<p>நியூசிலாந்தைச் சேர்ந்த ஒருவர், ஆர்ட்டிஃபிஷியல் இன்டெலிஜென்ஸைப் (A.I)பயன்படுத்தி ஒரு ‘விர்ச்சுவல்’ அரசியல்வாதியை (உ.தா: ரோபோவைப்போல)உருவாக்கியிருக்கிறார். கொள்கைகள் மற்றும் மக்கள் பிரச்னைகள் பற்றிய கேள்விகளுக்கு அது ‘நச் நச்’ என பதில் சொல்லுமாம். ‘சாம்’ எனப்படும் இதை, அடுத்த தேர்தலில் நிற்கவைக்கவும் ஐடியா இருக்கிறதாம். நம்மூர் தலைவர்களிடம் கற்றுக்கொண்டால்தானே, அது கச்சிதமான அரசியல்வாதி ஆகமுடியும்.</p>.<p>ஒரு A.I அரசியல்வாதி இருக்கும்வரையில் ஓகே. அடுத்தடுத்து நிறைய விர்ச்சுவல் அரசியல்வாதிகள் இப்படி உருவாகிவிட்டால்? கோஷ்டி அரசியல் பாடத்தை காங்கிரஸ்காரர் களிடமிருந்து வாங்கி A.I அரசியல்வாதியின் காதில் ஓதவேண்டும்.<br /> <br /> </p>.<p>துருவித் துருவி எத்தனை கேள்விகள் கேட்டாலும்... இடியே விழுந்தாலும்கூட, ‘அது கொஞ்சம் தள்ளித்தானே தம்பி விழுந்துச்சு’ என சிரித்தபடி போஸ் தருபவர், ‘தொப்பி’ அண்ணன் தினகரன். அவருடைய பொறுமை குணத்தை அந்த விர்ச்சுவல் அரசியல்வாதிக்கு கண்டிப்பாக ஊட்ட வேண்டும்.<br /> <br /> </p>.<p>சுனாமியே வந்தாலும் அலட்டிக்கொள்ளாமல், ‘சுனாமியை எழுப்பிய வங்கக் கடலையும், இந்தோனேஷிய பூகம்பத்தையும் வன்மையாகக் கண்டிக்கிறோம்’ என அறிக்கைவிட்டுவிட்டு அமைதியாகிவிடும் செயல் தலைவர் ஸ்டாலினின் ‘டேக் இட் கூல்’ குணத்தையும் புகட்ட வேண்டும்.<br /> <br /> </p>.<p>கேட்ட கேள்விக்கு சட்டென ஒரு வரியில் பதில் சொல்லிவிட்டால், அப்புறம் அரசியல்வாதிக்கு என்ன மதிப்பு? ஒன்றுமில்லாத விஷயத்தையும் பில்டப் கொடுத்து ஊதிப் பெரிதாக்கும் பி.ஜே.பி தலைவர்களின் வித்தைகளையும் அதற்குக் கற்றுக்கொடுக்க வேண்டும்.<br /> <br /> </p>.<p>‘பாவம், அவரே கன்ஃபியூஸ் ஆகிட்டாரு’ எனப் புலம்பவைக்கிற மாதிரி பேட்டி கொடுக்காமல், என்ன அரசியல்வாதி? தமிழக அமைச்சர்களின் டி.வி பேட்டிகளை ஓடவிட்டு, டிரெய்னிங் கொடுக்க வேண்டும்.<br /> <br /> </p>.<p>எல்லாம் சரி. ‘செந்தமிழன் சீமான் இந்த லிஸ்ட்லயே இல்லையே’ என்கிறீர்களா? வேணாம் பாஸ்! ஆர்ட்டிஃபிஷியல் இன்டெலிஜென்ஸ் பாவம்!</p>.<p><span style="color: rgb(255, 102, 0);"><strong>ஓவியம்: பிரேம் டாவின்ஸி</strong></span></p>
