Published:Updated:

அயல் தேசக் கதைகள்

தமிழண்ணா படங்கள் : ஜெயசூர்யா

அந்த ஊரில், மில்லர் என்ற ஏழை இருந்தான். அவனுக்கு ஓர் அழகான மகள். அவளுக்குத் திருமணம் செய்துவைக்க, மில்லருக்கு ஒரு யோசனை தோன்றியது.  

அரசனைச் சந்தித்த மில்லர், ''என் மகள் அழகானவள். அவள், தங்க மகள். வைக்கோலைத் தொட்டால், அது தங்கமாகும்' என்றான்.

அரசனுக்குத் தங்கம் என்றால் அப்படி ஒரு மோகம். ''உன் மகள் வைக்கோலைத் தங்கமாக்கினால், நானே அவளை மணக்கிறேன். பொய்யாக இருந்தால், உன் தலையைச் சீவி விடுவேன்' என்றான்.

மில்லரைச் சிறையில் அடைத்தனர். அரண்மனையின் ஓர் அறையில் வைக்கோலை நிரப்பி, அவன் மகளை அங்கே அழைத்துவந்தனர். 'விடிவதற்குள் இந்த வைக்கோலைத் தங்கமாக மாற்றாவிட்டால், உன் தலையையும் சீவி விடுவேன்'' என்றான் அரசன்.

அயல் தேசக் கதைகள்

அவளை, அந்த அறையில் பூட்டினர். அவளுக்கு அழுகைவந்தது. 'அப்பாவின் பொய், நம்மையும் ஆபத்தில் சிக்கவைத்துவிட்டதே’ என்று இரவு முழுக்க அழுதாள். விடியும் நேரம் ஓர் அற்புதம் நிகழ்ந்தது.

ஒரு குள்ள மனிதன் அங்கே தோன்றினான். அவனது மூக்கு நீளமாகவும் கண்கள் பெரிதாகவும் இருந்தன. சிவப்புத் தாடி வைத்திருந்தான். மில்லரின் மகள், பயத்தில் அலறினாள்.

''பயப்படாதே, உனக்கு உதவி செய்யவே வந்தேன்.  இந்த வைக்கோலைத் தங்கமாக மாற்றினால், நீ என்ன பரிசு தருவாய்?'' என்று கேட்டான்.

''என் நெக்லஸைக் கொடுக்கிறேன்'' என்றாள் அவள்.

அயல் தேசக் கதைகள்

குள்ளன் நெக்லஸை வாங்கிக்கொண்டு, ஒரு மந்திரத்தைச் சொல்லி, வைக்கோல் முழுவதையும் தங்கம் ஆக்கினான்.

காலையில் வந்து பார்த்த அரசன், அளவில்லா சந்தோஷம் அடைந்தான். அவன் இப்போது, உலகிலேயே பணக்கார அரசன். இருந்தாலும் 'இன்னும் தங்கம் கிடைத்தால் நன்றாக இருக்கும்’ என்று நினைத்தான்.

''நீ இன்னும் ஒரு முறை வைக்கோலைத் தங்கமாக்கிக் கொடு. அப்புறம் நீதான் என் தங்கராணி'' என்றான்.

இன்னொரு அறை முழுக்க வைக்கோலை நிரப்பி, மில்லரின் மகளை அந்த அறையில் பூட்டினர்.

நள்ளிரவில் குள்ளன் வந்தான். ''நீ எனக்கு ஒரு பரிசு கொடுத்தால், இந்த வைக்கோல் முழுவதையும் தங்கமாக்கிக் கொடுக்கிறேன்'' என்றான்.

''இருந்த நெக்லஸையும் கொடுத்துவிட்டேன்.இப்போது, என்னிடம் ஒன்றுமில்லையே'' என்றாள் பரிதாபமாக.

''நீ ராணியாகி, உனக்குப் பிறக்கும் முதல் குழந்தையைக் கொடு'' என்றான் குள்ளன்.

''குழந்தையை எப்படி கொடுக்க முடியும்? வேறு ஏதாவது கேள்'' என்றாள் அவள்.

அயல் தேசக் கதைகள்

''நான் கேட்டதை மாற்றிக்கொள்ள மாட்டேன். யோசித்துச் சொல்'' என்றான் குள்ளன்.

வேறு வழி இல்லை. சரி என்றாள் அவள். குள்ளன் மந்திரத்தைச் சொல்ல, வைக்கோல் எல்லாம் தங்கமானது.

காலையில் வந்து பார்த்த அரசனுக்கு, தலைகால் புரியாத சந்தோஷம். அவளையே திருமணம் செய்துகொண்டான்.  மில்லரும் விடுதலை ஆனான்.

ஒரு வருடம் உருண்டோடியது. ராணிக்கு அழகான பெண் குழந்தை பிறந்தது. குட்டி இளவரசியின் தலை முடி, தங்கம் போல மின்னியது.

ராணி, தனது குழந்தையோடு சந்தோஷமாக இருந்தபோது, ஒருநாள் குள்ளன் வந்தான். ''வாக்குக் கொடுத்தபடி குழந்தையை என்னிடம் கொடு'' என்றான்.

ராணி மறுத்தாள். ''எனது ராஜ்ஜியத்தில் இருக்கும் அத்தனை தங்க நகைகளையும் எடுத்துக்கொள். எனக்கு என் குழந்தை வேண்டும்'' என்று அழுதாள்.

அவள் அழுவதைப் பார்த்து குள்ளனுக்குப் பரிதாபம் ஏற்பட்டது. ''சரி, நீயே குழந்தையை வைத்துக்கொள். ஆனால் ஒரு நிபந்தனை'' என்றான்.

''உன் நிபந்தனையைச் சொல்'' என்றாள் ராணி.

''நீ, என் பெயரை மூன்று தடவையில் யூகித்துச் சொல்லிவிட வேண்டும். இல்லையென்றால், குழந்தை எனக்கே'' என்றான்.

குள்ளனைப் பார்த்த அவள், ''உன் பெயர் ஹாரி'' என்றாள்.

அயல் தேசக் கதைகள்

குள்ளன் தரையில் துள்ளிக் குதித்து, ''இல்லையே... இல்லையே... உனக்கு இன்னும் இரண்டே வாய்ப்புதான்'' என்றான்.

கொஞ்சம் யோசித்துவிட்டு, ''ம்... பல்த்தசார்'' என்றாள் ராணி.

குள்ளன் இன்னும் அதிகமாகத் துள்ளிக் குதித்தான். ''இல்லையே... இல்லையே... இன்னும் ஒரே ஒரு வாய்ப்புதான். தப்பாகச் சொன்னால், உன் குழந்தை எனக்குத்தான்'' என்றான்.

ராணி நீண்ட நேரம் யோசிக்க, ஆனந்தமாகத் துள்ளிக் குதித்த குள்ளன், ஒரு பாடலை ராகத்தோடு பாட ஆரம்பித்தான்.

''ஓ... ஓ... என் பேரு ரம்ப்பிள்ஸ் டில்ட்ஸ்கின் என இவளுக்குத் தெரியலை. இவளால கண்டுபிடிக்க முடியலை.  யாருக்கும் என் பெயர் தெரியலை. குழந்தை எனக்கே கிடைக்கப்போகுது'' என்று பாடினான்.

குள்ளன் பாடி முடித்ததும், ''உன் பெயர் ரம்ப்பிள்ஸ் டில்ட்ஸ்கின்'' என்றாள் ராணி.

அதிர்ச்சியில் குள்ளன் தரைக்கும் கூரைக்குமாகக் குதித்தான். சோகத்தோடு அரண்மனை ஜன்னல் வழியாகக் குதித்து ஓடியவன் ஓடியவன்தான். திரும்பி வரவே இல்லை.

ராணி, தன் குழந்தை, கணவனோடு சந்தோஷமாக வாழ்ந்தாள்.

அயல் தேசக் கதைகள்
அடுத்த கட்டுரைக்கு