Published:Updated:

முடிவற்ற முடியாமைகள்

முடிவற்ற முடியாமைகள்
பிரீமியம் ஸ்டோரி
News
முடிவற்ற முடியாமைகள்

ஜெ.பிரான்சிஸ் கிருபா, ஓவியம் : ரமணன்

சோப்பு நீர் குமிழிகளைப்போல்
உன் வார்த்தைகள்
ஒவ்வொன்றாய் உடைவதை
பார்க்க முடிகிறது
கேட்க முடியவில்லை

முட்டைகளிலிருந்து குஞ்சுகள்
வெளியேறுவதைப்போல
உன் சொற்களிலிருந்து அர்த்தங்கள்
மெது மெதுவாய் வெளியேறுவதைக் கண்டு
பதைபதைக்கத்தான் முடிகிறது
அதைத் தடுக்க முடியவில்லை

பனிக்கட்டிகளாய் உறைந்திருக்கும்
உன் உரையாடல்களின் குளிர்ச்சியை
உற்றுப் பார்க்கத்தான் முடிகிறது
தொட்டுப்பார்க்க முடியவில்லை

முடிவற்ற முடியாமைகள்

நீ சிரித்து சிரித்துப்  பேசும்போது
மலரும் குரலிலிருந்து
பரவும் நறுமணங்களை
முகர மட்டும்தான் முடிகிறது
கவர முடியவில்லை

நீ மூடிய விழிகளால்
பாடிய பாடல்களைக் கேட்டு
கனிய மட்டும்தான் முடிகிறது
கரைய முடியவில்லை

நீ காற்றில் எழுதும்
கனவுகளைக் கண்டு
உறங்கத்தான் முடிகிறது
விழிக்க முடியவில்லை

ஓர விழிகொண்டு நீ
தூரப்பார்வையில் வரையும்
ஓவியங்களோடு
விளையாட மட்டும்தான் முடிகிறது
உரையாட முடியவில்லை!

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz