Published:Updated:

கடவுளின் ஞாயிறு - கவிதை

கடவுளின் ஞாயிறு - கவிதை
பிரீமியம் ஸ்டோரி
கடவுளின் ஞாயிறு - கவிதை

கவிதை: அ.வால்டர் ராபின்சன், ஓவியம்: ரமணன்

கடவுளின் ஞாயிறு - கவிதை

கவிதை: அ.வால்டர் ராபின்சன், ஓவியம்: ரமணன்

Published:Updated:
கடவுளின் ஞாயிறு - கவிதை
பிரீமியம் ஸ்டோரி
கடவுளின் ஞாயிறு - கவிதை

ஞாயிறென்றும் பாராமல்
இன்பாக்ஸில் தொடர்ச்சியாக வந்துவிழும்
வேண்டுதல்களால் எரிச்சலுற்ற கடவுள் தனது
கைப்பேசியை எதிர்ச்சுவற்றில்
ஓங்கி அடிக்கிறார்

இதுவரை நிறைவேற்றிய வேண்டுதல்களுக்காக
ஒருமுறைகூட நன்றியை ருசித்ததில்லையென
வருத்தம் கொள்கிறார்

தான் மிகக் கடுமையான மனஅழுத்தத்தில்
இருப்பதாகச் சிதறிக்கிடக்கும் கைப்பேசிச்
சில்லுகளைப் பார்த்து ஆவேசமாகக்
கத்துகிறார்

கடவுளின் ஞாயிறு - கவிதை

ஆசுவாசப்படுத்திக்கொள்ள மனிதக்கூட்டத்தில்
ஒளிந்துகொள்வது சரியெனப்படுகிறது
கடவுளுக்கு
பூமிக்குத் திரும்ப நினைத்த மறுகணம்
ஒரு புறவழிச்சாலையின் திருப்பத்தில்
இறங்கிக் கொள்கிறார்

வெயில் சுடும் உடலில் தன் குறிபொத்தி
நடப்பவருக்கு ஒரு கிழிந்த கைலியும்
சட்டையும் கிடைக்கிறது

தார்ச்சாலையின்
அனல் பொறுக்காமல் குதித்து ஓடுகிறார்
சிக்னலைக் கடக்கத் தெரியாமல் தவிக்கிறார்
யாசகனிடம் பசிக்குக் கையேந்தி விரட்டப்
படுகிறார்

வாகன ஓட்டி ஒருவன் திட்டிய
மூன்றெழுத்துக் கெட்டவார்த்தைக்கு
அர்த்தம் தெரியாமல் விழிப்பவருக்கு எரிச்சல்
அதிகமாகிறது

வெயிலையும் பொருட்படுத்தாமல்
நீண்ட வரிசையில் பேதமின்றி நிற்கும்
கனவான்களைக் கண்டு வியப்பு கூடுகிறது

வரிசையின் கடைசி நுனிக் கனவானிடம்
வரிசைக்கான காரணம் கேட்டறிகிறார்
புத்துணர்வு புட்டிக்காக நிற்பதாகச் சொன்ன
அவனின் காரைப் பற்களில் பயம்கொண்டு
பின்னால் நிற்கையில் அடிவயிறு முட்டுகிறது

அவசரத்துக்காகவே பிறப்பெடுத்த
முட்டுச்சந்தில் பீய்ச்சிவிட்டு வருகையில்
தன் இடத்தை ஆக்கிரமித்தவனிடம் தன்
இருப்பை நியாயப்படுத்துகிறார்

இதுவரை கேட்டிராத
வார்த்தைகளில் திட்டியவனிடம்
தான் ஒரு கடவுளெனக் கம்பீரமாகச் சொல்லி
அவனிடம் குருக்கில் மிதி வாங்கி
குப்பையில் விழுந்து
மூன்றெழுத்துக் கெட்டவார்த்தையோடு
கட்டிப்புரண்டு சண்டையிடத் துவங்குகிறார்

இப்படித்தான் நாராசமாய்ப் போய்க்
கொண்டிருக்கிறது
கடவுளின் ஞாயிறு.

ஒட்டுமொத்த விகடனுக்கும் ஒரே ஷார்ட்கட்!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism