Published:Updated:

வந்துவிட்டது ஜி.எஸ்.டி... தயார் ஆகவில்லை தமிழ்நாடு!

வந்துவிட்டது ஜி.எஸ்.டி... தயார் ஆகவில்லை தமிழ்நாடு!
பிரீமியம் ஸ்டோரி
News
வந்துவிட்டது ஜி.எஸ்.டி... தயார் ஆகவில்லை தமிழ்நாடு!

வந்துவிட்டது ஜி.எஸ்.டி... தயார் ஆகவில்லை தமிழ்நாடு!

ஜி.எஸ்.டி எனப்படும் சரக்கு மற்றும் சேவை வரி, ஜூலை முதல் தேதியிலிருந்து அமலுக்கு வர இருக்கிறது. இதற்காக நள்ளிரவில் சிறப்புக் கூட்டம் நடத்தத் தயாராகிவருகிறது நாடாளுமன்றம். ஆனால், ரயில் புறப்படும் வரை பிளாட்பாரத்துக்கு வராத பயணி போலவே இருக்கிறது தமிழக அரசு. தமிழகத்தில் மத்திய சுங்கம், கலால் மற்றும் சேவை வரித் துறையுடன் இணைந்து ஜி.எஸ்.டி-யை அமல்படுத்தப்போவது தமிழ்நாடு வணிகவரித் துறை. ஆனால், ‘‘இந்த வரி முறை மாற்றத்துக்கு இன்னும் முழுமையாக நாங்கள் தயாராகவில்லை’’ என்கிறார்கள் தமிழ்நாடு வணிகவரித் துறை அதிகாரிகள்.

தமிழக அரசுக்கு சுமார் 70 சதவிகித வரி வருவாயை வசூலித்துத்தருவது தமிழ்நாடு வணிகவரித் துறை. ஜி.எஸ்.டி நடைமுறைக்கு வர இருப்பதால், வணிகவரித் துறை பணியாளர்களுக்குப் பல்வேறு பயிற்சிகள் அளிக்கப்பட்டுள்ளன என்றபோதிலும், பல்வேறு பிரச்னைகள் குறித்து வணிகவரித் துறை அலுவலர்கள் தெரிவிக்கும் தகவல்கள் கவலை தருவதாகவே இருக்கின்றன. ஏற்கெனவே வருமானங்கள் குறைந்து, செலவுகள் வீங்கிப் போன தமிழக அரசை இது இன்னும் பலவீனத்தில் ஆழ்த்தும் அபாயம் இருப்பதாகவே பலரும் சொல்கிறார்கள்.

வந்துவிட்டது ஜி.எஸ்.டி... தயார் ஆகவில்லை தமிழ்நாடு!

‘‘மத்திய சுங்கம் மற்றும் கலால் சேவை வரித் துறை, ஜி.எஸ்.டி-யைச் சிறப்பாக அமல்படுத்துவதற்கான ஏற்பாடுகளைச் சில ஆண்டுகளுக்கு முன்பாகவே செய்ய ஆரம்பித்துவிட்டது. பணி விதிகளில் சிறப்புத் திருத்தங்கள், ஜி.எஸ்.டி-க்கான ஆவணங்களைத் தயார் செய்தல், கலால் அலுவலகத்துக்கான பயிற்சிகள் என பல்வேறு நடவடிக்கைகளை மேற்கொண்டு, தேவையான மாற்றங்களைச் செய்துவிட்டனர். ஆனால், அதுபோன்ற தயாரிப்புகளைத்  தமிழ்நாட்டில் மேற்கொள்ளாமல், ‘வரும்போது பார்த்துக்கொள்ளலாம்’ என்று மெத்தனமாக இருந்துவிட்டனர். சில மாதங்களுக்கு முன்பாகத்தான், பணியாளர்களுக்குப் பயிற்சி, வணிகர்களுக்கு விழிப்பு உணர்வு என்று சில நடவடிக்கைகள் இங்கு தொடங்கப்பட்டன. ஆனாலும், அவை போதுமானதாக இல்லை” என்கிறார் வணிகவரித் துறை அதிகாரி ஒருவர்.

இன்னொரு புறம், ‘ஜி.எஸ்.டி-யைச் சிறப்பான முறையில் அமல்படுத்துவதற்குத் தங்கள் துறையில் மிகப்பெரிய தடையாக இருப்பது, பணியாளர்கள் பற்றாக்குறைதான்’ என்கிறார்கள் வணிகவரித் துறையினர். ‘‘தமிழ்நாடு வணிகவரித் துறையில் அனுமதிக்கப்பட்ட மொத்தப் பணியிடங்கள் 9,750. ஆனால், பணியாளர்கள் மற்றும் அதிகாரிகள் என மொத்தம் 6,300 பேர் மட்டுமே உள்ளனர். கூடுதல் ஆணையாளர்கள் ஏழு பேர் இருக்க வேண்டிய இடத்தில், இரண்டு பேர் மட்டுமே உள்ளனர். இணை ஆணையர்கள் 20 பேர் இருக்க வேண்டிய நிலையில், 11 பேர் மட்டுமே உள்ளனர். 101 துணை ஆணையர்கள் இருக்க வேண்டிய நிலையில், 54 துணை ஆணையர்கள் மட்டுமே இருக்கிறார்கள். 140-க்கும் மேற்பட்ட உதவி ஆணையர் பணியிடங்கள் காலியாக உள்ளன. வணிகவரி அலுவலர் பதவியில் 190 பணியிடங் களும், துணை வணிகவரி அலுவலர் பதவியில் 160 பணியிடங்களும் காலியாகக் கிடக்கின்றன. இத்தனை பணியிடங்களைக் காலியாக வைத்துக்கொண்டு ஜி.எஸ்.டி-யை எப்படி அமலாக்கப்போகிறோம்’’ என்று பயத்தோடும், தயக்கத்தோடும் கேட்கிறார்கள், வணிகவரித் துறை பணியாளர்கள்.

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
வந்துவிட்டது ஜி.எஸ்.டி... தயார் ஆகவில்லை தமிழ்நாடு!

“இதுவரை தனித்துச் செயல்பட்டு வந்த நாங்கள், இனி மத்திய அரசுடன் இணைந்து ஜி.எஸ்.டி-யை அமல்படுத்தப்போகிறோம். வரிவிதிப்பு வட்டங்களின் எல்லைகளை மத்திய சுங்கம், கலால் மற்றும் சேவை வரித் துறையினர் வரையறுத்துவிட்டனர். ஆனால், எங்கள் துறையில் இன்னும் அது நடக்கவில்லை. தற்போது ஒரு வணிக வட்டத்தில் 4,000 முதல் 5,000 வரை வணிகர்கள் உள்ளனர். அதிகமான வணிகர்களைக்கொண்ட வட்டங்களில் சரியாக சேவை செய்ய முடியவில்லை. ஒரு வணிக வட்டத்துக்கு 1,500 வணிகர்கள் என வரையறை செய்யப்பட வேண்டும். துறை சீரமைப்பு மற்றும் மத்திய அரசு அதிகாரிகளுக்கு இணையாகப் பணி நிலைகளில் மாறுதல் செய்யப்பட வேண்டும். இவற்றையெல்லாம் செய்தால்தான், ஜி.எஸ்.டி-யைச் சிறப்பாகச் செயல்படுத்த முடியும்.

அதோடு போதுமான பணியாளர்களும், அதிகாரிகளும் இருக்க வேண்டும். ஆனால், உயரதிகாரிகள் முதல் அலுவலக உதவியாளர் வரை ஏராளமான பணியிடங்கள் காலியாக உள்ளன. இதனால், கணிக்கமுடியாத அளவுக்கு ஏற்கெனவே வரி இழப்பு ஏற்பட்டு வருகிறது. இத்தனை காலிப்பணியிடங்களை வைத்துக்கொண்டு ஜி.எஸ்.டி-யை எப்படி செயல்படுத்தப்போகிறோம் என்று தெரியவில்லை. இருக்கும் பணியாளர்களை வைத்துக்கொண்டு சமாளித்து விடலாம் என்று நினைக்கிறது அரசு” என்கிறார், வணிகவரித் துறை அதிகாரி ஒருவர்.

இது தொடர்பாக, தமிழக வணிகவரித் துறை அமைச்சர் கே.சி.வீரமணியிடம் கேட்டோம். “தமிழகத்தில் ஜி.எஸ்.டி-யை நடைமுறைப்படுத்துவதற்குத் தேவையான அனைத்து ஏற்பாடுகளையும் செய்துவிட்டோம். பணியாளர்களுக்கான பயிற்சிகளை அளித்துவிட்டோம். ஜி.எஸ்.டி முறையில், பணியாளர்களுக்கு வேலைகள் குறைகின்றன. எனவே, காலிப்பணியிடங்களால் ஜி.எஸ்.டி பாதிக்கப்படாது. வேலை குறைவதால், இருக்கிற வேலை போய்விடக்கூடாது என்ற கவலைதான் எங்களுக்குள்ளது. ஜி.எஸ்.டி அமலுக்கு வந்துவிட்டால் எல்லா பிரச்னைகளும் சரியாகிவிடும்” என்றார்.

- ஆ.பழனியப்பன்

வந்துவிட்டது ஜி.எஸ்.டி... தயார் ஆகவில்லை தமிழ்நாடு!

‘‘அரிசிக்கு ஐந்து சதவிகித வரி... தங்கத்துக்கு மூன்று சதவிகித வரி!’’

சென்னை கலைவாணர் அரங்கத்தில், ஜி.எஸ்.டி குறித்த கருத்தரங்கம் ஜூன் 25-ம் தேதி நடைபெற்றது. மத்திய வர்த்தகம் மற்றும் தொழில் துறை அமைச்சர் நிர்மலா சீதாராமன் பங்கேற்ற அந்தக் கூட்டத்தில், வணிகர் சங்கம் உட்பட பல்வேறு தரப்பினர் தங்கள் கருத்துகளைத் தெரிவித்தனர்.

நெல், அரிசி மொத்த வியாபாரிகள் சங்கத்தைச் சேர்ந்த மோகன், “பிராண்டட் பெயரில் விற்கப்படும் அரிசிமீது ஐந்து சதவிகிதம் வரி விதித்திருப்பது தவறு. அரிசி சார்ந்த உணவுகளையே சாப்பிடும் தென்னிந்திய மக்கள்மீது ஏற்றப்படும் சுமை இது. ஆடம்பரப் பொருளான தங்கத்துக்கு மூன்று சதவிகித வரி. ஆனால், அத்தியாவசிய அரிசிக்கு ஐந்து சதவிகித வரி. இதை ஏற்றுக்கொள்ள முடியவில்லை” என்று குமுறினார்.

திரைப்படச் சண்டைப் பயிற்சி இயக்குநர் ஜாகுவார் தங்கம், “வெள்ளிக்கிழமை கோடீஸ்வரராக இருப்பவர், படம் ரிலீஸ் ஆகி தோற்றுவிட்டால், சனிக்கிழமை தெருக்கோடிக்கு வந்துவிடுகிறார். 18 சதவிகித வரி, சினிமா துறையைப் பாதிக்கும்” என்றார்.

பிளாஸ்டிக் உற்பத்தியாளர்கள் சங்கத்தைச் சேர்ந்த சங்கர், “பிளாஸ்டிக் கழிவுகளுக்கும் 18 சதவிகிதம் வரி விதிப்பதால், இதை நம்பிப் பிழைப்பு நடத்தும் சாதாரண மக்கள் பாதிக்கப்படுவார்கள். பிளாஸ்டிக் மறுசுழற்சித் தொழில் முடங்கும். பிறகு எப்படி, மோடியின் ‘தூய்மை இந்தியா’ திட்டம் வெல்லும்?” என்றார்.

“பெட்டிக்கடையில் விற்கப்படும் கடலை மிட்டாய்க்கு 18 சதவிகித வரி. ஆனால் பீட்ஸா, பர்க்கருக்கு ஐந்து சதவிகித வரி. அப்படியென்றால், ஜி.எஸ்.டி-யால் பலன்பெறுபவர்கள் யார்?” என்று கேள்வி எழுப்பினார், தமிழ்நாடு வணிகர் சங்கங்களின் பேரமைப்பு தலைவர் விக்கிரமராஜா. 

“சிறிய அளவில் நெசவுத்தொழில் செய்பவர்களுக்கு, ஜி.எஸ்.டி சுமையாக இருக்கிறது” என்றனர் ஜவுளி வியாபாரிகள் சங்கத்தினர்.

இறுதியாக, மத்திய அமைச்சர் நிர்மலா சீதாராமன், ‘‘ஆண்டுக்கு 20 லட்சம் ரூபாய் வரை வியாபாரம் செய்பவருக்கு வரி இல்லை. ஆடை அலங்காரத்தின் மூலம் ஜவுளியின் மதிப்பு கூடுவதால், அதற்கு ஜி.எஸ்.டி வரி உண்டு. பிராண்டட் அரிசி எனும்போதே அங்கு மதிப்பு கூடுகிறது. எனவே, அதற்கு வரி விதிக்கப்பட்டுள்ளது. ஜி.எஸ்.டி-யால் விலைவாசி உயராது. மக்கள் தரும் வரி, அரசாங்கத்துக்குச் செல்கிறது. அந்த வரியை, நலத்திட்டங்கள் மூலம் மக்களுக்கே திருப்பித் தரப்போகிறோம். வரி கட்டினால்தானே நாடு வல்லரசாகும்” என்றார்.

- சே.த.இளங்கோவன்
படம்: வி.சீனிவாசுலு