Published:Updated:

விக்கிரமராஜாவுக்கு எதிராக வரிசைகட்டும் புகார்கள்

விக்கிரமராஜாவுக்கு எதிராக வரிசைகட்டும் புகார்கள்
பிரீமியம் ஸ்டோரி
விக்கிரமராஜாவுக்கு எதிராக வரிசைகட்டும் புகார்கள்

கோடி ரூபாய் ஊழல்... பெண் சகவாசம்... அடியாள் மிரட்டல்...

விக்கிரமராஜாவுக்கு எதிராக வரிசைகட்டும் புகார்கள்

கோடி ரூபாய் ஊழல்... பெண் சகவாசம்... அடியாள் மிரட்டல்...

Published:Updated:
விக்கிரமராஜாவுக்கு எதிராக வரிசைகட்டும் புகார்கள்
பிரீமியம் ஸ்டோரி
விக்கிரமராஜாவுக்கு எதிராக வரிசைகட்டும் புகார்கள்

‘நெல்லை நாடார் மெட்ரிக் மேல்நிலைப் பள்ளியில் 13 கோடி ரூபாய் ஊழல் செய்துள்ளார்’ என ‘தமிழ்நாடு வணிகர் சங்கங்களின் பேரமைப்பு’ தலைவர் விக்கிரமராஜாவுக்கு எதிராகப் போலீஸில் புகார் செய்யப்பட்டுள்ளது.

சென்னை கொட்டிவாக்கத்தில் நெல்லை நாடார் மெட்ரிக் பள்ளி செயல்பட்டுவருகிறது. இந்தப் பள்ளி, நெல்லை தூத்துக்குடி நாடார் மகமை பரிபாலன சங்கத்துக்குச் சொந்தமானது. இந்தப் பள்ளியின் தாளாளராக இருந்த விக்கிரமராஜா, பல கோடி ரூபாய் ஊழல் செய்த புகார் குறித்து, ‘வில்லங்கம் செய்தாரா விக்கிரமராஜா?’ என்ற தலைப்பில், 25-12-2016 தேதியிட்ட ஜூ.வி-யில் கட்டுரை வெளியிட்டிருந்தோம்.

இப்போது பள்ளியின் நிர்வாகக் கணக்கு வழக்குகளைச் சரிபார்த்த ஆய்வுக்குழு, ‘விக்கிரமராஜா 13 கோடி ரூபாய் ஊழல் செய்துள்ளார்’ என உறுதிசெய்திருக்கிறது. இதையடுத்து, சங்கத்தின் அடிப்படை உறுப்பினர் பொறுப்பிலிருந்து அவரை இடைநீக்கம் செய்திருக்கிறார்கள்.

விக்கிரமராஜாவுக்கு எதிராக வரிசைகட்டும் புகார்கள்

ஆய்வுக்குழுவின் தலைவர் தங்கம் செல்வராஜிடம் பேசினோம். ‘‘2015-16-ல் மட்டும், விக்கிரமராஜாவும் நிர்வாகத்தில் அவருடன் கூட்டுச் சேர்ந்தவர்களும் 13 கோடி ரூபாய் ஊழல் செய்துள்ளனர். ‘புதிதாக சி.பி.எஸ்.இ பள்ளி ஆரம்பிப்பதற்கு மாநில அரசிடம் அனுமதி பெறத் தேவையில்லை’ என்று அரசாணை உள்ளது. ஆனால், ‘ராமச்சந்திரா பப்ளிக் ஸ்கூல் என்ற சி.பி.எஸ்.இ பள்ளிக்கு அனுமதி வாங்க, 70 லட்சம் ரூபாய் வரை லஞ்சம் கொடுத்தோம்’ என்று விக்கிரமராஜா கணக்கு எழுதிவைத்துள்ளார். கட்டுமானப் பணிகளுக்குப் பொருள்கள் வாங்கியதில் விலையை 10 மடங்கு அதிகமாகக் காட்டியுள்ளார். இந்த மோசடியை ஆதாரத்துடன் கண்டுபிடித்தோம்’’ என்றார்.

‘2015-16-ல் பள்ளியின் மொத்த வருமானமே 13 கோடி ரூபாய்தான். அதில்தான் ஊழியர் சம்பளம், கட்டடச் செலவு எல்லாமே. அப்படியிருக்கும்போது, எப்படி 13 கோடி ரூபாய் ஊழல் செய்யமுடியும்?’ என்று விக்கிரமராஜா கேள்வி எழுப்பியுள்ளார்.

ஒட்டுமொத்த விகடனுக்கும் ஒரே ஷார்ட்கட்!

விக்கிரமராஜாவுக்கு எதிராக வரிசைகட்டும் புகார்கள்

இதுகுறித்து, ஆய்வுக்குழு உறுப்பினரும் பள்ளியின் முன்னாள் தாளாளருமான ராஜ்குமாரிடம் விளக்கம் கேட்டோம். ‘‘ஊழியர்களின் சம்பளத்துக்கு ஆறு கோடி ரூபாய் செலவாகிவிடும் என்பது உண்மைதான். மீதம் ஏழு கோடி ரூபாய். அத்துடன், பழைய டெபாசிட் தொகை ஆறு கோடி ரூபாய். இந்த இரண்டையும் விக்கிரமராஜா பயன்படுத்தியுள்ளார். மேலும், சங்கத்திலிருந்து மூன்றரை கோடி ரூபாயை எடுத்துள்ளார். ஆகமொத்தம், பதினாறரை கோடி ரூபாய். இவைபோக, அந்த வருடத்தில் மட்டும், பள்ளியின் செலவுக்கணக்கு என 2 கோடியே 26 லட்சம் ரூபாயை அவர் கடனாக வைத்துவிட்டுப் போயுள்ளார். சங்க விதிமுறைகளின்படி, பள்ளியின் தாளாளர் ஆயிரம் ரூபாய்க்குமேல் ரொக்கமாக வரவு செலவு வைத்துக்கொள்ளக்கூடாது. செக், டி.டி என வங்கிப் பரிவர்த்தனைதான் செய்யவேண்டும். இவர்களோ, 35 லட்சம் ரூபாய்க்கான வரவு செலவைக்கூட கையெழுத்திடப்படாத சாதாரண வவுச்சர்களில் எழுதிவைத்துக் கணக்குக் காட்டுகிறார்கள். இதற்கு, சங்கக் கூட்டத்தில் ஒப்புதல் கிடைக்காது. எனவே, ஒப்புதல் பெற்றதாகப் பொய்யான ஆவணங்களைத் தயார் செய்துள்ளனர். இதுகுறித்து கேள்வி எழுப்பியவர்களை விக்கிரமராஜாவின் ஆட்கள் அடித்து உதைத்த வழக்கும் உள்ளது’’ என்றார்.

விக்கிரமராஜாவுக்கு எதிராக வரிசைகட்டும் புகார்கள்

இந்த முறைகேடுகளை விசாரிக்க, ‘சங்க மீட்புக் குழு’வை ஏற்படுத்தி, ஒருங்கிணைப்பாளராகச் செயல்பட்ட கண்ணன், ‘‘நெல்லை தூத்துக்குடி நாடார் மகமை பரிபாலன சங்கத்துக்குச் சொந்தமான 500 கோடி ரூபாய் சொத்துக்களை அபகரிக்க, சங்கத்தின் செயலாளர் சந்திரன் ஜெயபாலும், பள்ளியின் தாளாளர் விக்கிரமராஜாவும் ராமச்சந்திரா அறக்கட்டளையை 2014-ல் முறைகேடாக ஆரம்பித்தனர். சங்கத்துக்குச் சொந்தமான ஐந்து ஏக்கர் 84 சென்ட் இடத்தில், ஒரு ஏக்கர் 54 சென்ட் இடத்தை சி.பி.எஸ்.இ பள்ளிக்குக் குத்தகை கொடுப்பது, அதற்கு மாத வாடகையாக 100 ரூபாய் கொடுப்பது என 2015-ல் ஆவணங்கள் தயாரித்துள்ளனர். அதை நாங்கள் கண்டுபிடித்து, 2015 டிசம்பரிலேயே புகார் கொடுத்தோம். அதன்பின், அறக்கட்டளை மற்றும் குத்தகை ஒப்பந்தம் ரத்துசெய்யப்பட்டது’’ என்றார்.

அறக்கட்டளை விஷயத்தில் தன்மீது கூறப்படும் குற்றச்சாட்டுக்குப் பதில் அளித்துப் பேசிய சந்திரன் ஜெயபாலும் விக்கிரமராஜாவையே குறை சொல்கிறார். ‘‘சங்கத்தில் ஏற்பட்ட வழக்குப் பிரச்னை ஒன்றினால், பள்ளியின் செயல்பாடே முடங்கும் சூழல் ஏற்பட்டது. இதையடுத்தே பள்ளி நிர்வாக வசதிக்காகப் புதிதாக அறக்கட்டளை மற்றும் வங்கிக்கணக்குத் தொடங்கினோம். ஆனால், விக்கிரமராஜா தவறான நோக்கங்களோடு செயல்படுவது தெரிந்து, அவரை எதிர்த்தேன். சங்கத்தின் 15 ஆயிரம் உறுப்பினர்களுக்குச் சொந்தமான 500 கோடி ரூபாய் சொத்தை அவ்வளவு எளிதில் யாரும் அபகரித்துவிட முடியாது. விக்கிரமராஜா, ஒரு பெண் சகவாசத்தால் நிர்வாகத்தைச் சீர்குலைத்தார். எனவே, சம்பந்தப்பட்ட வர்கள்மீது நடவடிக்கை எடுத்தோம். அந்தக் கோபத்தில் எங்கள் மீதே அவதூறு கிளப்புகிறார் விக்கிரமராஜா’’ என்றார்.

இந்தக் குற்றச்சாட்டுகள் குறித்து விக்கிரமராஜாவிடம் நாம் விளக்கம் கேட்டபோது, ‘‘எல்லாமே உண்மைக்குப் புறம்பானவை. என்மீது இப்போது குற்றம் சுமத்தும் ராஜ்குமார்தான், 2015-ல், சங்கத் தலைவர் பத்மநாபன்மீதும் என்மீதும் சேர்த்து 18 கோடி ரூபாய் ஊழல் குற்றச்சாட்டைக் கிளப்பினார். அப்போது, ‘சங்கத்தில் எந்த ஊழலும் நடக்கவில்லை’ என்று மறுத்த பத்மநாபன், இப்போது ராஜ்குமாருடன் சேர்ந்துகொண்டு என்மீது ஊழல் புகார் கூறுகிறார். கூடுதல் விவரங்களுக்கு, நெல்லை தூத்துக்குடி நாடார் மகமை பரிபாலன சங்கத்தின் துணைத் தலைவர் ஆனந்தராஜிடம் பேசுங்கள்” என்றார்.

விக்கிரமராஜாவுக்கு எதிராக வரிசைகட்டும் புகார்கள்

ஆனந்தராஜிடம் பேசியபோது, ‘‘விக்கிரமராஜாவுடன் இணைத்துப் பேசப்படும் பெண்மணி, பள்ளியின் முன்னேற்றத் திட்டங்களில் ஆர்வமாகப் பங்கெடுத்துவந்தார். அவர்களுக்குள் தவறான தொடர்பு எதுவுமில்லை. ரொக்கமாகப் பணம் கொடுத்தால், குறைந்த விலைக்கு சிமென்ட் தருவதாக விற்பனையாளர் சொன்னதால், ரொக்கமாகக் கொடுத்தோம். 2014-லேயே பொருளாளர் மாரி தங்கம், தலைவர் பத்மநாபன், செயலாளர் சந்திரன் ஜெயபால் ஆகியோர்தான், ராமச்சந்திரா அறக்கட்டளையை உருவாக்கினர். இவர்கள், தங்களின் வாரிசுகளே அறக்கட்டளை வாரிசுகளாகவும் இருப்பார்கள் என்றெல்லாம் ஆவணம் தயார் செய்து, சங்கத்தின் 500 கோடி ரூபாய் சொத்தையும் அபகரிக்க முயற்சி செய்தனர். வணிகர் சங்க விவகாரங்களில் விக்கிரமராஜாவுக்கு எதிராக இருக்கும் த.வெள்ளையனின் தம்பிதான் பத்மநாபன். இவர், பழைய பகையை மனதில் வைத்து, ராஜ்குமாரைத் தூண்டிவிட்டு ஊழல் குற்றச்சாட்டுகளைக் கூறுகிறார்’’ என்றார்.

சங்கத்தின் தலைவர் பத்மநாபன், ‘‘ஆய்வுக்குழுவின் ஆதாரபூர்வ தகவல்களைப் பார்த்தபிறகே, விக்கிரமராஜாமீது நடவடிக்கை எடுத்தேன். ஓர் உதாரணம்... பள்ளிக் கட்டடப் பணிக்காக 125 லோடு மணல் அடித்ததாக விக்கிரமராஜா சொல்கிறார். ஆனால், மணல் கொண்டுவரப் பயன்படுத்தியதாக அவர் கொடுத்துள்ள வாகனங்களின் பதிவு எண்களைச் சோதித்தோம். எல்லாம் ஸ்கூட்டர், வேன், கார் எனச் சம்பந்தமே இல்லாத வாகனங்களின் எண்களாக இருக்கின்றன. இப்படி ஒவ்வொன்றிலும் மோசடி. போலீஸில் புகார் கொடுத்துவிட்டோம். இனி அவர்கள் பார்த்துக்கொள்வார்கள்’’ என்றார்.

எல்லோரும் கல்வி அறிவு பெறவேண்டும் என்ற உயரிய நோக்கத்துடன் பள்ளியைத் தொடங்கிய சமுதாயப் பெரியவர்களின் ஆன்மா, தவறு செய்பவர்களை மன்னிக்குமா?

- த.கதிரவன், படம்: தி.விஜய்