Published:Updated:

“இந்த ஆண்டு பொங்கல் கசக்கும்!”

ஒட்டுமொத்த விகடனுக்கும் ஒரே ஷார்ட்கட்

Use App
“இந்த ஆண்டு பொங்கல் கசக்கும்!”
“இந்த ஆண்டு பொங்கல் கசக்கும்!”

1,400 கோடி ரூபாய் பாக்கியால் கண்ணீர்விடும் கரும்பு விவசாயிகள்

பிரீமியம் ஸ்டோரி

‘‘கடந்த ஆண்டு இதே நேரத்தில் ஒரு கிலோ சர்க்கரையின் விலை, 27 ரூபாய். இன்று 39 ரூபாயாக உயர்ந்துவிட்டது. இதனால் சர்க்கரை ஆலைகளுக்கு நல்ல லாபம் கிடைக்கிறது. ஆனால், எங்களுக்குத் தரவேண்டிய 1,400 கோடி ரூபாயைத் தனியார் சர்க்கரை ஆலை முதலாளிகள் தர மறுக்கிறார்கள். அந்த நிலுவைத் தொகையை வாங்கித்தர தமிழக அரசு எந்த முயற்சியும் செய்யவில்லை. இந்த ஆண்டு, எங்களுக்கு கசப்பான பொங்கலாகத்தான் இருக்கும்’’ என்று கதறுகிறார்கள் தமிழகக் கரும்பு விவசாயிகள்.

இதுகுறித்து தமிழ்நாடு கரும்பு விவசாயிகள் சங்கத்தின் மாநிலப் பொதுச்செயலாளர் ரவீந்திரனிடம் பேசினோம். ‘‘தமிழகத்தில் 24 தனியார் சர்க்கரை ஆலைகளும், 18 கூட்டுறவு மற்றும் பொதுத்துறை சர்க்கரை ஆலைகளும் இயங்கிவருகின்றன. இந்த ஆலைகளுக்கு நாங்கள் அனுப்பும் கரும்புக்கு என்ன விலை தருவது என்பதைத் தமிழக அரசுதான் நிர்ணயம் செய்கிறது. ஆனால், ‘கரும்புக்கு விலை நிர்ணயம் செய்யும் உரிமை மாநில அரசுக்கு இல்லை’ என்கின்றன தனியார் சர்க்கரை ஆலைகள். இப்படிச் சொல்லி தனியார் சர்க்கரை ஆலைகள், ஏழை விவசாயிகளின் வயிற்றில் அடிக்கின்றன. இதுவரையிலும் ஆயிரக்கணக்கான விவசாயிகளுக்கு 1,400 கோடி ரூபாய் பாக்கி வைத்துள்ளன.

“இந்த ஆண்டு பொங்கல் கசக்கும்!”

ஜெயலலிதா முதல்வராக இருந்தபோது, ‘அரசு பரிந்துரைத்த விலையைத் தனியார் கரும்பு ஆலைகளிடம் பெற்றுத்தருவோம்’ என்று சட்டமன்றத்தில் வாக்குறுதி அளித்தார். அப்போதையத் தொழில்துறை அமைச்சரான தங்கமணியும், இப்போதைய தொழில்துறை அமைச்சரான சம்பத்தும், ‘அரசு நிர்ணயித்த விலையைப் பெற்றுத்தருவோம்’ என்று வெறும் வாய்ச்சொல்லில்தான் வீரத்தைக் காட்டுகிறார்கள். கடந்த மார்ச் மாதம், தலைமைச் செயலகத்தில் முத்தரப்புப் பேச்சுவார்த்தை நடந்தது. அப்போது, ‘விவசாயிகளுக்குச் சேரவேண்டிய நிலுவைத்தொகையைக் கொடுத்துவிடுகிறோம்’ என்று தனியார் சர்க்கரை ஆலை முதலாளிகள் உறுதியளித்தனர். ஆனால், வாக்குறுதிப்படி இன்றுவரை கொடுக்கவில்லை.

தமிழக அரசின் அலட்சியத்தால், விவசாயிகள் மரணமும் தொடர்கதையாகி விட்டது. 1966-ம் ஆண்டின் கரும்புக் கட்டுப்பாட்டு உத்தரவுச் சட்டத்தின்படி, கரும்பு கொள்முதல் செய்த 14 நாள்களுக்குள் விவசாயிகளுக்குப் பணம் கொடுத்துவிட வேண்டும்; அப்படிப் பணம் கொடுக்கவில்லை யென்றால், காலதாமதமாகிற ஒவ்வொரு நாளுக்கும் 15 சதவிகிதம் வட்டியுடன் சேர்த்து விவசாயிகளுக்கு ஆலை நிர்வாகம் பணம் கொடுக்க வேண்டும். பாக்கியை வசூல்செய்யும் அதிகாரம் மாவட்ட ஆட்சியருக்கு உண்டு. சட்டங்களும், அரசாணையும், அதிகாரமும் இருந்தும், விவசாயிகளின் வயிற்றில் அடிக்கும் ஆலைகளின் நண்பனாகவே எடப்பாடி அரசு உள்ளது’’ என வருந்துகிறார் ரவீந்திரன்.

“இந்த ஆண்டு பொங்கல் கசக்கும்!”

ஏன் இந்தப் பிரச்னை? ஒவ்வோர் ஆண்டும் கரும்புக்கான விலையை மத்திய அரசு நிர்ணயிக்கிறது. இது, ‘நியாயமான ஆதாய விலை’ எனப்படுகிறது. ஒவ்வொரு மாநிலத்திலும் தொழிலாளர் கூலி, பயிரிடும் செலவு, கரும்பை வெட்டி ஆலைக்கு எடுத்துச் செல்வதற்கான போக்குவரத்துக் கட்டணம் ஆகியவற்றில் வித்தியாசங்கள் இருப்பதுண்டு. இவற்றை அடிப்படையாக வைத்து மாநில அரசுகள், தங்கள் மாநிலத்தில் இந்த விலையை மறுநிர்ணயம் செய்கின்றன. தமிழக அரசும் இதைச் செய்கிறது. இது ‘பரிந்துரை விலை’ எனப்படுகிறது. உதாரணமாக, கடந்த ஆண்டு மத்திய அரசு ஒரு டன் கரும்புக்கு 2,300 ரூபாய் விலை நிர்ணயித்தது. தமிழக அரசு இதை 2,850 என 550 ரூபாய் உயர்த்தி விலை நிர்ணயம் செய்தது.

ஆனால், இந்த விலை வித்தியாசத்தைத் தனியார் சர்க்கரை ஆலைகள் ஏற்க மறுக்கின்றன. ‘கரும்புக்கான விலையை நிர்ணயம் செய்து அறிவிக்கும் உரிமை மாநில அரசுக்கு இல்லை’ என்று சில சர்க்கரை ஆலைகள் கோர்ட்டுக்கும் போயிருக்கின்றன. கடந்த மூன்று ஆண்டுகளாக இப்படி மாநில அரசு பரிந்துரைத்தக் கூடுதல் விலையைக் கொடுக்காததால் சேர்ந்துள்ள பாக்கிதான் 1,400 கோடி ரூபாய். மற்ற மாநிலங்களில் மாநில அரசு நிர்ணயிக்கும் விலை, விவசாயிகளுக்குக் கிடைத்துவிடுகிறது. தமிழகத்தில் மட்டும் இது பிரச்னையாகவே உள்ளது.

“இந்த ஆண்டு பொங்கல் கசக்கும்!”

‘‘இன்னொரு புறம், ‘வருவாய்ப் பங்கீட்டு முறை’ என்கிற ஒன்றை மத்திய அரசு அறிவித்துள்ளது. அந்த முறையைக் கொண்டுவந்தால், என்ன விலைக்கு விவசாயிகளிடம் ஆலை நிர்வாகம் கரும்பை எடுத்துள்ளது என்பது தெரியாமல்போய்விடும்; அவர்கள் என்ன விலை கொடுக்கிறார்களோ அதை, வாயை மூடிக்கொண்டு வாங்க வேண்டிய சூழல் ஏற்படும். இந்தப் புதிய முறையை, பி.ஜே.பி ஆள்கிற உத்தரப்பிரதேச மாநிலம்கூட ஏற்றுக்கொள்ளவில்லை. கரும்பு வெட்டும் சீசன் ஆரம்பமாகும் அக்டோபர் இறுதியிலோ, நவம்பர் ஆரம்பத்திலோ விலையை அறிவிப்பது தமிழக அரசின் வழக்கம். ஆனால், இந்த ஆண்டு இன்னும் விலை அறிவிக்கப்படவில்லை. மத்திய அரசு இந்த சீசனுக்கான கரும்பு விலை, ஒரு டன்னுக்கு 2,400 ரூபாய் என அறிவித்துவிட்டது. கடந்த ஆண்டு மத்திய அரசு அறிவித்த விலையோடு 550 ரூபாய் உயர்த்தி தமிழக அரசு அறிவித்தது. இந்த ஆண்டு 600 ரூபாய் உயர்த்தி அறிவிக்க வேண்டும்’’ என்கிறார் ரவீந்திரன்.

இப்படி அரசு விலை நிர்ணயம் செய்வதும், அதைச் சர்க்கரை ஆலைகள் கொடுக்க மறுப்பதுமான கண்ணாமூச்சி தொடரவே, கரும்பு பயிரிடும் எண்ணத்தையே விவசாயிகள் கைவிட்டு வருகின்றனர். 2012-13-ம் ஆண்டில் தமிழகத்தில் 21 லட்சத்து 30 ஆயிரம் ஏக்கரில் கரும்பு பயிரிடப்பட்டது; இப்போது வெறும் 8 லட்சம் ஏக்கரில்தான் பயிரிடப்பட்டுள்ளது. இதனால் சர்க்கரை உற்பத்தியும் தாறுமாறாகக் குறைந்துவிட்டது. 2012-13-ம் ஆண்டில் தமிழகத்தின் சர்க்கரை உற்பத்தி, 9.55 லட்சம் டன்; இந்த ஆண்டு இது வெறும் 3 லட்சம் டன்னாகக் குறைந்துவிட்டது. இது சர்க்கரை விலையைத் தாறுமாறாக உயர்த்தும் ஆபத்தை ஏற்படுத்தியுள்ளது.

ஒட்டுமொத்தமாக சர்க்கரை ஆலைகள் வைத்திருக்கும் பாக்கித் தொகை ஒரு பிரச்னை என்றால், ஒவ்வொரு மாவட்டத்திலும் வித்தியாசமான பிரச்னைகளும் உள்ளன. மார்க்சிஸ்ட் கம்யூனிஸ்ட் கட்சியின் சிவகங்கை மாவட்டச்செயலாளர் மு.கந்தசாமி, “சிவகங்கை மாவட்டத்தில் உள்ள சக்தி சர்க்கரை ஆலை, விவசாயிகளுக்கு கொடுக்க வேண்டிய பாக்கித்தொகை 50 கோடி ரூபாய். விவசாயிகள் வங்கியில் வாங்கிய கடனுக்காக, ஆலை பிடித்தம் செய்த பணத்தையும் வங்கிகளுக்குச் செலுத்தாமல், சுமார் 7.5 கோடி ரூபாயை ஏமாற்றியிருக்கிறது. அதை வாங்கிக்கொடுப்பதில், மாவட்ட நிர்வாகமும் அக்கறை காட்டவில்லை’’ என்றார்.

“இந்த ஆண்டு பொங்கல் கசக்கும்!”

சக்தி சர்க்கரை ஆலையின் மேலாளர் ஆறுமுகத்திடம் பேசினோம். ‘‘சர்க்கரை விலை மார்க்கெட்டில் வீழ்ச்சியடைந்துள்ளது. மேலும், சர்க்கரை ஆலைகளில் எத்தனால் எடுக்க மாநில அரசு தடைவிதித்துள்ளது. இதுபோன்ற பிரச்னைகளால், விவசாயிகளுக்குப் பணம் கொடுக்க முடியாமல் திணறிவருகிறோம். மத்திய அரசு அறிவித்த பங்கீடு முறை வந்தால்தான், தனியார் சர்க்கரை ஆலைகள் வருங்காலங்களில் செயல்பட முடியும்” என்றார்.

தமிழக தொழில்துறை அமைச்சர் சம்பத்திடம் கேட்டபோது, “தனியார் சர்க்கரை ஆலைகளின் உரிமையாளர்களுடன் கூட்டம் நடத்தி, அவர்களைக் கடுமையாக எச்சரிக்கை செய்ய உள்ளேன். நிச்சயமாக, பொங்க லுக்குள் கரும்பு விவசாயிகளுக்குப் பணம் பெற்றுத் தர அரசு நடவடிக்கை எடுக்கும்’’ என்றார் உறுதியுடன்.

விவசாயிகளுக்குக் கரும்பு கசந்தால், மக்களுக்குச் சர்க்கரை கசக்கும் ஆபத்து இருப்பதை அரசு புரிந்துகொள்ள வேண்டும்.

- தெ.பாலமுருகன்
படங்கள்: சாய் தர்மராஜ்

அரசு வைத்துள்ள 218 கோடி ரூபாய் பாக்கி!

னியார் சர்க்கரை ஆலைகள் இப்படிச் செய்கின்றன என்றால், அரசு நிர்ணயம் செய்த விலையை விவசாயிகளுக்குத் தராமல் கூட்டுறவு சர்க்கரை ஆலைகளும் சுமார் 218 கோடி ரூபாய் பாக்கி வைத்துள்ளன. நஷ்டத்தில் இயங்கும் 11 கூட்டுறவு மற்றும் பொதுத்துறை சர்க்கரை ஆலைகள், கடந்த நான்கு ஆண்டுகளாக இவ்வளவு தொகையைத் தராமல் வைத்துள்ளன. கடந்த ஆண்டு நவம்பர் மாதம் இதற்காக ஓர் ஆலோசனைக் கூட்டத்தைக் கூட்டிய தமிழக முதல்வர் எடப்பாடி பழனிசாமி, விவசாயிகளுக்கு இந்தப் பாக்கியை வழங்குவதற்காக 218 கோடி ரூபாயை சிறப்புக் கடனாக வங்கிகளிலிருந்து பெற்று சர்க்கரை ஆலைகளுக்கு வழங்குவதாக அறிவித்தார். அரசே உறுதியளித்திருப்பதால், இந்தப் பாக்கி பொங்கலுக்குள் கிடைத்துவிடும் என நம்புகிறார்கள் விவசாயிகள்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு