Published:Updated:

“கப்பம் கட்டச் சொல்கிறார்!”

“கப்பம் கட்டச் சொல்கிறார்!”
பிரீமியம் ஸ்டோரி
News
“கப்பம் கட்டச் சொல்கிறார்!”

முன்னாள் அமைச்சர் மீது புகார் வாசிக்கும் டாஸ்மாக் ஊழியர்கள்

‘முன்னாள் பொதுப்பணித் துறை அமைச்சரும் தற்போதைய ஈரோடு மேற்கு தொகுதியின் அ.தி.மு.க எம்.எல்.ஏ-வுமான கே.வி.ராமலிங்கம், டாஸ்மாக் கடையில் கமிஷன் கேட்டு மிரட்டுகிறார்’ என்று கலெக்டர் அலுவலகப் படியேறி இருக்கிறார்கள் டாஸ்மாக் ஊழியர்கள்.

“கப்பம் கட்டச் சொல்கிறார்!”

இதுபற்றி ஈரோடு சூரம்பட்டி டாஸ்மாக் கடையின் விற்பனையாளர் பொன்.பாரதி, ‘‘ஈரோடு மாநகராட்சி எல்லைக்குள் உள்ள 15 டாஸ்மாக் கடை சூப்பர்வைசர்களை கே.வி. ராமலிங்கம் கடந்த வாரம் தன் அலுவலகத்துக்கு அழைத்து மீட்டிங் போட்டார். ‘ஒவ்வொரு கடையிலிருந்தும் ஒரு நாளைக்கு 700 ரூபாய் வீதம், மாதம் 21,000 ரூபாய் கமிஷன் கொடுக்க வேண்டும். இல்லையென்றால் வேலையைவிட்டு நீக்கிவிடுவேன்’ என்று மிரட்டி அனுப்பினார். அவர் அனுப்பிய ஆட்களும் வந்து மிரட்டினர். அதையடுத்து ‘பணி செய்யவிடாமல் பிரச்னை செய்கிறார்கள்’ என்று சூரப்பட்டி காவல் நிலையத்தில் புகார் கொடுத்தேன். எஸ்.ஐ கடைக்கு வந்து பார்த்துவிட்டுப் போனார். ஆனால், நான் புகார் கொடுத்த ஒரே காரணத்துக்காக, ஐந்து பேரைத் தாக்கியதாக என் மீது பொய்யாக எஃப்.ஐ.ஆர் போட்டிருக்கிறார்கள்’’ என்றார்.

டாஸ்மாக் சி.ஐ.டி.யூ சங்க மாவட்டச் செயலாளர் சுப்பிரமணி, ‘‘பணி நிரந்தரம் செய்யப்படாமலும், குறைவான தொகுப்பு ஊதியம் வாங்குவதாலும், பொதுமக்களின் சாபத்தாலும் ஏற்கெனவே டாஸ்மாக் ஊழியர்கள் வேதனையின் உச்சத்தில் வாழ்ந்து வருகிறார்கள். சூப்பர்வைசருக்கு 7,500 ரூபாயும், விற்பனையாளருக்கு 5,200 ரூபாயும், உதவி விற்பனையாளருக்கு 4,200 ரூபாயும் சம்பளம் வழங்குகிறார்கள். இன்றைய காலத்தில் இந்தச் சம்பளம் எப்படி கட்டுப்படியாகும்? இந்த நிலையில், இப்படி எம்.எல்.ஏ ராமலிங்கம் கமிஷன் கேட்டு சித்ரவதை செய்வது சரியல்ல. இது அவர் வகிக்கும் பதவிக்கு அசிங்கமானது. இதை எதிர்த்து மாநில அளவில் போராட்டம் நடத்த முடிவு செய்திருக்கிறோம்’’ என்றார்.

சூரம்பட்டி இன்ஸ்பெக்டர் ராஜ்குமாரிடம் கேட்டதற்கு, ‘‘இரு தரப்பினருக்கும் ஏதோ தகராறு ஏற்பட்டிருக்கிறது. அதையடுத்து டாஸ்மாக் ஊழியர்கள் மீது எஃப்.ஐ.ஆர் போட்டிருக்கிறோம்’’ என்றார்.

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
“கப்பம் கட்டச் சொல்கிறார்!”

இதுபற்றி கே.வி.ராமலிங்கத்திடம் விளக்கம் கேட்டோம். ‘‘கேட்பதற்கு ஆள் இல்லாததால் டாஸ்மாக் ஊழியர்கள் ஒரு பாட்டிலுக்கு 40, 50 ரூபாய் கூடுதலாக விலை வைத்து விற்பனை செய்கிறார்கள். பலருக்கு மீதி சில்லறைத் தருவதில்லை. இதனால் அரசுக்குக் கெட்ட பெயர் ஏற்படுகிறது. எனவே, டாஸ்மாக் சூப்பர்வைசர்களைக் கூப்பிட்டு எச்சரிக்கை செய்து அனுப்பினேன். கடைகளையும் கண்காணிக்க ஏற்பாடு செய்தேன். அதனால்தான் என் மீது இப்படி ஒரு புகார் கூறி இருக்கிறார்கள்’’ என்றார்.

ஒரு முன்னாள் அமைச்சர் மீது இப்படி புகார் வருவது வேதனை!

- வீ.கே.ரமேஷ், படங்கள்: ரமேஷ் கந்தசாமி