Published:Updated:

இந்தியாவில் இல்லை கறுப்புப் பணம்!

இந்தியாவில் இல்லை கறுப்புப் பணம்!
பிரீமியம் ஸ்டோரி
News
இந்தியாவில் இல்லை கறுப்புப் பணம்!

இந்தியாவில் இல்லை கறுப்புப் பணம்!

‘‘எங்களிடம் தகவல் இல்லை!’’ - ரிசர்வ் வங்கி கொடுத்திருக்கும் ஒப்புதல் வாக்குமூலம் இது. கடந்த ஆண்டு நவம்பர் 8-ம் தேதி பிரதமர் நரேந்திர மோடியின் ஒற்றை அறிவிப்பால், 500 மற்றும் 1,000 ரூபாய் நோட்டுகள் செல்லாததாக ஆக்கப்பட்டன. ‘‘கறுப்புப் பணத்தை ஒழிக்கவே இந்த நடவடிக்கை’’ என முழங்கினார் மோடி. ‘‘இந்த நடவடிக்கை மூலம் எவ்வளவு கறுப்புப் பணம் ஒழிக்கப்பட்டது?’’ என்று ரிசர்வ் வங்கியிடம் நாடாளுமன்ற நிலைக்குழு கேட்டிருந்தது. அதற்குத்தான் இப்படி ஒரு வாக்குமூலம் கொடுத்திருக்கிறது ரிசர்வ் வங்கி. அதைவிட அதிர்ச்சியான புள்ளிவிவரங்களைத் தந்திருக்கிறது ரிசர்வ் வங்கியின் ஆண்டறிக்கை.

இந்தியாவில் இல்லை கறுப்புப் பணம்!

இந்தியாவில் புழக்கத்தில் இருந்த ரூபாய் நோட்டுகளில் 86 சதவிகிதம் உயர் மதிப்புள்ள 500 மற்றும் 1,000 ரூபாய் நோட்டுகளே. திடீரென இவற்றை செல்லாததாக ஆக்கியதும், ஒட்டுமொத்த இந்தியாவே நிலைகுலைந்தது. குடும்பம் குடும்பமாக மக்கள் வங்கிகளிலும் ஏ.டி.எம்-களிலும் க்யூவில் நின்றார்கள். கிட்டத்தட்ட 100 பேர் இந்த பணமதிப்பிழப்பு நடவடிக்கையால் நேரடியாகவோ, மறைமுகமாகவோ உயிரிழந்தார்கள். சுமார் 15 லட்சம் பேர் வேலை இழக்கும் அளவுக்கு பொருளாதாரத் தேக்கநிலை ஏற்பட்டது. மொத்த உள்நாட்டு உற்பத்தி 5.7 சதவிகிதம் அளவுக்குக் குறைந்ததாக ரிசர்வ் வங்கியே ஒப்புக்கொண்டிருக்கிறது.

ஆனால், இவை எல்லாவற்றையும் மக்கள் ஏன் பொறுத்துக்கொண்டார்கள்? மத்திய அரசு சொன்ன ஒரு கணக்குதான் காரணம். பணமதிப்பிழப்பு நடவடிக்கை தொடர்பான வழக்குகள் நீதிமன்றங்களில் குவிந்தபோது, ‘‘சுமார் ஐந்து லட்சம் கோடி ரூபாய் அளவுக்கான கறுப்புப் பணத்தை இதன்மூலம் ஒழித்துவிடுவோம்’’ என உச்ச நீதிமன்றத்தில் மத்திய அரசு சார்பில் சொல்லப்பட்டது. ‘தேச நலனுக்காக தனிப்பட்ட சிரமங்களைப் பொறுத்துக்கொள்வோம்’ எனப் பிரசார இயக்கமே நடந்தது.

ஆனால், நடந்தது என்ன தெரியுமா? செல்லாததாக ஆக்கப்பட்ட 500 மற்றும் 1,000 ரூபாய் நோட்டுகளின் மொத்த மதிப்பு 15 லட்சத்து 44 ஆயிரம் கோடி ரூபாய். இதில்தான் ஐந்து லட்சம் கோடி ரூபாய் கறுப்புப் பணம் இருப்பதாக மத்திய அரசு சொன்னது. செல்லாத பழைய நோட்டுகளை வங்கியில் கொடுத்து புது நோட்டுகளாக மாற்றிக்கொள்ளலாம் என்ற அறிவிப்பைத் தொடர்ந்து, இதில் 98.8 சதவிகித நோட்டுகள் திரும்பவும் வங்கிக்கே வந்துவிட்டன. அதாவது, 15 லட்சத்து 28 ஆயிரம் கோடி ரூபாய் மதிப்புள்ள பழைய நோட்டுகள் வந்துவிட்டன. வராதது, வெறும் 16,000 கோடி ரூபாய்தான். அதற்கும் ஒரு கணக்கு இருக்கிறது. கூட்டுறவு வங்கிகள் வசூலித்த சுமார் 8,000 கோடி ரூபாய் பழைய நோட்டுகளைப் பெற்றுக்கொள்வதா, வேண்டாமா என்ற சர்ச்சை ரிசர்வ் வங்கியில் ஓடிக்கொண்டிருக்கிறது. இதையும் ஏற்பதாக அறிவித்தால், வராத மிச்சம் 8,000 கோடி ரூபாய்தான். நேபாளம் உள்ளிட்ட சில நாடுகளில் இந்திய கரன்சி புழக்கத்தில் இருக்கிறது. அவர்களிடம் இருக்கும் பழைய நோட்டுகளை வாங்கிக்கொண்டு புதிய நோட்டுகளைத் தருவதற்கு இந்தியா கடமைப்பட்டுள்ளது. அப்படி சுமார் 8,000 கோடி ரூபாய் வெளியில் இருக்கலாம் எனப் பொருளாதார நிபுணர்கள் மதிப்பிடுகிறார்கள். எனவே, எல்லா பணமும் வந்துவிடும்.

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
இந்தியாவில் இல்லை கறுப்புப் பணம்!

இந்த நடவடிக்கையால் ரிசர்வ் வங்கி உட்பட எல்லா வங்கிகளும் பெரும் நஷ்டத்தைச் சந்தித்திருப்பதாக கணக்குகள் சொல்கின்றன. புதிய நோட்டுகள் அச்சிடுவதற்காக ரிசர்வ் வங்கி செய்யும் செலவு இரு மடங்கு ஆகிவிட்டது. கடந்த நிதியாண்டில் 7,965 கோடி ரூபாய் இதற்கு செலவானது. அதற்கு முந்தைய ஆண்டில் இந்தச் செலவு 3,421 கோடி ரூபாயாக இருந்தது. கிட்டத்தட்ட இரண்டு மடங்குக்கும் அதிகம். இதுதவிர ரூபாய் நோட்டுகளைக் கையாளும் செலவினங்களையும் சேர்த்து, 21,000 கோடி ரூபாய் செலவு என மதிப்பிடப்பட்டுள்ளது. அதனால்தான், ‘ரூ.16,000 கோடி கறுப்புப் பணத்தை ஒழிக்க ரூ.21,000 கோடி செலவு செய்த பொருளாதார நிபுணர்கள் நோபல் பரிசு பெறத் தகுதியானவர்கள்’ என்று கிண்டல் செய்துள்ளார், முன்னாள் நிதி அமைச்சர் ப.சிதம்பரம். இன்னொரு பக்கம், எல்லோரும் பணத்தைக் கொண்டு சென்று வங்கிகளில் டெபாசிட் செய்ததால் வழக்கத்தைவிட ஒரு லட்சத்து 70 ஆயிரம் கோடி ரூபாய் கூடுதலாக வங்கிகளில் சேர்ந்துவிட்டது. தொழில் மந்த நிலையால் கடன் வாங்குவதும் குறைந்துவிட்டது.

இவ்வளவு பாதிப்புகள் இருந்தாலும், ‘‘பண மதிப்பிழப்பு நடவடிக்கையின் மறைமுக லாபம் பெரியது’’ என்று அழுத்தமாகச் சொல்கிறார், அனில் போகில். புனேவில் ‘அர்தக்ராந்தி ப்ரதிஸ்தான்’ என்ற அமைப்பை நடத்திவரும் இவர்தான், பணமதிப்பிழப்பு நடவடிக்கை குறித்து மோடிக்குச் சொன்னவர். இதுபற்றிப் பல ஆண்டுகளாகப் பேசியும் வருபவர். ‘‘கள்ள நோட்டுகளை இதுதான் ஒழித்தது. நாடெங்கும் தீவிரவாதத் தாக்குதல் குறைந்திருப்பதற்கு இதுதான் காரணம். பணப் பரிமாற்றம் குறைந்திருப்பதால், நிழல் பொருளாதாரம் தடைபடும். இந்தியாவில் பெரும்பாலான மக்கள் தினமும் வெறும் 200 ரூபாய்க்குள் சம்பாதிப்பவர்கள்தான். இங்கு உயர் மதிப்பு நோட்டுகள் எதற்கு? இப்போது 200 ரூபாய் நோட்டு வந்துள்ளது. இதை அதிகமாக அச்சடித்துவிட்டு, 2,000 மற்றும் 500 ரூபாய் நோட்டுகளைச் செல்லாததாக ஆக்கிவிட வேண்டும். அப்போதுதான் முழுமையாக கறுப்புப் பணம் ஒழியும்’’ என்கிறார் அவர்.

மறுபடியும் முதலில் இருந்தா?

- தி.முருகன்