Published:Updated:

``சாகித்ய அகாடமியின் தமிழ் விருதாளர்களின் பாராட்டுரை வரிகள் இனி தமிழில்..!'' எழுத்தாளர் மாலன்

மாலன்
மாலன்

பாராட்டுக் குறிப்பை சில மொழிகளுக்கு இந்தியிலும், சில மொழிகளுக்கு ஆங்கிலத்திலும் மேடையில் வாசிப்பார்கள். இதுதான் இத்தனை ஆண்டுகளாக நடந்துவந்தது.

இந்திய அளவில் இலக்கியத்துக்காக வழங்கப்படும் விருதுகளில் முக்கியமானது, சாகித்ய அகாடமி விருது. 1954-ம் ஆண்டிலிருந்து தமிழ், மலையாளம், இந்தி உட்பட 24 மொழிகளுக்கு சாகித்ய அகாடமி விருதுகள் வழங்கப்பட்டுவருகின்றன. ஒவ்வோர் ஆண்டும் விருது பெறுபவருக்கு 1,00,000 ரூபாய் பணமும் பட்டயமும் வழங்கப்படுகின்றன.

சாகித்ய அகாடமி அமைப்பு, இலக்கியம் சார்ந்த நடவடிக்கைகளுக்காகத் தொடங்கப்பட்ட அமைப்பு. தமிழில் கு.அழகிரிசாமி, தி.ஜானகிராமன், ஜெயகாந்தன், வண்ணதாசன், எஸ்.ராமகிருஷ்ணன் உள்ளிட்ட பல எழுத்தாளர்கள் சாகித்ய அகாடமி விருதைப் பெற்றிருக்கிறார்கள். 2019 -ம் ஆண்டுக்கான சாகித்ய அகாடமி விருதை `சூல்' நாவலுக்காக சோ.தர்மன் பெற்றார்.

எழுத்தாளரும், கடந்த ஆண்டு சாகித்ய அகாடமி பொதுக்குழுவில் இடம் பெற்றிருந்தவருமான மாலன், தனது முகநூல் பக்கத்தில் சாகித்ய அகாடமி பற்றியைப் பதிவில், ``சாகித்ய அகாடமி விருது பெறுவோருக்கான பாராட்டுரை (citation) இதுவரை ஆங்கிலம் மற்றும் இந்தியில் வழங்கப்பட்டுவந்தது. நான், பரிசு பெறுபவரின் மொழியிலும் அது அமைய வேண்டும் என்று பொதுக்குழுவில் குரல் எழுப்பி வலியுறுத்தினேன். நீண்ட, காரசாரமான விவாதத்திற்குப் பின் என் கோரிக்கை ஏற்கப்பட்டது. அடுத்த ஆண்டிலிருந்து நடைமுறைக்கு வரும். 67 ஆண்டுகால வழக்கம் மாறுகிறது!" என்று குறிப்பிட்டிருந்தார்.

மாலன்
மாலன்

இதுகுறித்து எழுத்தாளர் மாலனிடம் பேசினோம். ``சாகித்ய அகாடமி விருது தொடங்கி 66 ஆண்டுகள் ஆகிறது. விருது வழங்கப்படும்போது ஒரு பாராட்டுரை வாசிப்பார்கள். அந்தப் பாராட்டுரை, ஆங்கிலம் மற்றும் இந்தி மொழியில் வாசிக்கப்படும். அது, விருது பெறுபவரைப் பற்றிய ஒரு குறிப்பு. பிறகு, அதை அச்சிட்டு விருது பெறுபவர்களுக்கும் வழங்குவார்கள். அதுவும் ஆங்கிலம் மற்றும் இந்தி மொழியில்தான் இருக்கும். பாராட்டுக்குறிப்பை சில மொழிகளுக்கு இந்தியிலும், சில மொழிகளுக்கு ஆங்கிலத்திலும் மேடையில் வாசிப்பார்கள். இதுதான் இத்தனை ஆண்டுகளாக நடந்துவருகிறது. நான் பொதுக்குழுவில் வைத்த கோரிக்கை, அந்தக் குறிப்புரையை விருது பெறுபவரின் மொழியிலும் பதிப்பிக்க வேண்டும் என்பது. இதை நான் கூறியவுடன் அதற்கு சில ஆட்சேபனைகள் வந்தன. மேடையில் சாகித்ய அகாடமி அமைப்பின் தலைவர் விருது வழங்குவார். துணைத் தலைவர் சால்வைபோர்த்தி மரியாதை செய்வார். `செகரட்ரியால் எல்லா மொழிகளையும் வாசிக்க முடியாது. ஆங்கிலம் மற்றும் இந்தியில்தான் வாசிக்க முடியும்' என்றனர். `வாசிக்க இயலாவிட்டாலும் பரவாயில்லை. அச்சடித்து தரப்படும் இதழில் ஒரு பக்கம் விருது பெறுபவரின் மொழியில் அவரைப் பற்றிய குறிப்பு இடம்பெறலாம்' என்றேன்.

அதற்கு சிலர், ``ஆங்கிலம் மற்றும் இந்திதானே நம் அரசினுடைய அலுவல் மொழிகள். எனவே, அந்த இரண்டு மொழிகள் மட்டும் இடம்பெற்றால் மட்டும் போதுமானது; வேறு மொழிகள் இடம்பெற வேண்டிய அவசியமில்லை" என்றனர். நாம் அரசு நிறுவனமல்ல. அரசிடமிருந்து நிதி உதவி பெறுகிறோமே தவிர, சாகித்ய அகாடமி ஒரு தன்னிச்சையான நிறுவனம். நாம் இந்தியாவிலிருக்கக்கூடிய 24 மொழிகளுக்கு விருது கொடுக்கிறோம். அந்த 24 மொழிகளையும் தேசிய மொழியாகத்தான் நாம் பார்க்க வேண்டும். அதன் பிறகு, மேடையில் அந்தந்த மொழி சார்ந்த ஒருவர் மேடையேறி, அதை வாசிக்கலாம் என விவாதிக்கப்பட்டது. பின்னர், அது காலதாமதம் ஏற்படுத்தும் என முடிவுசெய்து, விருதாளருக்கு வழங்கப்படும் இதழில் மட்டும் அவரது மொழியில் குறிப்பைச் சேர்க்கலாம் என முடிவுசெய்யப்பட்டது. இத்தனை வருடம் இதை ஒரு நடைமுறைச் சிக்கல் எனக்கூறிவந்தார்கள். இப்போது அது முடிவுக்கு வந்துள்ளது. காஷ்மீரிகள், மராத்திக்காரர்கள் உள்ளிட்ட வேற்றுமொழிக்காரரர்கள் இதை வெகுவாகப் பாராட்டினர். மத்திய அரசு வழங்கும் விருதுகள் இந்தியில் மட்டும்தான் இருக்கும். பத்ம விருதுகள்கூட இந்தியில்தான் தரப்படுகிறது. வரும்காலங்களில் அவையும் பேசி, மாற்றம் ஏற்படலாம். அப்படி ஏற்பட்டால், அது வரவேற்கக்கூடிய ஒன்று" என்றார்.

சாகித்ய அகாடமி
சாகித்ய அகாடமி
"பெண்களுக்கும் தலித்களுக்கும் இந்த விருதை சமர்ப்பிக்கிறேன்!"  சாகித்ய அகாடமி விருதாளர் சூசன் டேனியல்

இதற்கு முன், மொழிபெயர்ப்பாளர் குளச்சல் முகமது யூசுப் உட்பட இந்த மொழிமாற்றம் குறித்து சாகித்ய அகாடமியில் பேசியுள்ளதாககத் தகவல்கள் முகநூலில் தெரிவிக்கப்பட்டிருந்தன. இதுகுறித்து மாலனிடம் கேட்டோம். ``அதைப் பற்றி எனக்குத் தெரியவில்லை. ஆனால், அதைப் பற்றி முகநூலில் கருத்து தெரிவித்துள்ளனர் பலர். இதற்கு முன் சிலர் முயற்சி செய்திருக்கலாம். விருதுபெற்ற ஒருவர் தனது ஊருக்கு செல்கையில், தான் சிறந்த மொழியில் பிறருக்கு வாசிக்கக் காண்பிக்கலாம். அடுத்த ஆண்டிலிருந்து இது நடைமுறைக்கு வரலாம்" என்றார்.

அடுத்த கட்டுரைக்கு