Published:Updated:

விசாரணை - கவிதை

விசாரணை - கவிதை
பிரீமியம் ஸ்டோரி
விசாரணை - கவிதை

கவிதை: ஜெ.ஃபிரான்சிஸ் கிருபா, ஓவியம்: ரமணன்

விசாரணை - கவிதை

கவிதை: ஜெ.ஃபிரான்சிஸ் கிருபா, ஓவியம்: ரமணன்

Published:Updated:
விசாரணை - கவிதை
பிரீமியம் ஸ்டோரி
விசாரணை - கவிதை

காட்சிப் பசியில் கண்கள்
வயிறு காய்ந்து கிடக்கையில் - அதன்
கனவுப் பசியில் யாரோ - அவன்
குடலைக் கொடியென உருவி
மாலையாகப் பின்னிக்கொண்டிருக்கிறார்கள்
எங்கோ மறைந்திருந்தபடி.

உடல் என்னுடையதுதான் என்று
ஒப்புக்கொண்ட பிறகும்
சடலத்தை அவனிடம் ஒப்படைக்க மறுக்கும்
தடயவியல் நிபுணர்கள்
அவர்தம் தாடைகளைத் தாறுமாறாகச் சொறிந்தபடி
ஆய்வு செய்கிறார்கள் வேறு வேறு கோணத்தில்.

அநாதையாகிப்போன ஆசைகள்
நிராசைகளை விட்டு வெளியேறும் இச்சையோடு
வேறு களம் தேடி
அடியெடுத்து வைக்கும்போதெல்லாம்
தடுத்து நிறுத்திவைக்கப்படுகின்றன
குறுக்கு விசாரணைகள் மேற்கொள்ளும் பொருட்டு.

நேரம் காலம் மறந்த இதயத்தில்
உறைந்துபோன ஒரு கடிகாரத்தை
துடித்தோடும்படி மிரட்டுகிறார்கள்
அதட்டுகிறார்கள் அதிகாரத் தோரணையோடு

மிரள்கிறது அது.

விசாரணை - கவிதை

வெளி சாட்சிகளையும் அழைத்து வந்து
சடலத்தை சோதிக்கச் செய்கிறார்கள்
நாசித் துவாரங்களுக்கு மிக அருகே
புறங்கையை நீட்டியும்
நாடித் துடிப்புகளில் ஓடிய குருதியாறுகளை
மணிக்கட்டில் மறித்தும்
பரிசோதிக்கும் சாட்சிகளில்
கடன் கொடுத்தவர்களில் சிலர்
உயிர் இருக்கிறதென்று வாதாடுகிறார்கள்
அவனிடம் கடன் வாங்கியவர்களில் சிலர்
இறந்துவிட்டானென்று போராடுகிறார்கள்
ஒரு முடிவுக்கு வர முடியாத உயிரியல் நிபுணர்கள்
ஆளுக்கொரு `கட்டஞ்சாயா' ஆர்டர் செய்கிறார்கள்
புகைக் குச்சிகளை
குதத்தில் செருகிப் பற்றவைத்துப் புகைத்தபடி
ஆழ்ந்த சிந்தனையில் ஆழ்ந்துபோகிறார்கள்

இறந்தவன் உயிர்த்தெழுந்து
நான் இறந்துவிட்டேனென்று
ஒப்புதல் வாக்குமூலம் வழங்காத வரையில்
அதிகாரிகள்
விட்டுவிடப்போவதில்லை
இந்த விசாரணையை
என்பது மட்டும் தெள்ளத்தெளிவாகத் தெரிகிறது
இறந்து மட்டும் போனவனுக்கு!