Published:Updated:

அனிதா... இழந்த உரிமையை மீட்கும் குறியீடு!

அனிதா... இழந்த உரிமையை மீட்கும் குறியீடு!
பிரீமியம் ஸ்டோரி
News
அனிதா... இழந்த உரிமையை மீட்கும் குறியீடு!

ரவிக்குமார்

டகங்களில் உச்சரிக்கப்படாத ஒரு ஊரை, உலக அரசியல் வரை படத்துக்குள் கொண்டு போய் வைத்துவிட்டார் அனிதா. மரணம் என்பது எப்போதும் முடிவல்ல என்பதைக் காட்டிவிட்டார். ‘அனிதாவின் மரணத்துக்கு யார் பொறுப்பு’ என்ற கேள்வி, ‘அனிதாக்களைச் சாகடிக்கும் சதிவலை யாரால் பின்னப்பட்டது, அதை எப்படி அறுப்பது’ என்ற விவாதமாக இன்று உருவெடுத்துள்ளது. அனிதா என்பது இப்போது ஒரு பெண்ணின் பெயர் அல்ல, இழந்த உரிமையை மீட்பதற்கான போராட்டத்தின் குறியீடு.

அனிதா... இழந்த உரிமையை மீட்கும் குறியீடு!

மருத்துவக் கல்வியை ஜனநாயகப்படுத்து வதற்கான தமிழகத்தின் போராட்டம் அரை நூற்றாண்டுக் கால வரலாறுகளைக் கொண்டது. 1967-68-ம் ஆண்டுகளில் தமிழகத்தில் எட்டு மருத்துவக் கல்லூரிகளே இருந்தன. நகரங்களில் வசிக்கும் மாணவர்களே மருத்துவப் படிப்புக்கான வாய்ப்பைப் பெற்ற அந்த நேரத்தில், தமிழ்நாட்டின் அனைத்து மாவட்டங்களின் கிராமப்புற மாணவர்களும் மருத்துவக் கல்வி பெறும் நோக்கத்தோடு மாவட்ட அளவிலான இட ஒதுக்கீடு வழங்கப்பட்டது. இதை எதிர்த்து ராஜேந்திரன் என்பவர் தொடுத்த வழக்கில், ‘இது அடிப்படை உரிமைகளுக்கு எதிரானது’ எனக் கூறி அந்த முறையை 1968-ம் ஆண்டு உச்ச நீதிமன்றம் ரத்து செய்துவிட்டது.

அதன்பின்னர், யூனிட் அடிப்படையில் இட ஒதுக்கீடு செய்யும் புதிய முறையை 1970-71-ம் கல்வி ஆண்டில் அன்றைய தி.மு.க அரசு கொண்டுவந்தது. சென்னையில் இருக்கும் மருத்துவக் கல்லூரிகள் ஒரு யூனிட்டாகவும், இதர மருத்துவக் கல்லூரி ஒவ்வொன்றும் ஒரு யூனிட்டாகவும் கணக்கிடப்பட்டு, ‘ஒரு யூனிட்டுக்கு அருகே வசிக்கும் மாணவர்கள் அந்த யூனிட்டில் உள்ள மருத்துவக் கல்லூரிக்கு விண்ணப்பிக்கவேண்டும்’ என்று உத்தரவிடப்பட்டது. தாழ்த்தப்பட்டோர் மற்றும் பிற்படுத்தப்பட்டோருக்கு 41 சதவீத இட ஒதுக்கீடும் தரப்பட்டது. இதை எதிர்த்து பெரிய கருப்பன் என்பவர் வழக்கு தொடுக்க, உச்ச நீதிமன்றம் இதையும் ரத்து செய்தது.

1996-ம் ஆண்டு கருணாநிதி ஆட்சிக்கு வந்ததும், மருத்துவக்கல்வியை ஜனநாயகப் படுத்துவதற்காகக் குழு ஒன்றை அமைத்தார். அந்தக் குழுவின் பரிந்துரைகளின் அடிப்படையில், ‘கிராமப்புறப் பள்ளிகளில் படித்த மாணவர்களுக்காக மருத்துவம் உள்ளிட்ட தொழிற்படிப்புகளில் 15 சதவிகிதம் இட ஒதுக்கீடு’ வழங்கும் உத்தரவைப் பிறப்பித்தார். இதனால் பல்லாயிரக்கணக்கான கிராமப்புற மாணவர்கள் பயனடைந்தனர். இதன் வெற்றியைக் கண்ட ஜெயலலிதா, 2001-ம் ஆண்டு ஆட்சிக்கு வந்ததும், 15% என இருந்த கிராமப்புற இட ஒதுக்கீட்டை 25% என உயர்த்தி உத்தரவிட்டார். அதை எதிர்த்து மாணவர்கள் பலர் நீதிமன்றத்துக்குச் சென்றனர். அதை விசாரித்த சென்னை உயர் நீதிமன்றம், ‘தமிழக அரசின் இட ஒதுக்கீடு உத்தரவு செல்லாது’ எனத் தீர்ப்பளித்தது. தீர்ப்பு வெளியான நேரத்தில் ஜெயலலிதா பதவி விலகி, ஓ.பன்னீர்செல்வம் முதல்வராகப் பொறுப்பேற்றிருந்தார். ‘‘கிராமப்புற மாணவர்களின் உரிமையைக் காப்பாற்றுவதற்கு உச்ச நீதிமன்றத்தில் மேல்முறையீடு செய்யப்படும்’’ என்று ஓ.பன்னீர்செல்வம் அறிவித்தார். ஆனால், அன்றைய அ.தி.மு.க அரசு மேல்முறையீடு செய்யவே இல்லை. ஆனால், அதுவரை இருந்துவந்த நுழைவுத் தேர்வு முறையை அதன்பின் ஜெயலலிதா ரத்து செய்தார். ‘ப்ளஸ் 2 தேர்வில் பெறும் மதிப்பெண்களின் அடிப்படையில் மருத்துவப் படிப்புக்கான சேர்க்கை நடக்கும்’ என அறிவித்தார். நீட் தேர்வு திணிக்கப்படும்வரை அதுதான் நடைமுறையில் இருந்தது.

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
அனிதா... இழந்த உரிமையை மீட்கும் குறியீடு!

இந்தியாவிலேயே மருத்துவம் உள்ளிட்ட தொழிற்கல்விகளை ஜனநாயகப்படுத்துவதற்கான முயற்சிகள் தமிழ்நாட்டில் மட்டும்தான் நடந்துள்ளன. அதுமட்டுமின்றி, ‘மாவட்டத்துக்கு ஒரு மருத்துவக் கல்லூரி’ என அறிவித்து, அரசு மருத்துவக் கல்லூரிகளை அதிக அளவில் துவக்கியிருப்பதும் தமிழகம்தான். மாநில உரிமைகளுக்கான போராட்டக் களத்தில் எப்போதும் முன்னணியில் நிற்கும் தமிழ்நாட்டின் வரலாற்றோடு இதை நாம் இணைத்துப் பார்க்கவேண்டும். தமிழ்நாட்டின் இந்த ஜனநாயக வேட்கையும், மருத்துவக் கல்வியில் தமிழகம் கண்டிருக்கும் முன்னேற்றமும் மத்தியில் ஆட்சி செய்பவர்களின் கண்ணை உறுத்துகிறது. அதனால்தான் இதை முடக்குவதில் முனைப்பாக இருக்கிறார்கள்.

‘கல்வி அதிகாரத்தை மையத்தில் குவிக்கும் நோக்கோடு பொது நுழைவுத் தேர்வு ஒன்றை நடத்த வேண்டும்’ என்று இந்திய மருத்துவ கவுன்சில் (எம்.சி.ஐ) 2010-ம் ஆண்டு பரிந்துரை செய்தது. அதன் அடிப்படையில் 2012-ம் ஆண்டு ‘நீட்’ தேர்வு நடத்தப்பட்டது. ஆனால், இந்தியாவில் 90 மருத்துவக் கல்லூரிகள் அதை ஏற்கவில்லை. தாமே தனியாக நுழைவுத் தேர்வுகளை நடத்திக்கொண்டதோடு, உச்ச நீதிமன்றத்திலும் வழக்கு தொடுத்தன. ‘நீட்’ நுழைவுத் தேர்வு நடத்துவதற்கான இந்திய மருத்துவ கவுன்சிலின் குறிப்பாணையை 2013-ம் ஆண்டு ஜூலை 18 அன்று உச்ச நீதிமன்றம் ரத்து செய்தது. அந்தத் தீர்ப்பை எதிர்த்து மருத்துவக் கவுன்சில், சீராய்வு மனு ஒன்றைத் தாக்கல் செய்தது. வழக்கமாக சீராய்வு மனுக்களை வெளிப்படையாக நீதிமன்றத்தில் விசாரிக்கமாட்டார்கள். நீதிபதிகளுக்குள் சுற்றுக்கு விடப்பட்டு அதன் அடிப்படையில் முடிவுசெய்வார்கள். ஆனால், இந்த சீராய்வு மனுவை விசாரிப்பதற்குப் புதிய அமர்வு ஒன்றை உருவாக்கி, அதில் இந்த வழக்கு விசாரிக்கப் பட்டது. அதன் பின்னரே, ‘நீட் தேர்வு கட்டாயம்’ என்ற தீர்ப்பு வழங்கப்பட்டது.

இந்த வரலாற்றை உற்று நோக்கினால், மருத்துவக் கல்வியை ஜனநாயகப்படுத்தும் தமிழ்நாட்டின் முயற்சிக்கு மத்திய அரசும் நீதித்துறையும் தொடர்ந்து முட்டுக்கட்டைகளைப் போடுவதை நாம் புரிந்துகொள்ளலாம். அதன் உச்சகட்டமாகவே மத்தியில் ஆளும் பி.ஜே.பி அரசு நம்மை நம்ப வைத்துக் கழுத்தறுத்திருக்கிறது.தமிழ்நாடு இயற்றியிருக்கும் அவசரச் சட்டத்துக்கு ஒப்புதல் தரப்போவதாக உச்ச நீதிமன்றத்தில் தெரிவித்தவர்கள், மூன்றே நாள்களில் தங்கள் நிலையை மாற்றிக்கொண்டு ‘ஒப்புதல் இல்லை’ எனக் கூறிவிட்டார்கள். காவிரி மேலாண்மை வாரியம் அமைக்கும் விஷயத்திலும் இதைப் போன்றுதான் நீதிமன்றத்தில் மோடி அரசு ‘பல்டி’ அடித்து தமிழ்நாட்டை வஞ்சித்தது. தமிழ்நாட்டுக்கு இவ்வளவு பெரிய துரோகம் இழைக்கப்பட்டாலும், அதை எதிர்த்துக் கேட்கும் திராணியற்றவர்களாக தமிழக ஆட்சியாளர்கள் உள்ளனர்.

அனிதா... இழந்த உரிமையை மீட்கும் குறியீடு!

அனிதாவின் மரணம் இயலாமையால் எடுக்கப்பட்ட முடிவு அல்ல; மத்திய, மாநில அரசுகளின் துரோகத்துக்கு எதிராகக் கிளர்ந்தெழ வேண்டும் என்று மக்களுக்கு விடுக்கப்பட்ட அழைப்பு. ‘நீட் தேர்வில் இழைக்கப்பட்ட அநீதிக்கு மத்திய, மாநில அரசுகளே காரணம்’ என்று குற்றம் சாட்டிப் போராட்டங்களில் இறங்கினால் மட்டும் போதாது. பின்வரும் பிரச்னைகளையும் நாம் பேசியாகவேண்டும்:

பள்ளிக்கல்வியைச் சீர்திருத்த அமைக்கப்பட்ட டாக்டர் முத்துக்குமரன் குழு பரிந்துரைகளை விவாதிக்காத தமிழக அரசியல் கட்சிகளின் அலட்சியம்;  அதே காலத்தில் பீகார் மாநிலத்தில் சமர்ப்பிக்கப்பட்ட அனில் சட்கோபால் கமிட்டி அறிக்கையோடு முத்துக் குமரன் குழு அறிக்கையை ஒப்பிட்டுப் பார்த்து இதை மேம்படுத்த எந்த முயற்சியும் செய்யாத நமது கல்வியாளர்களின் மெத்தனம்; விஜயகுமார் ஐ.ஏ.எஸ் அர்ப்பணிப்போடு அறிமுகம் செய்த செயல்வழிக் கற்றல் முறையை ஒழித்துக்கட்ட ஆசிரியர் சங்கங்கள் காட்டிய முனைப்பு; சமச்சீர் கல்வி முறையை நீர்த்துப்போகச் செய்ததில் அந்தப் பாடத்திட்டத் தயாரிப்புக் குழுவில் இருந்தவர்களின் பங்கு; லாபம் ஒன்றையே குறிக்கோளாகக் கொண்டு, பிராய்லர் பள்ளிகளில் ப்ளஸ் 1, ப்ளஸ் 2 என இரண்டு வகுப்புகளிலும் ப்ளஸ் 2 பாடங்களை மட்டும் நடத்தி மாணவர்களை முடமாக்கும் கயமை; மருத்துவப் படிப்பில் அரசுப் பள்ளி மாணவர்களுக்கு ஒரு சதவிகித இடம்கூடக் கிடைப்பதில்லை என்ற உண்மையை மூடிமறைக்கும் மோசடி; இப்போது நடைபெற்றுக்கொண்டிருக்கும் புதிய பாடத்திட்ட உருவாக்கம் குறித்து அக்கறையின்றி இருக்கும் நமது பொறுப்பின்மை. 

மாநில உரிமைகளை மீட்டெடுக்கும் அதே நேரத்தில், இதயசுத்தியோடு இவற்றைப் பற்றி நாம் பேசவில்லையென்றால் இந்தப் போராட்டம் வெறும் தேர்தல் அரசியலாகவே முடிந்துவிடும்.

படம்: கே.குணசீலன்