Published:Updated:

மலை அரக்கிகளும் மோமோ பையனும் !

யூமா வாசுகி ஹரன்

மலை அரக்கிகளும் மோமோ பையனும் !

யூமா வாசுகி ஹரன்

Published:Updated:
##~##

ஸ்வீடனில் ஒரு மலை இருந்தது. அதன் சரிவில் பழங்கள் மட்டுமே விளையும். அந்த இடத்துக்கு ஆப்பிள் பள்ளத்தாக்கு என்று பெயர். அங்கே இருந்த ஒரு பழைய மாளிகையில் வசிப்பவர்கள், நம் முழங்கால் அளவு உயரம்தான் இருப்பார்கள். ஆயினும், மிக நீண்ட ஆயுள் உடையவர்கள்.

குள்ளர்களின் கொள்ளுத் தாத்தாவான டோர்குத் என்பவருக்கு 600 வயது. அங்கே மோமோ என்பவனே குறைந்த வயதுள்ள பையன். வெறும் 100 வயதுதான்.

ஒட்டுமொத்த விகடனுக்கும் ஒரே ஷார்ட்கட்!

கிறிஸ்துமஸ் நெருங்கிக்கொண்டு இருந்தது. மோமோவுக்கு ஓர் ஆசை. ''கிறிஸ்துமஸுக்கு விருந்து ஏற்பாடு செய்ய வேண்டும். அதில் ஒரு சிறப்பு விருந்தினரைளீ கௌரவிக்க வேண்டும். யாரை அழைப்பது?'' என்று கேட்டான்.

''டெலூனாவை!''

''ஆமாம், ஆமாம், டெலூனாவை அழைக்க வேண்டும்'' எல்லோரும் ஒரே குரலில் சொன்னார்கள்.

மலை அரக்கிகளும் மோமோ பையனும் !

யார் இந்த டெலூனா? ஆப்பிள் பள்ளத்தாக்கின் உரிமையாளர் சீலு மாமாவின் ஒரே மகள். சின்னக் குள்ளர்களைப் பார்ப்பதற்காக அவள்  அடிக்கடி நிறைய கேக்குகள், சாக்லேட்டுகளுடன் வருவாள்.

''விருந்துக்கு வரும் டெலூனாவுக்குப் பரிசு கொடுக்க வேண்டாமா?'' - 300 வயது ஜெரி தாத்தா கேட்டார்.

''நிச்சயமாகக்  கொடுக்க வேண்டும். அதோ அந்தப் பக்கம் கரும்பாறைக் குன்று இருக்கிறது. அங்குள்ள மலை அரக்கிகளிடம் விலை உயர்ந்த வைர மாலைகளும், நட்சத்திரக் கம்மல்களும் இருக்கின்றன. அதில் ஒன்று கிடைத்தால்..?''- 350 வயது ஜாக்ஸன் தாத்தா தன் ஆசையை வெளிப்படுத்தினார்.

''பசியில் உயிர் போனாலும் ஒரு பருக்கை கொடுத்து உதவாத கல் நெஞ்சக்காரிகள் அந்த மலை அரக்கிகள். யாராலும் திறக்க முடியாத மந்திரப் பெட்டிக்குள் எல்லாவற்றையும் அடைத்துவைத்து இருக்கிறார்கள்'' என்று சொன்னார் டோர்குத் தாத்தா.

''நான் ஒரு ரகசியம் சொல்கிறேன். ஒவ்வொரு கிறிஸ்துமஸ் இரவிலும் மலை அரக்கிகள் மந்திரப் பெட்டியைத் திறப்பார்கள். நள்ளிரவுப் பிரார்த்தனைக்கான தேவாலய மணியோசை கேட்கும்போது, பெட்டியை மூடிவிடு வார்கள்!'' - 250 வயது யோனா தாத்தா சொன்னார்.

''அப்படி என்றால், பெட்டியைத் திறக்கிற நேரம் பார்த்து, நான் ஒரு வைர மாலையை எடுத்து வந்துவிடுகிறேன், இது நிச்சயம்!'' மோமோ பையன் உறுதியாகச் சொன்னான்.

''மகனே, ஜாக்கிரதை! அந்த அரக்கிகள் இரக்கமற்றவர்கள்'' என்று எச்சரித்தார் டோர்குத் தாத்தா.

கிறிஸ்துமஸ் இரவு. கரும்பாறைக் குன்றில் உள்ள மலை அரக்கிகளின் குகையை நெருங்கினான் மோமோ. சிறு ஜன்னல் வழியே உள்ளே பார்த்தான். ஆஹா! அரக்கிகள் ஆபரணப் பெட்டியைத் திறந்துவைத்து வைர மாலைகள், நட்சத்திரக் கம்மல்கள், தங்க நாணயங்களை எண்ணிப் பார்த்துக்கொண்டு இருக்கிறார்கள்.

மோமோ பையன் பதுங்கிப் பதுங்கிச் சென்று ஆபரணப் பெட்டியின் அருகே ஒளிந்துகொண்டான். குகைக்கு மிகப் பக்கத்தி லேயே ஓர் அருவி இருப்பதைப் பார்த்தான். கீழே உள்ள சுரங்கத்தின் வழியாக அந்தத் தண்ணீர், வெளியே உள்ள நதியில் கலக்கும் என்றும் புரிந்துகொண்டான். மலை அரக்கிகளின் செருப்புகள் அருவிக் கரையில் கிடப்பதையும் கவனித்தான்.

மலை அரக்கிகளும் மோமோ பையனும் !

அப்போது அரக்கிகளில் ஒருத்தி, ''ஆ... அச்!'' என்று உரக்கத் தும்மினாள். அந்தத் தும்மலின் வேகத்தில் புயல் வீசியது. குகைக்குள் இருந்த விளக்கு பட்டென்று அணைந்தது. காற்றில் அகப்பட்ட மோமோ பையன், மேலே தூக்கி எறியப்பட்டு, திறந்து இருந்த ஆபரணப் பெட்டிக்குள் விழுந்தான்.

மோமோ பெட்டிக்குள் விழுந்ததை  அரக்கிகள் பார்க்கவில்லை. அப்போது, தேவாலயத்தில் இருந்து நள்ளிரவுப் பிரார்த்தனைக்கான மணி 'டிங் டாங்! டிங் டாங்!’ என்று ஒலித்தது.

''மணி ஒலித்துவிட்டது. சீக்கிரம் பெட்டியை மூடுங்கள்!'' - அரக்கிகளில் ஒருத்தி கட்டளை இட்டாள். மற்ற அரக்கிகள் விரைந்து பெட்டியை மூடினார்கள். மோமோ பெட்டிக்குள் மாட்டிக்கொண்டான்.

'என்ன செய்வது? இனி அடுத்த கிறிஸ்துமஸுக்குதான்  பெட்டியைத்  திறப்பார்கள். அதற்கு முன்பே என் கதை முடிந்துவிடும்’ என்று அஞ்சினான். ஆயினும், மோமோவுக்கு ஒரு யோசனை தோன்றியது. சாவித் துளை வழியாக 'கீச்... கீச்...'' என்று கத்தினான்.

மலை அரக்கிகளும் மோமோ பையனும் !

''அய்யோ!... பெட்டிக்குள் எலி நுழைந்துவிட்டது. திறந்துவிட வில்லை என்றால், நகைகளைக் கடித்துப் போட்டுவிடும்!'' என்று பெரிய அரக்கி பதறினாள்.

பெட்டியின் மூடியைத் திறந்தார் கள். அவ்வளவுதான்... மோமோ ஒரு வைர மாலையுடன் வெளியே தாவி ஓடினான்.

''ஓ! இவன் ஆப்பிள் பள்ளத்தாக்கில் இருக்கிற பையன். அவனைப் பிடித்துக் கட்டுங்கள்!'' என்றபடி அரக்கிகள் அவனைத் துரத்திக் கொண்டு ஓடினார்கள். ஆனால், மோமோ அங்கே இருந்த செருப்புகளில் ஒன்றை அருவியில் தள்ளினான். அதில் தாவி அமர்ந்துகொண்டான். அவனைச் சுமந்த செருப்பு, மின்னல் வேகத்தில் வெளியே பாய்ந்தது.

நதிக்கரையை அடைந்த மோமோ ஆப்பிள் பள்ளத்தாக்கிற்கு வந்தான். அப்போது, அங்கே கிறிஸ்துமஸ் விருந்துக்கான ஆயத்தங்கள் முடிந்து இருந்தன. முக்கிய விருந்தினரான டெலூனாவும் வந்திருந்தாள்.

''தாத்தா, டெலூனாவுக்குப் பரிசு கிடைத்துவிட்டது!''- வைர மாலையைத் தூக்கிக் காட்டிக் கொண்டே அவர்களிடம் வந்தான் மோமோ. எல்லோரும் மகிழ்ச்சிக் கூச்சலிட்டார்கள். மோமோ பையனைத் தோளில் சுமந்து நடனமாடினார்கள்.

பிறகு, கிறிஸ்துமஸ் விருந்து பிரமாதமாக நிகழ்ந்தது. அது முடிந்தவுடன் எல்லோரும் சேர்ந்து டெலூனாவிற்கு வைர மாலையை அணிவித்தார்கள்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism