பாலமும் இல்லை... பஸ்ஸும் இல்லை! - பரிசலில் பரிதவிக்கும் பள்ளிக் குழந்தைகள்

கோ வை மாவட்டம், மேட்டுப்பாளையம் சிறுமுகை அருகே லிங்காபுரம் கரந்தையாற்றில் கட்டப்பட்டிருந்த பாலம் தண்ணீரில் மூழ்கிவிட்டது. புதிய பாலம் கட்டப்படாததால், பள்ளிக் குழந்தைகள் உட்பட ஊர்மக்கள் அனைவரும் தினமும் உயிரைக் கையில் பிடித்துகொண்டு பரிசலில் பயணம் செய்கிறார்கள்.

இப்படி ஒரு பிரச்னை இருப்பதை அறிந்து அந்தக் கிராமத்துக்குச் சென்றோம். நீண்ட மலைத்தொடர்களைக் கொண்டிருக்கும் லிங்காபுரம் கிராமத்தைச் சுற்றி, நான்கு மலைக் கிராமங்கள் உள்ளன.

அதில், லிங்காபுரம் என்ற கிராமத்தைச் சேர்ந்த மக்களிடம் பேசினோம். “மேற்குத் தொடர்ச்சிமலை அடிவாரத்தில் 100 அடி உயரம் கொண்ட பில்லூர் அணை உள்ளது. நான்கு மாதங்களுக்கு முன்பு பெய்த மழையால் நீர்வரத்து அதிகரித்து, நீர்மட்டம் 97 அடியை எட்டியது. மேலும், பவானிசாகர் அணையின் நீர்த்தேக்க அளவும் நான்கு மாதங்களாக 100 அடிக்குமேல் உள்ளது. இதனால், கரந்தையாற்றில் உள்ள பாலம் 20 அடி ஆழத்தில் மூழ்கிவிட்டது. நீர்வரத்து தொடர்ந்து அதிகரிப்பதால், நகரத்துக்குள் செல்ல பரிசலில் மட்டுமே பயணிக்க வேண்டியுள்ளது. எங்கள் குழந்தைகளும் பரிசலில்தான் பள்ளிக்குச் சென்றுவருகிறார்கள். பிள்ளைகள் பள்ளிக்குப் போய்விட்டு வீடு திரும்பும்வரை நாங்கள் உயிரைக் கையில் பிடித்துக்கொண்டிருக்கிறோம்” என்று கவலையுடன் கூறினர்.

. பரிசல்காரர் ராஜேந்திரன், “ஏழு மாசத்துக்கு முன்னாடி பெய்த மழையில, பில்லூர் அணை நிரம்பி வெள்ளம் வந்துச்சு. அப்போ, பாலம் மூழ்கிடுச்சு. இந்த ஆத்து வழியா போனா மட்டும்தான் ஊருக்குள்ள சீக்கிரமா போக முடியும். இல்லைன்னா, ஊரைச் சுத்திதான் போகணும். அப்படிப் போனா யானைகள், சிறுத்தைகள் என விலங்குகள் நடமாட்டம் அதிகமா இருக்கும். இதுகுறித்து அதிகாரிங்க கிட்ட பலமுறை சொல்லிட்டோம். அவங்க வந்து பார்க்குறாங்களே தவிர, ஒண்ணுமே செய்றதில்லே” என்றார்.

மலைவாழ் சமூகத்தைச் சேர்ந்த பள்ளி மாணவி சித்ரா, “எங்க சமூகத்துல வயசுப் பொண்ணுங்களைப் படிக்க அனுப்புறதே பெரிய விஷயம். தண்ணியில பாலம் மூழ்கிட்டதால, ‘ஸ்கூலுக்கெல்லாம் போக வேணாம்... படிப்பை நிறுத்திடு’ன்னு பெரியவங்க சொல்றாங்க. அடுத்த வருஷம் பத்தாவது போகப்போறேன். நான் படிக்கனும்ணு ஆசைப்படுறேன். இங்கு புதுசா பாலம் கட்டுனாதான் என் படிப்பு தொடரும். இங்கே இருக்கிற எல்லா பொம்பளைப் புள்ளைங்களுக்கும் இதுதான் நிலைமை. எப்படியாவது உதவி பண்ணுங்க ப்ளீஸ்...” என்றார் கலங்கிய கண்களுடன்.

பரிசலுக்குள் டூவீலருடன் வந்த ராஜன், “நான் பால் வியாபாரம் செய்றேன். இந்தப் பாலம் இல்லாததால, தொழில்செய்ய ரொம்ப சிரமமா இருக்கு. வனத்துறை சார்பாக பள்ளிக் குழந்தைகளுக்காக ஒரு மோட்டார் படகு கொண்டுவந்தாங்க. அது இயக்கப்படாமலேயே இருக்கு” என்றார்.

. லிங்காபுரம் ஊர்த் தலைவரான ரத்தினசாமி, “ஆத்துல வெள்ளம் வந்தப்போ, எங்க ஊரு பொண்ணுக்கு பிரசவ வலி வந்துருச்சு. உடனே 108-க்கு போன் பண்ணினோம். ஆம்புலன்ஸும் வந்துடுச்சு. ஆனா, ஆத்துல நிறைய தண்ணி போனதால, ஆம்புலன்ஸ் உள்ளே வரமுடியல. உடனே, முதலுதவி உபகரணங்களுடன் நர்ஸை அழைச்சுட்டுவந்து பிரசவம் பார்த்தோம். குழந்தையும் பிறந்துச்சு. ஆனா, ரெண்டு பேருக்கும் உடம்பு முடியலை. திரும்பவும் அவங்களை பரிசல் மூலம் அழைச்சிட்டுப்போய் ஆஸ்பத்திரியில சேர்த்தோம். இந்த மாதிரி நிறைய சம்பவங்கள் இங்கே நடக்குது. ஆரம்பத்துல பாலம் கட்டினப்பவே, ‘உயரமா கட்டுங்க’ன்னு சொன்னோம். அதிகாரிங்க எங்கப் பேச்சைக் கேட்கலை. தேவையில்லாத இடத்துல பல லட்சம் செலவுசெஞ்சு பாலம் கட்டுறாங்க. எங்களுக்கு அவசியமான பாலத்தை மட்டும் கட்டித்தர முன்வர மாட்டேங்கிறாங்க” என்றார் ஏக்கத்துடன்.

இதுகுறித்து சிறுமுகை பேரூராட்சி செயல் அலுவலர் அப்துல்லாவிடம் கேட்டோம். அவர், “கரந்தையாற்றுப் பாலம் தொடர்பாக சப் கலெக்டர் தலைமையில் குழு அமைக்கப் பட்டுள்ளது. அந்தக் குழுவில் பொதுப்பணித்துறை, நீர்வளத்துறை, பேரூராட்சி ஆகிய துறையினரும், விவசாயிகள் உள்ளனர். ஏற்கெனவே ஒருமுறை ஆலோசனைக் கூட்டம் நடத்தப்பட்டுள்ளது. அடுத்த கூட்டத்தில்தான் முடிவு தெரியும்” என்றார். - ரா.கௌசல்யா படங்கள்: வ.இரா.தயாளன்

பாலமும் இல்லை... பஸ்ஸும் இல்லை! - பரிசலில் பரிதவிக்கும் பள்ளிக் குழந்தைகள்

கௌசல்யா ரா