சொல்வனம்

சிங்கார் சாந்து

இன்னமும் கட கடயா அலஞ்சுகிட்டிருக்கன்

ஐடெக்ஸ் மை டப்பா ஒண்ணு கரும்பச்சக் கண்ணாடி வளையல் ஒரு டசன் ஜாதிமல்லி அஞ்சு மொழம் வசந்தபவன்ல நெய் மைசூர்பா கால் கிலோ

ஃப்ரேம்ல இருந்து ஒதுங்கிடுச்சின்னு ‘கண்ணா ஆப்டிக்கல்ஸ்’ல கொடுத்திருந்த ரெட்டை லென்ஸ் கண்ணாடியும் வாங்கியாச்சு

பாக்கு கலர் சிங்கார் சாந்து மட்டும் எங்கயும் கிடைக்கவேயில்ல கடசியா `ராஜா நாவல்டீஸ்’ல ஒரு எட்டு பார்த்துடலாம்னு போனா `அதலாம் ஓடறதில்லப்பா. இப்பலாம் யாரு வெக்கிறாங்க?’னு சொல்லிட்டாங்க

. படயல் போட்டு கல்பூரம் ஏத்த குச்சிய ஒரசினா ஒண்ணுகூடப் பத்தல நெல்லு வெளக்குல இருந்து ஒருவழியா கல்பூரம் ஏத்தியாச்சு

தேங்காய ஒடச்சா மூலியாப்போச்சு `அது ஒண்ணும் இல்லடா... முருகல் காய்’னு பெரியம்மா தேத்திவிட்டாங்க

ஆனா, எனக்குத்தானே தெரியும் எத்தன தடவ கொட்டு வாங்கியிருக்கன்

மன்னிச்சுடுமா அடுத்தமுற எப்படியாவது சிங்கார் சாந்து வாங்கியாந்துர்றேன்னு நெடுஞ்சாண்கிடையா விழுந்தா போட்டாவுக்குப் பின்னாடி இருந்து உத்தரவு குடுக்கிறாங்க. - இயற்கைசிவம்

. பிறழ்வு

மனம் பிறழ்ந்த அந்த முதிர் வயதுக்காரி உடலெல்லாம் வாய் இருப்பதுபோல் நினைத்துக்கொண்டு யார் கடந்து போகையிலும் உமிழ்வாள். எனக்குத்தான் குழந்தை கக்குவதைப்போலிருக்கும்.

- தோழன் பிரபா

. ஒவ்வொரு முறையும்

உன் ஆடைகளைத் துவைக்கும்போதும் வேறோர் உலகத்திற்குச் சென்றுவிடுகிறேன் நான்...

யாருமற்ற அப்பொழுதுகளில் உன்னாடைகளில் உள்ள வியர்வை நெடியும் சிகரெட் துகள்களும் மது வாசனையும் போதுமானதாக இருக்கின்றன உன் இருப்பைக் காட்டிக்கொள்ள...

நீ வைத்த சூடுகள் நீ பேசிய கடுஞ்சொற்கள் நீ செய்த உதாசீனங்கள் நீ பார்த்த ஏளனப்பார்வைகள் நீ அடித்த அடிகள் என ஒவ்வொன்றும் ஒவ்வோர் ஆடையாக உருமாறுகிறது...

உன்னை நீரில் பிழிந்து அமிலக்கட்டியில் கரைத்து கல்லில் அடித்துத் துவைத்தெடுப்பதாய் கற்பனை செய்து உன்னாடைகளைத் துவைக்கிறேன் அகம் நிறைந்த சந்தோஷத்தில்...

துவைத்து முடித்துக் கொடியில் காயவைக்கும்போது லேசாகி வெளுத்துவிடுகிறது உன் ஆடைகளும் என் மனதும்! - பிரபு சங்கர்