Published:Updated:

அலமுப் பாட்டியும் அழைப்பு மணியும் !

கண்ணா கீர்த்தி

அலமுப் பாட்டியும் அழைப்பு மணியும் !

கண்ணா கீர்த்தி

Published:Updated:
##~##

கோகுல் சற்று தூரத்தில் நின்றபடி அலமு பாட்டியின் வீட்டைக் கவனித்தான். பாட்டியின் வீட்டுக் கதவு மூடி இருந்தது.

'இதுதான் சரியான நேரம்’ என்று மெதுவாகக் கதவு அருகே சென்றான். சுற்றிலும் பார்த்துவிட்டு வீட்டு அழைப்பு மணியை அழுத்திவிட்டு,  ஓடிச்சென்று ஒரு மரத்தின் பின்னால் பதுங்கினான். அங்கே இருந்தபடியே கவனித்தான்.

ஒட்டுமொத்த விகடனுக்கும் ஒரே ஷார்ட்கட்!

சற்று நேரத்தில் அலமுப் பாட்டி வந்து கதவைத் திறந்தார். வாசலில் யாரையும் காணாததால், இடப்புறமும் வலப்புறமும் திரும்பிப் பார்த்துவிட்டு உள்ளே சென்றுவிட்டார். அதைப் பார்த்த கோகுல் தனக்குள் சிரித்துக்கொண்டான்.

விடுமுறை நாட்களிலோ அல்லது பள்ளிவிட்டு வந்த பிறகோ, கோகுல் அக்கம் பக்கத்து வீடுகளில் அடிக்கடி செய்யும் குறும்பு இது. யார் வீட்டு அழைப்பு மணியையாவது அழுத்துவான். அவர்கள் கதவைத் திறக்கும் முன்  ஒளிந்துகொள்வான். கதவைத் திறப்பவர்கள் யாரையும் காணாமல் ஏமாறுவதில் கோகுலுக்குக் குதூகலம்.

அலமுப் பாட்டியும் அழைப்பு மணியும் !

அலமுப் பாட்டிக்கு 70 வயதுக்கு மேலே இருக்கும். அவருக்கு ஒரு கால் சரி இல்லை. சில வருடங்களுக்கு முன்பு ஏற்பட்ட விபத்தினால், சற்றே சாய்ந்து சாய்ந்துதான் நடப்பார். கைத் தடியுடன் சாலையில் அவர் நடந்து செல்லும்போது பார்க்கப் பாவமாக இருக்கும். கோகுல் பல முறை நண்பர்களுடன் சேர்ந்துகொண்டு பாட்டியைக் கிண்டல் செய்து இருக்கிறான். இப்படி வீட்டு அழைப்பு மணியை அழுத்துவதுகூட நண்பன் மகேஷ் சொல்லிக் கொடுத்ததுதான்.  

சில தினங்களுக்குப் பிறகு...

வழக்கம்போல அலமுப் பாட்டியின் வீட்டை நோட்டம்விட்டான் கோகுல். கதவு மூடி இருந்தது. வேகமாகச் சென்று அழைப்பு மணியை அழுத்திவிட்டு, மரத்தின் பின்னால் மறைந்துகொண்டான். சற்று நேரத்தில் அலமுப் பாட்டி கதவைத் திறந்து வெளியே வந்து பார்த்துவிட்டு, உள்ளே சென்றுவிட்டார்.

இன்றும் தன்னைப் பாட்டி பார்க்கவில்லை என்று நினைத்தான். ஆனால், கோகுல் அழைப்பு மணியை அழுத்த வரும்போதே, பாட்டி ஜன்னல் அருகில் நின்று பார்த்துவிட்டார்.

அரை மணி நேரம் கழிந்தது ''கோகுல்! கோகுல்!'' என்று அழைத்துக்கொண்டே அவனது வீட்டுக்குள் வந்தார் அலமுப் பாட்டி.

பாட்டியின் குரலைக் கேட்டதும் மனம் 'பக்பக்’ என்று அடித்துக்கொண்டது. குற்றம் உள்ள நெஞ்சு குறுகுறுக்கத்தானே செய்யும்? அவன் ஓடிச்சென்று படுக்கை அறையில் ஒளிந்துகொண்டான்.

பாட்டியுடன் அம்மா பேசுவது கேட்டது. ''வாங்கம்மா! என்ன விஷயம்?''

''கோகுல் என் வீட்டு வந்து இருந்தான்போல. காலிங்பெல்லை அடிச்சான். நான் கதவைத் திறக்கிறதுக் குள்ளே வந்துட்டான். அதுதான் அவனைப் பார்க்க வந்தேன்'' என்றார் பாட்டி.

''கோகுல்... கோகுல்!'' என்று அம்மா அழைத்தார். அதற்கு மேலும் ஒளிய முடியாமல் வெளியே வந்தான் கோகுல்.

''பாட்டி வீட்டுக்குப் போனியாமே எதுக்கு?'' என்று அம்மா கேட்டார்.

திருடனுக்குத் தேள் கொட்டியது போல, பதில் சொல்லத் தெரியாமல் விழித்தபடி நின்றான் கோகுல்.

அப்போது அலமுப் பாட்டி, ''முன்னாடி எல்லாம் நான் கோகுலுக்கு அடிக்கடி சாக்லேட் வாங்கித் தருவேன். அந்த  உரிமையில் இப்பவும் சாக்லேட் கேட்க வந்திருப்பான். அதுதானே கோகுல்? இதோ  வாங்கி வந்திருக்கேன்'' என்று சிரித்தபடியே, தன் கையில் இருந்த சாக்லேட் ஒன்றை கோகுலிடம் கொடுத்தார்.

கோகுல் தயங்கித் தயங்கி வாங்கிக்கொண்டான். 'தான் செய்த தவறை அம்மாவிடம் சொல்லாதது மட்டும் இன்றி, சாக்லேட் வாங்கி வந்த  பாட்டியைத் தலை நிமிர்ந்துபார்த்தான்.

''உன்னை மாதிரி பசங்க இந்தப் பாட்டியை நினைவில் வைத்து வீட்டுக்கு வர்றது ரொம்ப சந்தோஷம். இனிமே நான் வந்து கதவைத் திறக்கும் வரை காத்திருக்கணும். அப்போதானே  சாக்லேட் தர முடியும்'' என்று சிரித்தபடியே சொல்லிவிட்டுச் சென்றார்.

இப்போது எல்லாம் கோகுல் விடுமுறை நாட்களில் தன் நண்பர்களுடன் அலமுப் பாட்டி வீட்டின் அழைப்பு மணியை அழுத்துகிறான். ஆனால், ஓடி ஒளிவது இல்லை. பாட்டியுடன் வீட்டு வேலைகளில் சின்னச் சின்ன உதவிகள் செய்கிறான். பாட்டியும் அவர்களுக்குக் கை நிறைய இனிப்புகளைவழங்கி அனுப்பிவைக்கிறார்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism