படிப்பறை

வா சிப்பது, கடிதங்கள் எழுதுவது, முன்னுரைகள் எழுதுவது, நிகழ்வுகளில் பங்கேற்பது என 70 ஆண்டுகளுக்கும் மேலாக இடைவிடாது இலக்கிய உலகில் இயங்கியவர் வல்லிக்கண்ணன். எவராலும் எளிதில் அணுகிவிட முடிந்த படைப்பாளி; எவரையும் உற்சாகப்படுத்தவும் தயங்காதவர். ஒரு நல்ல நூலையோ, படைப்பையோ வாசிக்க நேர்ந்தால் அதை உருவாக்கிய படைப்பாளியைத் தேடிச்சென்று சிலாகித்துப் பாராட்டும் பண்புடையவர். 86 வயதில் மரணிக்கும் காலம்வரை செயல்பட்டுக்கொண்டேயிருந்த வல்லிக்கண்ணன், தான் மிகவும் மதிக்கும் படைப்பாளிகளில் ஒருவரான கர்ணனுக்கு எழுதிய கடிதங்களின் தொகுப்புதான் இந்த நூல். . நூல் விமர்சனம், சிற்றிதழ் செயல்பாடு, நாடு கடந்து உலகளாவிய தமிழ்ச்சூழலில் இலக்கிய நிலை என வல்லிக்கண்ணன் எழுதிய கடிதங்கள் அனைத்துமே இலக்கியத்தன்மை மிக்கதாக இருக்கின்றன.

வல்லிக்கண்ணனுக்குக் கர்ணன் எழுதிய பதில்களும் நூலில் இருந்திருந்தால் இந்த நூல் இன்னும் மனசுக்கு நெருக்கமாக இருந்திருக்கும். ஒவ்வொரு கடிதத்துக்குக் கீழேயும், அந்தக் கடிதம் எழுதப்பட்ட சூழல், அதில் இடம்பெற்றுள்ள மனிதர்கள், நூல்கள் குறித்துச் சிறு குறிப்புகள் இடம்பெற்றுள்ளன. அவை அந்தக் குறையை ஓரளவுக்குப் போக்குகின்றன. வல்லிக்கண்ணனின் இலக்கியப் பங்களிப்பு குறித்து விரிவான ஒரு கட்டுரையையும் இந்த நூலில் எழுதியிருக்கிறார் கர்ணன்.

வல்லிக்கண்ணன், தன் கதைகளை நூல்களாக்குவது குறித்து கர்ணனுக்கு எழுதுகிறார். “... இன்று தனியாக புக்போஸ்டில் 16 கதைகள் அனுப்பியிருக்கிறேன். இன்னும் கதைகள் இங்கிருந்து அகப்பட்டால் அனுப்பி வைக்கிறேன். இல்லாவிட்டால் ராஜவல்லிபுரம் போய்தான் எடுக்கவேண்டும். அங்கே போக ரூபாய் வேண்டும். ஆகவே ஒரு புத்தகத்துக்குத் தேவையான கதைகளை பாரதி புத்தகாலயத்துக்குக் கொடுத்து ஏதாவது பணம் வாங்கி அனுப்பினால் ராஜவல்லிபுரம் போய் கதைகளை எடுத்துக்கொண்டு மதுரைக்கு வரமுடியும்...”

எந்த அளவுக்கு வறுமை தாண்டவமாடும் சூழலில் வல்லிக்கண்ணன் வாழ்ந்தார் என்பதை அவரின் கடிதங்கள்வழி வாசிக்கும்போது கண்கள் கலங்குகின்றன. எழுத்தாளர் கர்ணன் சமீபத்தில் காய்ச்சல் காரணமாக உயிரிழந்தார். அவரது மறைவுக்குப் பின் அச்சாகி வந்துள்ளது இந்நூல். வல்லிக்கண்ணனையும் தமிழ் இலக்கியச்சூழலையும் இளம் தலைமுறை புரிந்துகொள்ள இந்த நூல் உதவும்.

. உடைந்த இரவில் உதிராத நட்சத்திரம்

கர்ணன்

வெளியீடு:

கவிதா பப்ளிகேஷன், 8, மாசிலாமணி தெரு, பாண்டி பஜார், தியாகராய நகர், சென்னை-600017

தொடர்பு எண்: 044 24364243, 24322177

பக்கங்கள்: 240

விலை: ரூ. 225

படிப்பறை

வெ.நீலகண்டன்Follow