ஓ.பி.எஸ் தோட்டத்தில் ராட்சதக் கிணறுகள்... வறட்சியின் பிடியில் கிராம மக்கள்!

மு ன்னாள் முதல்வர் ஓ.பன்னீர்செல்வம் மனைவியின் தோட்டத்தில் ராட்சதக் கிணறுகள் தோண்டப் பட்டதால், நிலத்தடி நீர் வறண்டு, தண்ணீருக்குத் தவியாய் தவிக்கிறார்கள் மக்கள். ‘மக்கள் நலனுக்காகச் செயல்பட வேண்டிய முன்னாள் முதல்வரே, மக்களுக்கு விரோதமாகச் செயல்படலாமா?’ எனக் கொந்தளிக்கும் மக்கள், போராட்டங்களை நடத்திவருகிறார்கள்.

. தேனி மாவட்டம் பெரியகுளம் வட்டத்துக்கு உட்பட்டது, லெட்சுமிபுரம் ஊராட்சி. இங்கு வெல்லம் காய்ச்சி பல ஊர்களுக்கும் விற்பனை செய்கிறார்கள். செழிப்பான இந்தப் பகுதி மக்கள், இப்போது இரண்டு மாதங்களுக்கும் மேலாகக் கடும் குடிநீர்ப் பஞ்சத்தில் சிக்கித் தவிக்கிறார்கள். தேனி - திண்டுக்கல் சாலையில் மறியலில் ஈடுபட்ட லெட்சுமிபுரம் மக்களிடம் பேசினோம்.

“கரும்புதான், எங்கள் பிரதான விவசாயம். வெல்லச் சந்தைக்குப் பெயர் போனது எங்கள் கிராமம். லெட்சுமிபுரம் ஊராட்சி மக்களுக்கு மட்டுமன்றி, சுற்றுவட்டார மக்களுக்கெல்லாம் நீண்டகாலமாக தண்ணீர் வழங்கிக்கொண்டிருந்தது எங்கள் ஊரின் பொதுக்கிணறு. வறட்சியான காலத்திலும் வற்றியதே கிடையாது. அந்தக் கிணற்றில், கடந்த சில ஆண்டுகளாக தண்ணீர் ஊறாமல் இருந்தது. அதனால் நாங்கள் மிகவும் சிரமப்பட ஆரம்பித்தோம். ஏன் ஊற்று நின்றுவிட்டது என்று ஆய்வில் இறங்கினோம். அந்தக் கிணற்றுக்கு அருகில் உள்ள தனியார் தோட்டம் ஒன்றில் ராட்சதக் கிணறு ஒன்று தோண்டப்பட்டிருந்தது. அதுதான் பிரச்னைக்குக் காரணம் என்று கண்டுபிடித்தோம்.அது, ஓ.பன்னீர்செல்வத்தின் மனைவி விஜயலெட்சுமிக்குச் சொந்தமானது என்று தெரியவந்தது” என்றார், லெட்சுமிபுரத்தைச் சேர்ந்த ரெங்கசாமி.

. ‘‘ஓ.பி.எஸ்-ஸை ஊர் மக்கள் சந்தித்து, ‘அந்தக் கிணற்றில் அதிகமாகத் தண்ணீர் எடுக்க வேண்டாம்’ என்று கேட்டுக்கொண்டோம். ஆனால், எங்களின் வேண்டுகோளைக் கண்டுகொள்ளவில்லை. மேலும் பல நூறு அடி ஆழத்துக்கு நான்கு போர்வெல்கள், அந்தத் தோட்டத்தில் போடப்பட்டன. ஏற்கெனவே ஒரு ராட்சதக் கிணறு இருக்கும் நிலையில், இன்னும் இரண்டு கிணறுகளை வெட்டி, அதில் ராட்சத மின் மோட்டார் மூலம் தண்ணீரை உறிஞ்ச ஆரம்பித்துள்ளனர். இதனால், அந்த ஊராட்சிக்கான குடிநீர் விநியோகம் முற்றிலும் தடைபட்டது. அப்போதும் சாலைமறியலில் ஈடுபட்டோம். ஒரு வாரத்தில் நடவடிக்கை எடுப்பதாக உறுதியளித்துச் சென்ற வருவாய் கோட்டாட்சியர் ஆனந்தி, அதன் பிறகு அந்தப் பகுதிக்கே வரவில்லை’’ என்று மக்கள் புகார் தெரிவிக்கிறார்கள்.

‘‘அந்தத் தோட்டம் ஓ.பி.எஸ்ஸின் மனைவிக்குச் சொந்தமானது அல்ல என்று சிலர் கிளப்பிவிடுகிறார்கள். அது, ஓ.பி.எஸ் மனைவிக்குச் சொந்தமானதுதான் என்பதற்கு எங்களிடம் ஆதாரம் இருக்கிறது. விஜயலெட்சுமி என்ற பெயரில் அந்த இடம் பதிவு செய்யப் பட்டுள்ளது.அந்த இடத்துக்கான மின் இணைப்பும் அவர் பெயரில்தான் உள்ளது. தோட்டத்தில் கிணறு தோண்டியபோது எடுத்த மண்ணை, அந்தப் பகுதியின் விவசாயப் பாசனத்துக்கு உதவும் வறட்டாறு வரத்துக் கால்வாய் பகுதியில் போட்டு, அதை மூடிவிட்டார்கள். அரசு நடத்திய சர்வேயில், 10 மீட்டர் அளவுக்கு வரத்துக்கால்வாயை அவர்கள் ஆக்கிரமித்திருப்பதும் வெளிச்சத்துக்கு வந்துள்ளது. சுமார் 200 ஏக்கர் விவசாய நிலங்களின் நேரடி பாசனத்துக்கு உதவும் இரண்டு வரத்துக்கால்வாய்களை நாசம் செய்துவிட்டார்கள். இதுபற்றி புகார் செய்வதற்காக ஓ.பி.எஸ்ஸைச் சந்திக்க பல முறை முயற்சி செய்தோம். அவருடைய வீட்டுக்கும் சென்றோம். ஆனால், அவரைத் தொடர்புகொள்ள முடியவில்லை. ஒரு முன்னாள் முதல்வரே இப்படிச் செய்யலாமா?” என்றார் ரெங்கசாமி ஆதங்கத்தோடு.

அடுத்த கட்டப் போராட்டத்துக்கான ஆலோசனைக் கூட்டத்தில் ஏராளமான பெண்கள் கலந்துகொண்டிருந்தனர். அவர்களிடம் பேசியபோது, “தவிச்ச வாய்க்குத் தண்ணி கிடைக்காமல் அலையுறோம். எல்லாத்துக்கும் ஓ.பி.எஸ்ஸோட கிணறுகள்தான் காரணம். அந்த மூன்று கிணறுகளில் இரண்டு கிணறுகளை ஊர்ப் பொதுவுக்கு எழுதி வைக்க வேண்டும். இல்லையென்றால் வரும் உள்ளாட்சித் தேர்தலைப் புறக்கணிப்போம்” என்றார்கள் ஆவேசத்துடன்.

. இந்தப் பிரச்னை குறித்து லெட்சுமிபுரம் மக்கள் கலெக்டரைச் சந்தித்துப் புகார் கொடுத்தனர். அதுபற்றி பேசிய ரெங்கசாமி, “பிரச்னைகளை கலெக்டரிடம் சொன்னோம். ‘ஓ.பி.எஸ் தோட்டத்துக் கிணறு...’ என்று சொன்னவுடன் கலெக்டர் லேசாகப் புன்னகைத்தார். ‘உடனடியாக உங்களின் தண்ணீர் பிரச்னையைத் தீர்க்கிறேன். அதற்கான ஏற்பாடுகளை சப் கலெக்டர் செய்வார். தேவைப்பட்டால், இரு தரப்பினரையும் அழைத்ததுப் பேச்சு வார்த்தை நடத்துவோம்’ என கலெக்டர் உறுதியளித்தார்” என்றார்.

ஓ.பி.எஸ் தரப்பு கருத்தை அறிய அவருடைய உதவியாளர் ஜெய்லானியின் செல்போனுக்குப் பல முறை தொடர்பு கொண்டோம். ‘விளக்கம் தருகிறோம்’ என ஆரம்பத்தில் சொன்னார்கள். பிறகு அவர்களிடம் இருந்து எந்தப் பதிலும் இல்லை.

- எம்.கணேஷ், படங்கள்: வீ.சக்தி அருணகிரி