Published:Updated:

சொல்வனம்

சொல்வனம்
பிரீமியம் ஸ்டோரி
சொல்வனம்

படம்: அருண் டைட்டன்

சொல்வனம்

படம்: அருண் டைட்டன்

Published:Updated:
சொல்வனம்
பிரீமியம் ஸ்டோரி
சொல்வனம்

பூ

யாருமற்ற தீவில்
அத்தனை அழகாய்
ஒரு பூ
பூத்திருக்கிறது...

கொய்து சூட‌
கூந்தல்களில்லை
என்பது குறித்து
அதற்குக் கவலைகளேதும் இல்லை...

விண்ணை நோக்கி வளர்ந்திருக்கிறது
ஆதலால்
கிளையில் ஒட்டியிருக்கும்வரை
அதன் உருவத்தை
கடல் நீரில் அது
பார்த்திடவே போவதில்லை...

வயோதிகம் முற்றி
கிளையிலிருந்து விழுகையில்
அதன் புலன்கள்
அடைபட்டிருக்கும்...

ஆக,
அதற்கு
அதன் உருவம் குறித்த‌
யாதொரு பிரக்ஞையும் எப்போதும் இல்லை...

இதையெல்லாம் சொல்லிவிட்ட பிறகு
கண்ணாடிகள்
முகம் பார்க்க இல்லை
என்று சொன்னால்
நம்பிவிடவா போகிறீர்கள்?

 - ராம்பிரசாத்

சவ ஊர்வலம்

யாருமற்ற தன் சவ ஊர்வலத்தில்
தானே நடனமாடிக் கடக்கும்
பழுத்த இலை.

 - நாகராஜ சுப்ரமணி

அம்மா

கொடியில் காயும்
குழந்தையின் துணிகளை
வெயில் படாமல்
சிரத்தையுடனே
பார்த்துக்கொள்கிறது
அருகில் காயும்
அம்மாவின் புடவை.

- ராமதுரை ஜெயராமன்

சொல்வனம்

இன்று

விஷேச நாட்களிலும்
ஒருவரும் வரவில்லை
சிறிய துணிக்கடைகளுக்கு
பின்மதிய நேரங்களில்
தூக்கத்தை கட்டுப்படுத்துகிறான்
செருப்புக்கடை சேல்ஸ்மேன்
கதர்கடை விற்பனைப் பிரிவில்
துடைத்துக்கொண்டே
எதிர்பார்க்கிறான் வாடிக்கையாளரை
எதிரில் இருக்கும்
பல்பொருள் அங்காடியை
ஏக்கமாய் பார்க்கிறான்
மளிகை கடைக்காரன்
குவிந்திருக்கும்
மசால் வடைகள்
நஷ்டக்கணக்கையே காட்டியது
டீக்கடைகாரருக்கு
இன்றும் நேற்று போல்
இருக்கக்கூடாதென நினைத்து
கதவைத் திறக்கிறார்கள்
வேண்டுதல்களுடன்
விற்பனையாளர்கள்!

- மணிகண்டபிரபு

ஒட்டுமொத்த விகடனுக்கும் ஒரே ஷார்ட்கட்!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism