பிரீமியம் ஸ்டோரி

பிரிய டைரிகளின் குறிப்புகள்

தாள்கள் மிச்சம் இருக்கின்றன
நினைவுகள் நிறைய இருக்கின்றன
மை தீர்ந்துவிடவில்லை
எழுதுவதற்கான வலு இல்லை என்பதால்
டைரிகள் பட்டினி கிடக்கின்றன
பால் கணக்கோ
மளிகைக் கணக்கோ எழுதி
அதை ஆசுவாசப்படுத்த வேண்டும்
மேலும் கடன் கணக்கை எழுதி
வாய் பிளக்க வைத்துவிடக் கூடாது
கால ஓட்டத்தில்
காலாவதியாகிப்போன டைரியில்
வீட்டுப்பாடல் எழுதிச் செல்லும்
பிள்ளைகளை ரசிக்கும் ஆசிரியர்கள்
பாக்கியவான்கள்
சித்திரகுப்தனின் ஏடென
குழந்தைகளின் சித்திரங்களாய் நிறைந்த
டைரி கிடைத்தால் மட்டும்
என்னைக் கண்டுபிடித்து
என்னிடம் ஒப்படைத்துவிடுங்கள்

- விகடபாரதி

சொல்வனம்

குயில்

பறவைகளின்
கீச்சொலி கேட்டறியா
நகரத்துப் பேரனின் செவியை
சிறகொன்றால்
சுத்தம் செய்கின்றாள்
கிராமத்துப்  பாட்டி.
பரவசம் கொள்கின்றான்  செவிக்குள் குயிலொன்று கூவுவதாய்க் கூறி.

- தமிழ் தென்றல்

பனி

இங்கே பண்ணையார்கள்
இல்லாத போதும்
கைகளைக் கட்டிக்கொள்கிறேன்

நான் பாரதி
இல்லாத போதும்
முண்டாசு கட்டிக்கொள்கிறேன்

பதற்றமான சூழல் எதுவும்
இல்லாத போதும்
உதடுகள் துடிக்கின்றன

சிக்கிமுக்கியின் பாதையில்
பயணிக்கின்றன 
உள்ளங்கைகள்

இது பனிவிழும் நாளிதழ்களின்
பரபரப்பில்லா 
தலைப்புச்செய்திகள்
 
- ரா.பிரசன்னா

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு