படிப்பறை

ஆ னால், சமகால அரசியல் நிகழ்வுகளைப் படைப்பாக்குவதில் கவனம் செலுத்தும் படைப்பாளி அ.கரீம். ‘சிதார் மரங்களில் இலைகள் பூப்பதில்லை’ இவரின் இரண்டாம் சிறுகதைத் தொகுப்பு.

. ஒரு பிரச்னையில் எல்லோருக்கும் தெரிந்த அரசியல் பக்கங்களை நேரடியாகப் பேசாது, அதில் சிக்குண்ட எளிய மனிதர்களின் வலிகளின் வழியாக அச்சிக்கலின் ஆபத்தை உணர வைக்கிறார். உதாரணமாக, ‘இருள்’ எனும் கதை, மாநகரத்தில் ஓர் இரவில், ஒரு பெண் தங்குவதற்கு இடமின்றி அறிமுகம் இல்லாத வீட்டுத் திண்ணையில் ஒளிந்துகொள்வதாகத் தொடங்குகிறது. அவள் தன் கிராமத்திற்குச் செல்ல முடியாத சூழல் ஏற்பட்டதற்குக் கோவையில் குண்டுவெடித்த நாளின் பின்னணியை வைக்கிறார். அந்தப் பெண்ணின் வழியே அங்கு நடந்த கோரச்சம்பவங்கள் பற்றிய மாற்றுப்பார்வையைப் பகிர்கிறார்.

. சென்ற ஆண்டில் இந்தியாவையே உலுக்கியது காஷ்மீர் சிறுமி மீதான பாலியல் வன்முறை. அந்தக் கொடூரத்தைப் பற்றிப் பல விஷயங்கள் தெரிந்தும் பேச முடியாத ஒரு ஜீவன் அவள் மேய்க்க அழைத்துச்சென்ற குதிரை. அது, தோழியாகப் பழகிய அச்சிறுமியின் வலியை நம்மிடம் சொல்லும் விதமாக எழுதப்பட்டிருக்கும் கதை, ‘சிதார் மரங்களில் இலைகள் பூப்பதில்லை.’ பெரும் அலைக்கழிப்புக்குப் பிறகு ஊரையே காலி செய்யும் குடும்பத்துடன் பயணிக்கும் அக்குதிரை திரும்பிப் பார்க்கையில், “ஆனால், அங்கே அசினாவைப் போல சின்னக் குழந்தைகள் விளையாடிக்கொண்டிருக்கிறார்கள். இன்னும் சிலர் குடியிருக்கிறார்கள்” என்று கதை முடிகிறது. உண்மையில், அந்தச் சிறுமிக்காக வேதனைப்பட்ட நம் மனநிலை, இவ்வரிகளைப் படித்ததும் மீதமுள்ள சிறுமிகளுக்காகக் கவலைப்படத் தொடங்கிவிடுகிறது. நல்ல படைப்பு கடத்தும் உணர்வு இதுவே.

. பழங்குடி மக்களின் நிலத்தைக் கையகப்படுத்துவது, பேத்தியை வன்கொடுமை செய்யும் தாத்தா, வட்டிக்குப் பணம் கொடுக்கும் கிழவி என, நம்மிடையே வாழும் நாம் கவனிக்கத் தவறிய மனிதர்களைப் பற்றி யதார்த்தத்துடன் கதைகளாக்கியுள்ளார் கரீம்.

பெரும் வெளிச்சத்தின் ஓர் ஓரத்தில் இருட்டில் மறைந்துகிடக்கும் மனிதர்கள் பற்றிய கதைகளை மிக நேரடியான மொழிநடையில் எழுதியிருக்கும் இக்கதைகள், சமகாலத்தைப் பற்றிய அழுத்தமான பதிவுகள்!

. ‘சிதார் மரங்களில் இலைகள் பூப்பதில்லை’

சிறுகதைகள்

எழுதியவர்: அ.கரீம்

வெளியீடு:பாரதி புத்தகாலயம்,7 இளங்கோ சாலை, தேனாம்பேட்டை, சென்னை - 18, பக்கங்கள்: 104 , விலை: ரூ.90

படிப்பறை

வி.எஸ்.சரவணன்