Published:Updated:

சொல்வனம்

ஓவியம்: ராஜ்குமார் ஸ்தபதி

சொல்வனம்

ஓவியம்: ராஜ்குமார் ஸ்தபதி

Published:Updated:
##~##

நிலாம்மா

வானத்துக்கு நிலவை
நீயா வாங்கித் தந்தாய் என
ஹரிஸ்ரீ குட்டியிடம் கேட்டேன் விளையாட்டாக.
இல்லையென்று தலையாட்டினாள்
பிறகு யார் தந்தார்கள்
எனக் கேட்டதற்கு
'அம்மா’ என்கிறாள் அழகாக.
உண்மையில் நிலவு மட்டும் என்ன
அம்மா இல்லாமலா பிறந்திருக்கும்?
- வே.விநாயகமூர்த்தி

ஒட்டுமொத்த விகடனுக்கும் ஒரே ஷார்ட்கட்!

பரிசுப் பெட்டிகள்

சொல்வனம்

ரிசாய்ப் பெற்ற
சோப்புப் பெட்டிகளைக்
குளியலறைக்குள்
அனுமதிப்பதில்லை
குழந்தைகள்.
பெரியவர்களாகி மறந்துவிடும்போது
சோப்புப் பெட்டிகள்
சோப்பு இல்லாத பெட்டிகளாகவே
அம்மாக்களின்
பொக்கிஷமாகின்றன!

-  ஜே.மஞ்சுளா தேவி

பக்கத்து வீட்டுத் தாத்தாக்கள்

ம்பது வருடங்களுக்கு மேலான
நட்பின் பாரம்பரியம் அவர்களுடையது
வைத்தி தாத்தாவுக்கும்
வையாபுரி தாத்தாவுக்கும்
மனையாட்டி மரணித்துவிட்டார்கள்.

வைத்தி தாத்தாவுக்கு
நான்கு மகன்கள், ஒரு மகள்
நால்வருக்கும் அரசாங்க உத்தியோகம்.
வையாபுரி தாத்தாவுக்கு
மூன்று மகன்கள், இரண்டு மகள்கள்
உள்ளூர்வாசிகள்... சொந்தத் தொழில்.

ஒவ்வொரு மாதம்
ஒரு வீட்டில் சாப்பாடு இவர்களுக்கு.
மாதச் சுழற்சியிலும்
மரண வீடுகளிலும்
மாரியம்மன் திருவிழாக்களிலும்
சந்தித்துக்கொள்வார்கள்.

இளமைக் காலத்து
இனிமையான சம்பவங்களையும்
சுகவீன சம்பவங்களையும்
மெய்மறந்து பேசிக்கொள்வார்கள்
நையாண்டி பேசி நகைத்துக்கொள்வார்கள்.

திடீரென மௌனம் கசியும்
அது மனைவியின் பிரிவாக இருக்கலாம்.
சுதாரித்துக்கொண்டு சங்கதி தொடருவார்கள்.
சர்க்கரை வியாதிக்கார மகன் வீட்டுச் சாப்பாடு
பிரஷர்கார மகன் வீட்டுச் சாப்பாடுபற்றியும்
வைத்தி தாத்தா வலியோடு கூறுவார்.

அவர்கள் காலத்தில் உண்ட
பதார்த்தங்களைப் பற்றி நாவூற
பேசி உச் கொட்டிக்கொள்வார்கள்.

எந்த ஊரிலும் வாழலாம்
சொந்த ஊரில்தான் சாகணும்
என்பார் வையாபுரி தாத்தா.
மகள் வீடு போகாமைபற்றி
மாமன், மச்சான் வீட்டுச் சாப்பாடும்
அக்கம் பக்கத்து வீட்டுக்காரர்களிடம்
சண்டையும் ஆகாது
என்பார் வைத்தி தாத்தா.

சக வயதுடைய
பிச்சைக்காரர்களைப்
பார்க்கும்போதெல்லாம்
உபசீவனத்துக்காவது
நமக்குப் போல் பிள்ளைகள்
இல்லையே அவர்களுக்கு என
வருத்தம்கொள்வார்கள் இருவரும்!

- பஞ்ச்தர்மா

இரவின் குவளை

ர் இரவின் குளிரைப்
போக்கவல்ல
சுக்கு டீயை
சின்னஞ்சிறு குவளையில்தான்
தருகிறார்கள்!

- பிரதீப்குமார்

ஒற்றைக் கல்

கூட்டம் கலைக்கும்
ஒற்றைக் கல்
தன் போக்கில்
போய்க்கிடக்க...
திசையெங்கும்
பயம் பரப்பிப் பறந்தன
பறவைகள்!

- வஸந்த் பூபதி

உங்கள் கவிதைகளை, 'சொல்வனம்’, ஆனந்த விகடன், 757, அண்ணாசாலை, சென்னை-2 என்ற முகவரிக்கு, அல்லது solvanam@vikatan.com என்ற மின்னஞ்சல் முகவரிக்கு தொடர்பு எண்ணுடன் அனுப்புங்கள்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism