Published:Updated:

“என்னைத் தொந்தரவு செய்பவற்றைத் திரும்பிப் பார்க்கிறேன்!”

photography
பிரீமியம் ஸ்டோரி
photography

அருண் டைட்டன் - சந்திப்பு: தமிழ்ப்பிரபா

“என்னைத் தொந்தரவு செய்பவற்றைத் திரும்பிப் பார்க்கிறேன்!”

அருண் டைட்டன் - சந்திப்பு: தமிழ்ப்பிரபா

Published:Updated:
photography
பிரீமியம் ஸ்டோரி
photography

அருண் டைட்டன், சமகாலத்தின் மிக முக்கியமான புகைப்படக் கலைஞர். இவர் புகைப்படம் எடுக்கத் தேர்வு செய்கிற ஒவ்வொரு காட்சியும் தனித்துவமானவை, தனக்கெனவொரு கதையை வைத்திருப்பவை. படத்தைப் பார்த்தவுடன் மிக எளிதில் கண்களைவிட்டு அகலாத சட்டகங்களின் சாட்சிக்காரர். 2015-ல் சென்னைப் பெருவெள்ளத்தில் கரையொதுங்கிய பொருள்களை வைத்து அருண் எடுத்திருக்கும் புகைப்படங்கள் விரைவில் கண்காட்சிக்கு வைக்கப்பட இருக்கின்றன. துயரம் ஒரு கலையாக மாறும்போது, அது காலத்தின் சாட்சியமாக என்றென்றும் நம் முன் நிற்கிறது. ஒரு படைப்பாளி அதைக் கலையாக மாற்றுவதற்கு எந்தவொரு கால அவகாசத்தையும் எடுத்துக்கொள்வதில்லை. அதன் போக்கில் அவன் அதைக் கண்டறிகிறான் என்பதற்கு ஆகச்சிறந்த உதாரணம், அருணின் இந்தப் புகைப்படங்களும் அதற்கு அவர் சந்தித்த அனுபவங்களும்...

“என்னைத் தொந்தரவு செய்பவற்றைத் திரும்பிப் பார்க்கிறேன்!”

“சென்னைப் பெருவெள்ள சேதாரங்களைப் புகைப்படங்களாக ஆவணப்படுத்த வேண்டுமென்கிற எண்ணம் எந்தப் புள்ளியிலிருந்து தொடங்கியது?”

“பெருமழை பெய்து ஓய்ந்த விடியற் காலையில் எப்போதும்போல அந்த மழைத் தருணங்களைக் கவித்துவமாகப் படம்பிடிக்க வேண்டுமென கேமராவை எடுத்துக்கொண்டு வெளியே சென்றேன். பிறகுதான் அது ஏற்படுத்தியிருக்கும் அழிவை என்னால் உணர முடிந்தது. இதை வெறும் புகைப்படங்களாக நாம் கடந்துபோகக் கூடாது என எண்ணி, இந்த மழை எந்த மாதிரியான தாக்கத்தை உண்டு பண்ணியிருக்கிறது என்பதைத் தெரிந்து கொள்ள, சென்னையில் வெள்ளம் பாதிக்கப்பட்ட பகுதிகளுக்குச் சென்றுவர முடிவுசெய்தேன்.பெரும்பாலும் கூவத்தையொட்டி இருக்கிற ஹவுசிங் போர்டு பகுதிகள்தான் என் தேர்வாக இருந்தது.

சைதாப்பேட்டை பாலத்தின் இடது புறத்தின் கீழ் உள்ள ‘குடிசைப்பகுதி’ முழுதும் வெள்ளத்தால் மூழ்கி பொருள்களெல்லாம் அடித்துச் செல்லப்பட்டு, அந்த மக்கள் செய்வதறியாது திகைத்துக்கொண்டிருந்தார்கள். அங்கு சென்றபோது, சிறுமியொருத்தி ஒரு இடத்தையே வெறித்துப் பார்த்துக் கொண்டிருந்தாள். அவள் எதைப் பார்க்கிறாள் எனத் தெரிந்து அங்கு நோக்கினேன். அங்கே தலையில்லாத பொம்மையும், ஒரு பென்சில் டப்பாவும் இன்னும் சில பொருள்களும் சேற்றில் புதைந்திருந்தன. ‘ஏன் அதையே பாத்துட்டுருக்க?’ என அந்தச் சிறுமியைப் பார்த்துக் கேட்டேன். நீர் திரண்ட கண்களுடன் ‘எங்கப்பா போனவாரந்தான் வாங்கிக் குத்தாரு’ என்றாள். அவள் எதைக் குறிப்பிட்டுச் சொன்னாள் எனத் தெரியவில்லை. ஆனால், அந்த உணர்வை என்னால் புரிந்துகொள்ள முடிந்தது. இந்தச் சிறுமியைப்போல எத்தனை பேரின் பிரியங்கள் அடித்துப்போகப்பட்டிருக்கும்? அவை குப்பையாகக் கடலில் கலப்பதற்கு முன் தேடியெடுத்து ஆவணப்படுத்த வேண்டுமென நினைத்தேன். கரையொதுங்கிய பொருள்களை அருகில் சென்று பார்த்தபோது, அந்தப் பொருள்களின் வழியாக என்னால் சில குரல்களைக் கேட்க முடிந்தது. அந்தக் குரல்களுக்கு உயிர் வடிவம் கொடுக்க வேண்டுமென நினைத்தேன். அதன் விளைவுதான் இந்தப் புகைப்படங்கள்.”

ஒட்டுமொத்த விகடனுக்கும் ஒரே ஷார்ட்கட்!

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS
விகடனின் அதிரடி ஆஃபர்!
தற்பொழுது ரூ.750 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா999 மட்டுமே! மிஸ் பண்ணிடாதீங்க!Get Offer
“என்னைத் தொந்தரவு செய்பவற்றைத் திரும்பிப் பார்க்கிறேன்!”

“பொருள்களைத் தனித்தனியாக எடுக்காமல், பலவிதமான பொருள்களை இணைத்துப் படமெடுக்க வேண்டும் என்று எப்படித் தோன்றியது?”

“வெள்ளத்தில் அடித்துச் செல்லப்பட்ட பொருள்களை ஆங்காங்கே பார்த்தபோது, அவற்றைச் சில கோணங்களில் தனியாகப் புகைப்படம் எடுத்துப் பார்த்தேன். திருப்தி இல்லை. அந்தப் பொருள்களை மூட்டையாகக் கட்டி, வீட்டுக்கு எடுத்துவந்து மொட்டை மாடியில் அவற்றைப் பரப்பி, கறுப்புப் போர்வைக்கு மேலேவைத்து அதற்கேற்றாற்போல் ஒளியமைப்பு செய்து, மீண்டும் தனித்தனியாக எடுத்தேன். அதிலும் நிறைவில்லை.

பொருள்கள் ஒவ்வொன்றும் ஏதோவொரு நினைவைத் தன்னில் காத்திரமாக வெளிப்படுத்திக்கொண்டிருந்தன. உண்மையில், அவ்வுணர்ச்சியை என்னால் கையாள முடியவில்லை. என்ன செய்வதென்று தெரியாமல் அவற்றைப் பார்த்துக்கொண்டே இருந்தேன். அவற்றை மீண்டும் படமெடுத்தேன். மற்றவர்கள் எடுப்பதற்கும் இதற்கும் பெரிய வித்தியாசமில்லை எனத் தோன்றியது. பின்னர், அதைப் பற்றி யோசிப்பதைவிட்டு மற்ற வேலைகளில் கவனம் செலுத்த ஆரம்பித்தேன். ஆனாலும், அந்தப் பொருள்களுக்கான கலைவடிவம் என்ன என்கிற தேடுதல் எனக்குள் இருந்துகொண்டே இருந்தது.

“என்னைத் தொந்தரவு செய்பவற்றைத் திரும்பிப் பார்க்கிறேன்!”

அத்தகையச் சூழலில், டெல்லியில் ஒரு புகைப்படக் கண்காட்சிக்குச் சென்றிருந்தபோது அங்கே ‘டஸ்ட்’ என்கிற பெயரில் ஒரு குட்டிப் புத்தகத்தைத் தற்செயலாக எடுத்துப் பார்த்தேன். ஒரு அறையிலுள்ள டஸ்ட்டையெல்லாம் சேர்த்து வட்ட வடிவில் வைத்து புகைப்படம் எடுத்திருந்தார்கள். தையல் கடையில் சிதறிக்கிடக்கும் துண்டுத் துணிகள், சலூன் தரையில் விரவிக்கிடக்கும் முடிகள், பள்ளிக்கூடம், உணவகம் இப்படிப் பல தளங்களுக்குச் சென்று அங்கே உள்ள டஸ்ட்களை வைத்து புகைப்படங்கள் எடுத்திருந்தார்கள். இந்த டஸ்ட்டுகளின் புகைப்படத் தொகுப்புதான் அந்தப் புத்தகம். டஸ்ட்டுகளை ஒன்றுசேர்த்து படம் எடுத்திருக்கிறார்கள். மிக எளிமையான படங்கள்தான். ஆனால், அதில் மிளிரும் கலைத்தன்மையும் அது அமைதியாகப் பேசுகிற அரசியலும் உலகத்தரத்திற்கு இருந்தன. வீட்டு மொட்டை மாடியிலிருக்கும் பொருள்களை இப்போது எப்படிப் படமெடுப்பது என்ற ஐடியா ஒருவழியாகக் கிடைத்துவிட்டது.பொருள்களை ஏனோதானோவென்று இணைக்காமல், அதை முறையாக இணைப்பதற்கான ஆலோசனையை என் நண்பர் கார்த்திக்கிடம் பெற்றேன். பின் முயற்சிசெய்து எடுத்த படங்களைத்தான் நீங்கள் பார்க்கிறீர்கள்.”

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

“என்னைத் தொந்தரவு செய்பவற்றைத் திரும்பிப் பார்க்கிறேன்!”

“சென்னை வெள்ளத்தில், விளிம்புநிலை மக்களைப்போலவே நடுத்தர மற்றும் உயர்தர மக்களின் குடியிருப்புப் பகுதியும் பாதிக்கப்பட்டதுதானே. நீங்கள் ஏன் கூவத்தின் ஓரமுள்ள நிலப்பரப்பை மட்டும் தேர்ந்தெடுத்தீர்கள்?”

“குடிசைப் பகுதி மக்களைப்போலவே அடுக்கு மாடி குடியிருப்புப் பகுதிகளில் உள்ளவர்களையும் வெள்ளம் பாதித்தது உண்மைதான். ஆனால், அதன் தாக்கம் யாரை அதிகம் துயர்கொள்ளச் செய்கிறது என்பதும் முக்கியம்தானே. நடுத்தர மற்றும் உயர்தர மக்கள் வெள்ளத்தால் இழந்த பொருள்களை, உடைமைகளை, வீடுகளை மீண்டும் எளிதில் வாங்க முடியும் அல்லது உருவாக்க முடியும். சிலர் அதற்கெல்லாம் இன்சூரன்ஸ்கூட செய்துவைத்திருப்பார்கள். ஆனால், இந்த மக்களின் நிலைமையை எண்ணிப் பாருங்கள். ஒரு பொருளை இழக்கும்போது அது கொடுக்கிற வலி அதை மீண்டும் எளிதில் வாங்க முடிகிறவர்களுக்கும், வாங்கவே முடியாதவர்களுக்கும் வேறுபடும். அந்த வேறுபாட்டின் ஒரு பகுதியைத்தான் ஆவணப்படுத்த வேண்டுமென நினைத்தேன். மற்றபடி, கலை எல்லோருக்கும் பொதுவானதுதான்.”

“என்னைத் தொந்தரவு செய்பவற்றைத் திரும்பிப் பார்க்கிறேன்!”

“ஆவணப் புகைப்படக் கலைஞர்கள் அதிகரித்து வருகிற சூழலில், ஆழ்ந்த அனுபவம்கொண்ட நீங்கள் இங்கு பகிர்ந்துகொள்ள விரும்பும் விஷயம் என்ன?”

“சென்னை பெருவெள்ளத்தால் பாதிக்கப்பட்ட மக்களின் துயரங்களை ஆவணப்படுத்த வேண்டுமென நான் பயணப்பட முடிவெடுத்ததும் செய்த முதல் காரியம், கேமராவை வீட்டில் வைத்துவிட்டுக் கிளம்பியதுதான். மக்களின் வாழ்வை, குறிப்பாக அவர்களின் துயரத்தை, ஒரு புகைப்படக் கலைஞனாக பதிவுசெய்ய நினைக்கும்போது ஆரம்பத்திலேயே கேமரா எடுத்துக்கொண்டு செல்வதென்பது, அவர்கள்மீது நாம் நிகழ்த்துகிற வன்முறை என்பது என்னுடைய அபிப்ராயம். முதலில் அவர்களின் வாழ்வைப் புரிந்துகொள்ள வேண்டும். அவர்களுள் ஒருவராகக் கலந்து உரையாட வேண்டும். அதற்காகச் செலவிடக்கூடிய நாள்களை ஒரு பொருட்டாக நினைக்கக் கூடாது. இது என்னுடைய தனிப்பட்ட அனுபவத்தில் நான் அறிந்துகொண்டது. சென்னை பெருவெள்ளத்தின் தாக்கத்தை உணர்ந்தபோது, கேமரா இல்லாமல் பாதிக்கப்பட்ட மக்களைச் சந்தித்தேன். அவர்களின் துயரங்கள் என்னுள் நிகழ்த்திய அலைக்கழிப்பிலிருந்து மீண்டுவர எனக்கு ஓரிரு நாள்கள் ஆனது. நான் சமநிலைக்கு வந்தபிறகுதான் கேமராவை எடுத்துக் கொண்டு அழிவின் தடயங்களைப் படம் பிடிக்க எண்ணினேன். அப்போது வெள்ளம் வடிந்திருந்தது. சொல்லப்போனால், அழிவின் கோரம் முன்பைவிட அப்போதுதான் அதிகம் என்பதாக எனக்குப்பட்டது.”

“என்னைத் தொந்தரவு செய்பவற்றைத் திரும்பிப் பார்க்கிறேன்!”

“உங்களுடைய அடுத்த புகைப்பட ஆவணம் எது குறித்து இருக்குமெனத் தெரிந்துகொள்ளலாமா?”

“எதையும் திட்டமிட்டு ஆவணப்படுத்தும் வேலைமுறை எனக்கு ஒத்துவராது. என்னுடைய பயணத்தில் என்னைத் தொந்தரவு செய்பவற்றைத் திரும்பிப் பார்க்கிறேன்; அதை நோக்கி நான் போகிறேன். என் தேர்ந்தெடுப்பு முறை மிக இயற்கையானது. பல சமயம், இது எனக்கே புதிராகத்தான் இருக்கிறது. அந்தப் புதிருக்குள்ளிருக்கும் சுவாரஸ்யம்தான் என்னை இயக்கிக்கொண்டிருக்கிறது!”

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism