் ஒரு பன்றிக் கூட்டத்தில் மோதி அவற்றை அழித்துவிடுகின்றன. தரையில் மோதப்போகிறோம் என்று அழுதுகொண்டே... டோரா வானத்திலிருந்து கீழ் நோக்கிப் பயணிக்கும்போதே, அவளை ஒரு மான்ஸ்டர் பிடித்துக்கொண்டே வரிசையாக வானத்திலிருந்து இறங்கும் ஐஸ்கட்டிகளில் தூக்கிப் போட்டுப் பிடிக்கிறது. ஐஸ்கட்டிப் படிகளில் இருந்து நழுவி மீண்டும் கீழே விழும் டோரா, பேசும் பூனை ஒன்றின் கைகளில் சிக்கிக்கொள்கிறாள். அது அவளைக் குளிப்பாட்டி, ஆடை அணிவித்து, ரெண்டு இட்லியைப் பிய்த்து வாயில் ஊட்டும்போதே, திடீரென்று மாயமாகும் டோரா, தர்பூசணி, வாழைப்பழம் உள்ளிட்ட பழங்கள் எல்லாம் மழையாகக் கொட்டுமிடத்தில் சிக்கிக்கொள்கிறாள்.

கத்தியொன்று வேகமாக அந்தப் பழங்களை நறுக்கும்போதே, அதிலிருந்து லாகவமாகத் தப்பிக்கும் டோராவை நோக்கி அணுகுண்டு ஒன்று பறந்து வருகின்றது. அய்யய்யோ என்று அலறிய டோரா, கண்களைத் திறந்து பார்த்தால் பாட்டியும், அம்மா, அப்பாவும் அவளைச் சுற்றி நிற்கின்றனர். ‘பாட்டீ... இனிமே நான் செல்போனில் கேம்ஸே விளையாட மாட்டேன். கனவுக்கே இவ்வளவு பயம்னா, அதெல்லாம் நிஜ வாழ்க்கையில நடந்தா அவ்வளவுதான். இனி நான் சமத்தா படிப்பேன்’ என்று வேகமாகப் புத்தகப்பையை நோக்கி நடப்பவளைப் பார்த்துக்கொண்டே சிரித்தப்படி டோராவின் அம்மா, அப்பாவிடம் சொல்கிறார் செல்லம்மா பாட்டி. ‘பார்த்தீங்களா... அவளே திருந்திட்டா. அதுக்குதான் உன்னை அவளோட கனவுல அந்த விளையாட்டுகளெல்லாம் வந்து பயமுறுத்துற மாதிரியான மாத்திரை ஒண்ணை கண்டுபிடிக்கச் சொன்னேன். இப்போ, அவளே சரியா புரிஞ்சுக்கிட்டா பாரு. இனியாவது குழந்தைகிட்ட ஒட்டுதலா இருங்க’ என்று சொல்லிய பாட்டியிடம் ‘நிச்சயமா டோராவை தனியா விடமாட்டோம்’ என்று கோரஸாகச் சொன்னார்கள், அம்மாவும் அப்பாவும்!