Published:Updated:

சொல்வனம்!

ஓவியம் : எஸ்.இளையராஜா

சொல்வனம்!

ஓவியம் : எஸ்.இளையராஜா

Published:Updated:

உடைகளற்று உலவுவது குழந்தைகளாக இல்லாமலுமிருக்கலாம்!

அன்றைக்கு
நலம் விசாரிக்க வந்த
கணபதி அண்ணனை
அழைத்துப்போயிருந்த போதும்
விரியத் திறந்த கதவும் உடலுமாய்
அதே நிர்வாணத்தோடு
உறங்கிக்கொண்டு இருந்தார் அப்பா.

போதையால் அவிழ்ந்திருந்த
காலங்களைப் போலல்லாது
கவனமுடனேயே
கழற்றிவைக்கப்படுகின்றன
ஆடைகள்
இப்போதெல்லாம்

ஒட்டுமொத்த விகடனுக்கும் ஒரே ஷார்ட்கட்!

அந்த வாரம்தான்
சிகிச்சைக்கெனச் சேர்த்திருந்தவரை
வீட்டுக்கு விரட்டி அடித்திருந்தது
நிர்வாணம் பிடிக்காத
மருத்துவமனை நிர்வாகம்.

வயோதிகமோ, வெக்கையோ,
பிரியமின்மையோ, ஞானத் தேடலோ,
இவையல்லாத வேறு எதுவோ
அவர் உடை உதறக் காரணமாயிருக்கலாம்.

ஜன்னல் வழி
எட்டிப்பார்க்கும் என்னைக் கண்ட
நாளன்றில்...
மகாவீரராய் உலவிக்கொண்டிருந்தவர்
கையிலிருந்த பாத்திரத்தினால்
சட்டெனத் தன் மானம் மறைத்தபோது
அப்பா மீதான சலிப்புகள் தீர்ந்து
குழந்தையென
அள்ளிக்கொள்ளத் தோன்றிற்று
இயலாதெனத் தெரிந்தும்!

- பி.ஜி.கதிரவன்

சொல்வனம்!

நாணம்

வீடு பார்க்க வந்தார்கள்
பக்கத்து வீட்டுக்காரர்கள்
பார்த்த பார்வையில்
பெண் பார்க்க வந்ததாய்
நாணியது வீடு.

- தேனம்மை லெக்ஷ்மணன்

குறிகாரி

சுழற்றிவிடுகிறாள் சோழிகளைக் குறிகாரி
குப்புறக் கவிழ்ந்தது இரண்டு
மல்லாந்து விழுந்தபடி ஏழு
சோழிக்குச் சோழி சொல்லெடுத்துச்
சொல்லுகிறாள் தலையெழுத்து
நோகும் வெயிலுக்கு
நொந்து திரியுமவள்
அறிந்தவளோ தன்னெழுத்து!

- நீரை.மகேந்திரன்

பலூன் மனசு

காற்று வெளியில்
மிதந்து பறக்கும்
பலூனில்
ஒரு சிறுவனின் உயிர் மூச்சு
அடைக்கப்பட்டுள்ளது

காற்றே
எட்டுத் திசையில்
பலூன் பறந்தாலும்
உடைந்திடாமல் காப்பாற்று
ஒரு சிறுவனின் மனசை.

- பிரபாகரன்

காப்பீட்டுக் குரல்

மூன்றாவது மாடியிலிருந்து
தவறி விழுவதாக
ஒரு கனவு.

கடக்கும் இரண்டாவது மாடியில்
எக்ஸ்கியூஸ் மீ
குரல் வேறு!

- பா.ராஜாராம்

மௌனம்

நீ மௌனமாயிருக்கிறாய்
என்பதைத் தவிர
வேறொன்றையும்
புரிந்துகொள்ள முடியவில்லை
உன் மௌனத்திலிருந்து!

- யாழினி முனுசாமி

சொல்வனம்!
தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism