சொல்வனம்!

வி டாமல் விழும் அருவியை ஆச்சர்யமாகப் பார்க்கிறாள் ஒருநாள் விட்டு ஒருநாள் குழாயில் தண்ணீர் வரும் நகரத்திலிருந்து வந்த குடும்பத் தலைவி. குளித்துவிட்டுத் திரும்பும்போது குழாயை மூடாமல் கிளம்புவதைப்போல் தோன்றுகிறது அவளுக்கு. ஆளே இல்லாதபோதும் கொட்டிக்கொண்டிருக்கும் நீரின் ஓசை அவளைப் பைத்தியமாக அடிக்கிறது!

. - முகுந்த் நாகராஜன்

. ஓ ட்டமாய் ஓடிக்கொண்டிருந்த முயலுக்கு ஆமையின் வேகத்தை நினைத்தவுடன் பொத்துக்கொண்டது சிரிப்பு

. பகடியைப் பகிர்ந்துகொள்ள பக்கத்தில் நண்பர்களும் இல்லை

. தனிமை துரத்த முயல் ஓடுகிறது ஆமையை நோக்கி

. சிநேகத்தைப் பாடி நடந்தன இரண்டும்

. ஆமை கழற்றிக் கொடுத்த ஓட்டை சுமந்து பார்த்த முயலுக்கு பொத்துக்கொண்டது அழுகை

. பண்பட்ட ஆமையின் பாதச் சுவடுகளைப் பணிந்து தொழுதபடி பின் தொடர்கிறது முயல்!

. - இளையநிலா ஜான்சுந்தர்

. ம ழையில் நனைந்தபடி செல்லும் ஆட்டோக்கள் அடம்பிடித்துக் குளிக்குமொரு குழந்தையின் சத்தங்களை எழுப்புகின்றன!

. - பிரதீப்குமார்

. வீ தியில் வரையப்பட்ட கடவுளின் மீது வீசிப் போகின்றனர் நாணயங்களை ஏதேனும் ஒரு நாணயம் யதார்த்தமாய் விழுந்துவிடுகின்றது கடவுளின் நெற்றியிலும் விழுந்த நாணயங்களை ஒவ்வொன்றாய் பொறுக்கி எடுத்து ஓவியன் நகர்ந்துவிட இப்போது எடுக்க யாருமின்றிக் கிடக்கிறார் அந்த எல்லாம் வல்ல இறைவன்!

. - வே.விநாயகமூர்த்தி

. வே லை தர முதன்முதலில் முதலாளி கோரியது என் சிறகுகளில் இருந்து சில இறகுகளை.

. வேலைக்குச் சேர்ந்த சில நாட்களில் என்னைப் பாராட்டி இரண்டு இறகுகளை வாங்கிக்கொண்டார்.

. சில மாதங்களுக்குப் பிறகு சில சூழ்நிலைகளை முன்வைத்து மூன்று சிறகுகளைப் பெற்றுக்கொண்டார்.

. பின்னொரு நாள் வேலையைத் தக்கவைத்துக்கொள்ள வேண்டுமாயின் சில இறகுகள் வேண்டுமென்று மறைமுகமாய் மிரட்டி பிடுங்கிக்கொண்டார்.

. சிறகுகளற்ற நான் உயரத்தில் பறக்கும் முதலாளியைப் பார்க்கிறேன் என் இறகொன்றால் தன் காது குடைந்தபடி அவர் இறகேதும் முளைத்துள்ளதா எனக் குனிந்து என்னைப் பார்க்கிறார்!

. - வீ.விஷ்ணுகுமார்

. அ றை நண்பனின் கைபேசியைக் காணவில்லை. 'கடைசியாகப் பேசி முடித்து எங்கே வைத்தாய்?’ 'சன்னல் வழியாக விழுந்திருக்குமோ?’ கேட்டுக்கொண்டே எல்லா இடங்களிலும் தேடிக்கொண்டிருந்தோம் நாங்கள் நண்பனோ எங்கள் முகங்களில் தேடிக்கொண்டிருந்தான்!

. - ஆ.கீதம்லெனின்

. ச ற்றே ஆறுதல் இன்னும் பழக்கப்படுத்தப்படவில்லை யானைகள் கத்தியைக் காட்டி காசு கேட்க!

. - வீ.விஷ்ணுகுமார்

சொல்வனம்!

Vikatan Correspondent