அங்காளம் என்பதற்கு இணைப்பு என்று பொருள். இந்தத் தலைப்பில் வெளிவந்திருக்கும் கார்த்திக் புகழேந்தியின் கட்டுரைத் தொகுப்பு, நம் பண்பாட்டில் இரண்டறக் கலந்துவிட்ட பல்வேறு விஷயங்களைப் பற்றிய பல அம்சங்களை விவரிக்கிறது.
முதல் கட்டுரையான சங்குத்தவம்... பிறப்பு முதல் இறப்பு வரை தமிழர்களின் வாழ்வோடு கலந்த சங்கு பற்றியது. அதன் வகைகள், உலகச் சந்தையில் சங்கின் பெயர்கள், அதன் மதிப்பு. உள்ளூர் மக்கள் அதற்குச் சூட்டியிருக்கும் பெயர்கள். அதுகுறித்து முன்னோர் சொல்லிய கதைகள். உள்ளூரில் நடைபெறும் சங்கு வியாபாரம். உலகம் முழுவதும் மக்கள் சடங்குகளில் சங்கின் பங்கு என, பலரும் அறியாத புதிய தகவல்களைத் தருகிறார். காற்றிசைக் கருவிகளைப் பற்றிய கட்டுரை மிக முக்கியமானது. மனிதனால் முதன்முதலாக உருவாக்கப்பட்ட புல்லாங்குழல் முதல் பதினேழாம் நூற்றாண்டுக்குப் பிறகு அறியப்பட்ட நாகஸ்வரம் வரைக்கும் பல இசைக்கருவிகளைப் பற்றி ஆழமாக அலசுகிறது இக்கட்டுரை.
பெண் பாலுறுப்புகளுக்கு வழங்கப்படும் பல்வேறு பெயர்களை, நாட்டார் கதைகள், சங்கப்பாடல்கள் துணைகொண்டு இன்னொரு கட்டுரையில் விவரிக்கிறார். அதை மையப்படுத்தி நடைபெறும் வழிபாடுகள் குறித்துப் பேசுகிறது ‘சூழ் பொருள்' கட்டுரை. துரோகங்கள் குறித்து வாய்வழியாகவும், எழுத்துகளின் மூலமாகவும் அறியப்பட்ட கதைகளைத் தாண்டி, அவற்றை ஆதாரங்களாகச் செதுக்கிய கல்வெட்டுகளைப் பற்றிப் பேசுகிறது ‘துரோகத்தின் கல்வெட்டு.’ இறைத்துரோகம், குருத் துரோகம், ராஜத்துரோகம், கிராமத்துரோகம், மித்திரத் துரோகம் என துரோகங்களின் வகைகளையும் கல்வெட்டுச் சான்றுகள் மூலமாக விவரிக்கிறார்.
உலகம் முழுவதும் இன்று உச்சரிக்கப்படும் முக்கியமான சுவர்கள், அவற்றுக்குப் பின்னால் இருக்கும் அரசியல் ஆகியவற்றை விவரிக்கும் ‘சுவர்’ கட்டுரை என அவர் எடுத்துக்கொண்ட விஷயங்கள் எல்லாம் பிரமிப்பூட்டுகின்றன. பல கட்டுரைகள் இன்னும் விரிவாக எழுதப்பட்டிருக்கலாம் என்கிற எதிர்பார்ப்பைத் தாண்டி நல்லதொரு அனுபவத்தைத் தருகிறது இந்தக் கட்டுரைத் தொகுப்பு.
அங்காளம்
கார்த்திக் புகழேந்தி.
வெளியீடு: யாவரும் பப்ளிஷர்ஸ், 214, மூன்றாவது பிரதான சாலை, புவனேஸ்வரி நகர், வேளச்சேரி, சென்னை - 42
தொலைபேசி : 9042461472. பக்கங்கள் : 100; விலை : ரூ.100