Published:Updated:

வெந்நிப் பழசு

வெந்நிப் பழசு
பிரீமியம் ஸ்டோரி
வெந்நிப் பழசு

கவிதை: தமிழச்சி தங்கபாண்டியன் - ஓவியம்: ஸ்யாம்

வெந்நிப் பழசு

கவிதை: தமிழச்சி தங்கபாண்டியன் - ஓவியம்: ஸ்யாம்

Published:Updated:
வெந்நிப் பழசு
பிரீமியம் ஸ்டோரி
வெந்நிப் பழசு
வெந்நிப் பழசு

ப்பாவிற்கு வெந்நிப் பழசு பிடிக்கும்.
அம்மா அருகிருக்க
முன்னிரவுகளில்
வெந்நிப் பழசும் சின்ன வெங்காயமும்
நிலவும் நட்சத்திரங்களுமாய்
எங்களுக்குக் கதை சொல்லும்.
கண்ணோரங்கள் சுருங்கி விரிய
ருசிப்பின் சுவையை உதடு கடத்தும்
அப்பொழுதில்,
ஒதப்பழம்போல்
அப்பா கனிந்திருப்பார்.
எச்சிலூறப் பார்க்கும் என்னோடு
கட்டெறும்புகளும் காத்துக்கிடக்கும்
முழு நிலவொன்றில்
சிந்திவிட்ட ஒரு சுடு பருக்கை
நினைவின் குளிரிடுக்கில்
உறைந்து போனது
சுருங்கி விரியும் ஓதப்பழக் கண்களாய்
இந்த இரவில் உணவு மேசையில்
தனியொருத்தியாய்த் தட்டெடுக்கிறேன்.
மதியத்தின் எச்சமாய்ச்
சுருங்கியதொரு பருக்கைமீது
தடுமாறி மேலேறும் கட்டெறும்பு
காலத்தின் கடிகார முள்ளை
முழுநிலவில் நிறுத்துகின்றது.
காத்திருந்த கட்டெறும்புகள்
விண்மீன்களாய்ப் பேச்சற்றிருக்கின்றன.
முழுநிலவோ கவிழ்த்து வைக்கப்பட்ட
களிம்பேறிய சட்டியில் மூச்சற்றிருக்கிறது.
சோம்பு மணக்க அப்பா முன்நெற்றி
முத்தமிட்ட அந்த இரவல்ல இது.
``முரண் சுவைடா வெந்நிப் பழசுன்னா’’
அப்பா
ரசித்துப் புசிக்கிற அந்த இரவல்லவும் இது.
இல்லாமல் போவதென்பது
இத்தனை துலக்கமான துக்கமா
கட்டெறும்பு நகர்கிறது...
அப்பாவின் சார்லி சென்ட் மணக்கிறது
இவ்விரவின் மைசூர் சாண்டல் ஊதுவத்தியில்.
கழற்றி வைக்கப்பட்ட கருப்பு நிற செருப்புகளை
வெள்ளையாய் விழித்திரைக்குள்
கடத்துகிறது இவ்விரவு.
கலர் பூத்துவாலைகளை வெள்ளைக்
கரைவேட்டியாய்க் கவனத்தில் இடறுவதும்
இவ்விரவுதான்.

இல்லாமல் போவதென்பது
அப்பாக்களுக்கு
இயலாத காரியம்

வெயிலும் பனியும்தானே
வெந்நிப் பழசு.
இருப்பும் வெற்றிடமும்தானே
வெங்காயம்.

அப்பா இல்லாமலிருக்கலாம்
அப்பாக்கள் இல்லாத வீடென்றெதுவுமில்லை!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism