Published:Updated:

நித்யா என்கிற எலுமிச்சம்பழம்!

விகடன் விமர்சனக்குழு

ஒட்டுமொத்த விகடனுக்கும் ஒரே ஷார்ட்கட்

Use App
நித்யா என்கிற எலுமிச்சம்பழம்!
நித்யா என்கிற எலுமிச்சம்பழம்!

ஓவியம்: கோ.ராமமூர்த்தி

பிரீமியம் ஸ்டோரி

ர் ஊரில் எலுமிச்சம்பழத் தோட்டம் ஒன்று இருந்தது. அதில் ஒரு மரத்தில் நிறையப் பூக்கள் இருந்தன. அந்தப் பூக்களில் ஒன்றுதான் நம் கதையின் ஹீரோயின், நித்யா.  

நித்யா என்கிற எலுமிச்சம்பழம்!

நித்யா என்கிற அந்தப் பூ, அந்தத் தோட்டத்தின் பிற மரங்களிலிருந்த காய்களையும் பழங்களையும் பார்த்ததும், ‘இப்படி நாமும் எப்போது காயாக, கனியாக மாறுவோம்’ என்று ஏங்கியது. தன் தாயாகிய மரத்திடம். ‘‘நான் எப்போது கனியாக மாறுவேன். மஞ்சள் நிறத்தில் உருண்டு திரண்டு மனம் வீசும் கனியாகச் சீக்கிரமே மாற வேண்டும்’’ என்றது.

‘‘மாறுவாய் நித்யா. எதுவும் சீக்கிரமாக நடந்துவிட வேண்டும் என நினைக்காதே. சீரான வளர்ச்சியே சிறப்பானது’’ என்றது தாய் மரம்.

நாள்கள் நகர்ந்தன. பூவாகிய நித்யா, இப்போது பச்சை நிறத்தில் காயாக மாறியிருந்தாள். மற்ற காய்களைவிட தான் பெரியதாக, சிறப்பாக இருக்க, தாய் மரத்திடமிருந்து உணவுச் சத்துகளை அதிகமாக எடுத்துக்கொண்டாள்.

ஏனெனில், அங்கே வந்த ஒரு குருவி, ‘‘இங்கே கனியாக மாறுபவர்களை வெளியே எடுத்துச்செல்வார்கள். அந்த உலகம் மிகப் பெரியது. பார்க்கப் பார்க்கப் பிரமிப்பாக இருக்கும். மனிதர்கள் விலைகொடுத்து வாங்குவார்கள்’’ என்று சொன்னது.   

நித்யா என்கிற எலுமிச்சம்பழம்!

மற்றவர்களைவிட தனது மதிப்பு அதிகமாக இருக்க வேண்டும் என நித்யா நினைத்தது. எனவே, இப்படிச் செய்தது.

‘‘மற்ற காய்களின் பங்கையும் நீ எடுத்துக்கொள்கிறாய் நித்யா. இது சரியல்ல!’’ என்றது தாய் மரம்.

‘‘என் சாமர்த்தியத்தைப் பயன்படுத்திக்கொஞ்சம் அதிகமாக எடுத்துக்கொள்கிறேன். இதனால், அவர்களுக்குப் பெரிய பாதிப்பு இல்லையே. இது எப்படித் தவறாகும்?’’ எனக் கேட்டது நித்யா.

மரம் பதில் ஏதும் சொல்லாமல் புன்னகை செய்தது. விரைவிலே காயாகிய நித்யா, எலுமிச்சம் பழமாக மாறினாள்.

நித்யா காயாக இருந்தபோது அந்தத் தோட்டத்திலிருந்த பழங்கள் அங்கே இல்லை. ஏனெனில், தோட்டத்தின் விவசாயி கனிகளைப் பறித்து விட்டிருந்தார். நித்யா கனியாக மாறியபோது, குண்டான உடலைப் பெற்றிருந்தாள். ‘இந்த விவசாயி நம்மை எப்போது செடியிலிருந்து பறிப்பார். வெளியுலகை எப்போது பார்ப்போம்’ என்று ஆவலுடன் காத்திருந்தது. 

ஒருநாள், விவசாயி எலுமிச்சைப்பழங்களைப் பறித்து, பெரிய கூடையில் போட்டு வண்டியில் ஏற்றினார். நித்யாவுக்கு மகிழ்ச்சியாக இருந்தது. தன்னுடன் கூடையில் இருக்கும் மற்ற பழங்களைப் பார்த்தது. எல்லாமே சற்றுச் சிறிவைதாம். ‘`இந்தக் கூட்டத்திலேயே நான்தான் பெரியவள்’’ என்று பெருமையுடன் சொன்னது.

ஒரு பெரிய சந்தைக்கு அந்தக் கூடை சென்றது. ஒரு கடையில் மற்ற பழங்களோடு நித்யாவும் சேர்ந்தது.

கடைக்கு வந்தவர்களில் பலரும் அந்தப் பழத்தையே முதலில் எடுத்து, ‘‘இது எவ்வளவு?’’ எனக் கேட்டார்கள்.

‘‘மற்ற பழங்கள் மூன்று ரூபாய். இது பெரிய பழம். ஐந்து ரூபாய்’’ என்று சொன்னார் கடைக்காரர்.

நித்யாவுக்குப் பெருமிதம் தாங்கவில்லை. ‘‘பார்த்தீர்களா... உங்களைவிட நான் எவ்வளவு மதிப்புமிக்கவள்’’ என்று சொன்னது.  

மற்ற எலுமிச்சைப்பழங்கள் எதுவும் பேசவில்லை. ஆனால், கடைக்கு வந்தவர்கள் எல்லாம். ‘என்னது ஐந்து ரூபாயா? வேணாப்பா’ எனச் சொல்லிவிட்டு வேறு பழங்களை வாங்கிச் சென்றார்கள்.

அந்த நாள் முழுவதுமே நித்யாவை யாரும் வாங்கவில்லை. அடுத்த நாள், புதிய எலுமிச்சைப்பழங்கள் கடைக்கு வந்துசேர்ந்தன. அதேநேரம் நித்யா நேற்றைவிட இன்று சற்றே வாடியிருந்தது. எனவே, அந்தக் கடைக்காரர், ‘‘இதுவும் நான்கு ரூபாய்தான் எடுத்துக்கங்க’’ எனச் சொல்லி விற்க முயன்றார்.

ஆனால், ‘‘கொஞ்சம் வாடி சுருங்கியிருக்கே’’ எனத் தயங்கியவாறு மக்கள், நித்யாவைத் தவிர்த்தார்கள். அங்கிருந்த மற்ற பழங்கள் கேலியாக, ‘‘ஏய் தள்ளி நில்லு. உன்னால் எங்கள் மதிப்பும் குறைஞ்சுடும்’’ என்றன.

நித்யா மிகவும் வருந்தியது. அன்றும் நித்யாவை யாரும் வாங்காமலே சென்று விட்டனர். மூன்றாம் நாள் இன்னும் சுருங்கிப்போன நித்யாவை இரண்டு ரூபாய்க்கு விற்க முயன்றார் கடைக்காரர். அப்போதும் யாரும் வாங்கவில்லை.

‘‘ச்சே... அன்றைக்கே நான்கு ரூபாய்க்கு விற்று இருக்கலாம். அதிகம் ஆசைப்பட்டதுக்குக் கிடைச்ச பலன் இது’’ என்று முணுமுணுத்த கடைக்காரர், நித்யாவைத் தூக்கிச் சாலையில் வீசினார்.

அங்கிருந்த காய்ந்த இலைகள், அழுகிய காய்களோடு நித்யாவும் சேர்ந்துவிட்டது. ‘‘ச்சே... ஒரு கோயிலின் கருவறைக்கோ, ஒரு வீட்டின் சமையலிலோ இருந்திருக்க வேண்டிய நான், இந்த மனிதனின் பேராசையால் இப்படி யாருக்கும் பயனில்லாமல் குப்பைக்கு வந்துவிட்டேனே’’ என்று கோபமாகக் கூறியது.

அப்போது பக்கத்திலிருந்த ஓர் இலை, ‘‘பேராசை அந்தக் கடைக்காரனுக்கு மட்டும்தானா? தவறு அவனிடம் மட்டுமா இருக்கிறது?’’ எனக் கேட்டது.

நித்யாவால் பதில் எதுவும் பேசமுடியவில்லை. 

நித்யா என்கிற எலுமிச்சம்பழம்!
தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு