Published:Updated:

மருத்துவக் கனவுக்குப் பூட்டு... இட ஒதுக்கீட்டுக்கும் வேட்டு...

மருத்துவக் கனவுக்குப் பூட்டு... இட ஒதுக்கீட்டுக்கும் வேட்டு...
பிரீமியம் ஸ்டோரி
News
மருத்துவக் கனவுக்குப் பூட்டு... இட ஒதுக்கீட்டுக்கும் வேட்டு...

நீட் தேர்வுக்கு மண்டியிட்ட தமிழக அரசு!

நீட் தேர்வு முடிவுகள், ஒருவழியாக வெளிவந்துவிட்டன. கல்வியாளர்கள் சொன்னது போலவே, பெரும்பாலான தமிழக மாணவர்கள் மருத்துவப் படிப்பில் சேர்வதற்கான தகுதி மதிப்பெண்ணைப் பெறவில்லை. தமிழகத்தில் 84 ஆயிரம் மாணவர்கள் நீட் தேர்வை எழுதினார்கள். இவர்களில் 15,206 பேர் தமிழிலும், மற்றவர்கள் ஆங்கிலத்திலும் தேர்வை எதிர்கொண்டார்கள். இவர்களில் 38 சதவிகிதம் பேர் மட்டுமே தேர்ச்சி பெற்றிருக்கிறார்கள். இதில் பெரும்பாலான மாணவர்கள் சி.பி.எஸ்.இ பாடத் திட்டத்தில் படித்தவர்கள். மெட்ரிக் மற்றும் அரசுப் பள்ளிகளில் படித்து அதிக மதிப்பெண் பெற்ற பெரும்பாலான மாணவர்கள் இந்தத் தேர்வில் வெற்றி பெறவில்லை. இவர்களில் பத்து சதவிகிதத்தினரே அதிகபட்ச மதிப்பெண் பெற்றுள்ளனர். டாப்-25 இடங்களில் தமிழக மாணவர்கள் ஒருவர்கூட இல்லை.

நீட் தேர்விலிருந்து தமிழகத்துக்கு விலக்கு அளிக்கும் வகையில் தமிழக அரசு இயற்றி அனுப்பிய இரண்டு சட்ட மசோதாக்களுக்கும் இதுவரை ஜனாதிபதி அனுமதி அளிக்கவில்லை. மத்திய அமைச்சர்கள், `அந்த மசோதாக்கள் ஏற்கும் நிலையில் இல்லை’ என்று வெளிப்படையாக அறிவித்துவிட்டார்கள். நமக்கான நியாயங்களைப் பேசியும், மத்திய அரசை வலியுறுத்தியும் அந்தச் சட்டங்களுக்கு அனுமதி பெறவேண்டிய தமிழக அரசு, நீட் தேர்வு முடிவுகள் வெளியானவுடன் மருத்துவக் கலந்தாய்வுக்கான தேதியைக் குறித்துவிட்டது. இத்துடன் குழப்பமான இன்னோர் அறிவிப்பையும் வெளியிட்டிருக்கிறார், சுகாதாரத் துறை அமைச்சர் விஜயபாஸ்கர். `கலந்தாய்வு நடைபெறும் நாளுக்குள் தமிழக அரசின் மசோதாக்களை ஜனாதிபதி ஏற்றுக்கொண்டு கையெழுத்திட்டால், +2 மதிப்பெண் அடிப்படையில் கவுன்சலிங் நடைபெறும்’ என்றும், `ஜனாதிபதி ஏற்றுக்கொள்ளாவிட்டால் நீட் மதிப்பெண் அடிப்படையில் கலந்தாய்வு நடக்கும்’ என்றும் அவர் கூறியிருக்கிறார். `நீட் தேர்வு மதிப்பெண் அடிப்படையில் மாணவர் சேர்க்கை நடந்தால், 85 சதவிகித இடங்கள் மாநில பாடத்திட்டத்தில் படித்த மாணவர்களுக்கும், 15 சதவிகித இடங்கள் சி.பி.எஸ்.இ போன்ற மத்திய பாடத்திட்டத்தில் படித்த மாணவர்களுக்கும் வழங்கப்படும்’ என்றும் அவர் தெரிவித்திருக்கிறார். இது தொடர்பாக அரசாணையும் வெளியிடப்பட்டிருக்கிறது.

மருத்துவக் கனவுக்குப் பூட்டு... இட ஒதுக்கீட்டுக்கும் வேட்டு...

இந்த ஒதுக்கீட்டுக்கு ஆதரவு இருந்தாலும், `நீட் தேர்வுக்கு விலக்கு கோரும் மசோதாவுக்கு அனுமதி பெற முடியாமல், தங்கள் தோல்வியை மறைக்கவும், மக்களைச் சமாதானப்படுத்தவுமே தமிழக அரசு இந்த ஒதுக்கீட்டு நாடகத்தை நடத்துகிறது’ என்ற விமர்சனமும் எழுந்துள்ளது.  ‘யாரோ ஒரு மாணவர் நீதிமன்றத்துக்குப் போகும்பட்சத்தில், இதற்குத் தடை விதிக்கப்படலாம்’ என்கிறார்கள் கல்வியாளர்கள். ஏற்கெனவே முதுகலை மருத்துவ மாணவர் சேர்க்கைக்கு நீதிமன்றம் தடை விதித்ததையும் அவர்கள் சுட்டிக்காட்டுகிறார்கள்.

நீட் தேர்விலிருந்து விலக்கு அளிக்கும் மசோதாவை மாநில அரசு நிறைவேற்றிய நிலையில், பெரும்பாலான மாணவர்கள், `தமிழகத்துக்கு நீட் வராது’ என்ற நம்பிக்கையில் அந்தத் தேர்வுக்கு விண்ணப்பிக்கவே இல்லை. சிறு வயதிலிருந்தே மருத்துவப் படிப்பைக் கனவாகக் கருதி, கடுமையாகப் படித்து +2வில் அதிக மதிப்பெண் பெற்றும், மாநில அரசை நம்பி நீட் தேர்வை எழுதாமல் விட்ட மாணவர்களுக்கு முதலமைச்சரும், சுகாதார அமைச்சரும் என்ன பதில் வைத்திருக்கிறார்கள்?

‘பொதுப்பள்ளிக்கான மாநில மேடை’ அமைப்பின் நிறுவனர் பிரின்ஸ் கஜேந்திரபாபு, தமிழக அரசு செய்த தவறுகளை விரிவாகக் குறிப்பிட்டுப் பேசினார். “2016-ம் ஆண்டில் இந்திய மருத்துவ கவுன்சில் சட்டத்தில் திருத்தம் செய்து, நீட் தேர்விலிருந்து ஓர் ஆண்டுக்கு விலக்களித்தபோது `நீட் தேர்வுக்கான பாடத்திட்டமும் மாநில பாடத்திட்டமும் வெவ்வேறாக இருக்கின்றன. அது மாணவர்களைப் பாதிக்கும். அதனால் விலக்கு அளிக்கப்படுகிறது’ எனக் குறிப்பிட்டிருக்கிறார்கள். கடந்த ஆண்டில் மாணவர்கள் பாதிக்கப்படக் கூடாது என நீட் தேர்வுக்கு விலக்களித்தவர்கள், இந்த ஆண்டு கவலைப்படாதது ஏன்? 2014-ம் ஆண்டு மருத்துவக் கல்வியை மேம்படுத்தும் நோக்கில் அமைக்கப்பட்ட பேராசிரியர் ரஞ்சன் ராய் சவுத்ரி தலைமையிலான வல்லுநர் குழு, `மாநில அரசுகள் விரும்பாதபட்சத்தில் அவர்களுக்கு விலக்கு அளிக்க வேண்டும்’ என்று சொல்லியிருந்தது. இதே கருத்தை சுகாதாரத் துறைக்கான நாடாளுமன்ற நிலைக்குழுவும் சொன்னது. 

2007-ம் ஆண்டில் தமிழ்நாடு அரசு நுழைவுத்தேர்வை ரத்துசெய்து இயற்றிய சட்டத்தை, மத்திய மனிதவள மேம்பாட்டுத் துறையும் சுகாதாரத் துறையும் `ஜனாதிபதி ஏற்று கையெழுத்திடலாம்’ எனப் பரிந்துரைத்துள்ளன. `இந்தச் சட்டம், மாநில நலனுக்காக பிரத்யேகமாக உகந்தது. இது மத்திய அரசுக்கு எதிரானதல்ல’ என்றும் குறிப்பிட்டிருக்கிறார்கள். ஆட்சி மாறினால் கொள்கைகள் மாறலாம். சட்ட விளக்கங்கள் மாறுமா? இவற்றைப் பற்றியெல்லாம் தமிழக முதலமைச்சரோ, சுகாதார அமைச்சரோ, எந்த இடத்திலும் பேசவில்லை” என்கிறார் பிரின்ஸ் கஜேந்திரபாபு.

`நீட் தேர்வு என்பது எம்.பி.பி.எஸ் சேர்க்கைக்கானது மட்டுமே’ என்று பலர் நினைக்கிறார்கள். ஆனால், மோசமான பல விளைவுகளுக்கு இது வழிவகுக்கும். கிராமப்புற மருத்துவமனைகளில் பணியாற்ற டாக்டர்களே வர மாட்டார்கள். அரசு மருத்துவமனைகளும் ஆரம்ப சுகாதார நிலையங்களும் சீரழிந்து போகும். ‘மருத்துவம், கல்வி போன்ற சேவைகளை அரசு கைவிட்டு தனியார் கையில் தர வேண்டும்’ என்பதுதான் உலக வர்த்தக அமைப்பின் கொள்கை. அந்தக் கொள்கைகளை சிரமேற்கொண்டு செயல்படுத்தும் மத்திய அரசு, ஏற்கெனவே கல்வியைத் தாரை வார்த்துவிட்டது. அடுத்து மருத்துவம்? அதற்கான ஏற்பாடுதான் நீட் தேர்வா?   

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
மருத்துவக் கனவுக்குப் பூட்டு... இட ஒதுக்கீட்டுக்கும் வேட்டு...

நீட் தேர்வு முடிவுகளால் ஏற்படும் வேறு அபாயங்களையும் சுட்டிக் காட்டுகிறார், சமூக சமத்துவத்துக்கான மருத்துவர்கள் சங்கத்தின் மாநில பொதுச்செயலாளர் டாக்டர் ரவீந்திரநாத்.

``வெவ்வேறு வினாத்தாள்கள் அடிப்படையில் தேர்வு நடத்திவிட்டு, அதுகுறித்த  முறையீடுகளுக்குக் காதுகொடுக்காமல் தேர்வு முடிவுகளை வெளியிட்டது மாணவர்களுக்கு இழைக்கப்பட்ட அநீதி. அதுமட்டுமின்றி, நீட் தேர்வு முடிவுகள் இட ஒதுக்கீட்டுக்கு முடிவுகட்டும் வகையில் அமைந்துள்ளன. மத்திய அரசு நிறுவனங்களில் 100 சீட் இருக்கிறதென்றால், 50.5 இடங்கள் பொதுவானவை. டாப் ரேங்க் எடுத்த எந்தப் பிரிவைச் சேர்ந்தவரும் இந்த இடங்களைப் பெறலாம். 15 சதவிகித இடங்கள் எஸ்.சி பிரிவுக்கும், 7.5 சதவிகித இடங்கள் எஸ்.டி பிரிவுக்கும், 27 சதவிகித இடங்கள் `ஓபிசி’ எனப்படும் இதர பிற்படுத்தப்பட்ட பிரிவினருக்கும் வழங்கப்படும். நீட் தேர்வு முடிவுகளில் இட ஒதுக்கீட்டுப் பிரிவினருக்குத் தனியாகப் பட்டியல் போட்டிருக்கிறார்கள். `பொதுப் பிரிவினர்’ என்பதை புதிதாக ‘இதர பிரிவினர்’ என மாற்றி இருக்கிறார்கள். எஸ்.சி பிரிவு மாணவர் ஒருவர், டாப் ரேங்க் எடுத்தாலும், முன்பு போல பொதுப் பிரிவில் போக முடியாது; ஒதுக்கீட்டில்தான் போக முடியும். 50.5 சதவிகித இடங்கள் இடஒதுக்கீட்டுப் பிரிவில் வராதவர்களுக்குப் போய்விடும். 12 சதவிகிதமே இருக்கும் உயர் பிரிவினருக்கு 50.5 சதவிகித இடங்கள். 52 சதவிகிதம் உள்ள இதர பிற்படுத்தப்பட்ட பிரிவினருக்கு 27 சதவிகிதம். இது என்ன நியாயம்? இட ஒதுக்கீட்டுக்கு வேட்டு வைக்கும் மத்திய அரசின் இந்தச் செயலை, அரசியல்வாதிகளும் மக்களும் புரிந்துகொள்ள வேண்டும். நீட் மசோதாக்களுக்கு அனுமதியைப் பெற்றுத் தராதபட்சத்தில் தமிழகத்தைச் சேர்ந்த எம்.எல்.ஏ-க்கள், எம்.பி-க்கள் குடியரசுத் தலைவர் தேர்தலைப் புறக்கணிக்க வேண்டும்” என்கிறார் ரவீந்திரநாத்.

2016, மே மாதம் பாளையங்கோட்டையில் நடந்த தேர்தல் பிரசாரக் கூட்டத்தில் பேசிய ஜெயலலிதா, `‘நாங்கள் ஆட்சிக்கு வந்தால், தமிழகத்தில் நீட் தேர்வு நடக்காது. மிக வலுவான சட்டம் இயற்றித் தடுப்போம்’’ என்றார். இப்போது ஜெயலலிதா இல்லை. `நடப்பது அம்மாவின் ஆட்சி’ என வார்த்தைக்கு வார்த்தைப் பேசும் ஆட்சியாளர்களால், நீட் தேர்வைத் தடுக்க முடியவில்லை. நீட் தேர்வு, பல லட்சம் மாணவர்களின் மருத்துவக் கனவுக்கும் இட ஒதுக்கீட்டு உரிமைக்கும் வைக்கப்படும் வேட்டு. இதை ஆட்சியாளர்கள் புரிந்துகொள்ள வேண்டும். இல்லாவிட்டால் அவர்களுக்கு மக்கள்தான் புரியவைக்க வேண்டும்.

- வெ.நீலகண்டன்
படம்: கே.ஜெரோம்