Published:Updated:

கசிவு - ஆதிரன்

கசிவு - ஆதிரன்
பிரீமியம் ஸ்டோரி
கசிவு - ஆதிரன்

ஓவியம்: ரவி

கசிவு - ஆதிரன்

ஓவியம்: ரவி

Published:Updated:
கசிவு - ஆதிரன்
பிரீமியம் ஸ்டோரி
கசிவு - ஆதிரன்

மூச்சு முட்டுகிறது இல்லையா
அனைத்து திசைகளிலும் சாலைகள்
நான் காட்சியை மாற்றுகிறேன்
ஓர் இளைப்பாறல். கேளுங்கள்…

கசிவு - ஆதிரன்

கதவைச் சாத்திவிட்டு தளும்பும்
தன் கண்களுக்குள் பாய்கிறாள் தானே
வெளியில் நிற்கும் அவனுக்கு நீச்சல் தெரியாது
இருந்தும் பாய்கிறான் பின்னோடு
பறவைகள் அற்ற மரம்போலொரு அமைதி
சவலையைப்போல அவனைத் தூக்கிக் கொண்டுவந்து
கரையில் கிடத்துகிறாள்
பின் புன்னகைத்துக்கொண்டே மீண்டும் பாய்கிறாள்
வாயெனும் கடலில்
திறனற்ற உடலில் மீறும் வலிமையுடன்
மீண்டும் ஓடுகிறான் கடலை நோக்கி
நீந்துவதாக கற்பனை செய்துகொண்டு
அவள் வீசிய நங்கூரம் வானை நோக்கி
என்பதறியாமல்…

முடித்துக்கொள்ளலாம் சிறு ஓய்வை…

திரும்பவும் சாலையைப் பாருங்கள்
நமது பழைய சாலைகளை.
அவை கனவுச் சுவர்களில் கோழிகளைப்போலவோ
அல்லது மரவேர்களைப்போலவோ அல்லது எதோவொன்றின்
சாயலைத் தொலைத்து அலைந்துகொண்டிருக்கிறன அல்லவா

இனி இந்தச் சிறு மந்திரத்தை ஓதுங்கள்:

உனது காலத்தில் அல்லது வெளியில்
நிகழ்திருக்கவே கூடாத ஒன்று நான்
நெருப்பிலிருந்து வெளியேறும் புகைபோல
கசிந்து வெளியேறுவேன் உலோக மணத்துடன்
என்னை அடையாளப்படுத்த மற்றவர் எதற்கு

மூன்று முறை பிரார்த்தித்த பின்

இடைச்சியும் பால்மணமும் வேறுவேறா
என்கிற கேள்விக்குப் பதிலைப் பற்றி சிந்தியுங்கள்.
உங்களின் பழைய சாலைகளை மோப்பம் செய்ய
இது சிறந்த வழி. நிலத்தைப் பற்றிய கவலையை
உங்களின் பழைய பாதைகளிடம் விட்டுவிடுங்கள்

அவ்வப்போது மூச்சு முட்டும்.
பரவாயில்லை…
மெதுவாய் ஆனால் ஆழ்ந்து வானத்தில் நங்கூரத்தை
எறிந்தவளின் தோல் மணத்தைப் புகையுங்கள்.

கவனம்
ஏதிலி நாளின் ஒன்றில் பழைய பாதைகள்
உங்களைக் கடக்கும்போது கசிந்துவிடுங்கள் அதனுள்.