செவாலியர் சிங்கம்!

நடிப்புலகில் ஈஃபல் டவர் போல உயர்ந்து நிற்கும் சிவாஜி கணேசனுக்கு பிரான்ஸ் நாடு செவாலியர் விருது தந்து கௌரவித்தது சுவையான பொருத்தம்.

இன்று நடிகர்களாக இருப்பவர்கள் புதிய வித்தியாசமான உத்திகளைக் கற்பதற்கு வீடியோ போன்ற விஞ்ஞான வசதிகள் எத்தனையோ இருக்கின்றன. நாற்பது ஆண்டுகளுக்கு முன்பு, சிவாஜி நடிப்புலகில் காலடி வைத்தபோது டி.வி.கூடக் கிடையாது. எப்போதாவது சில ஆங்கிலப் படங்கள் சென்னையில் ஓரிரு தியேட்டர்களில் வந்தால் உண்டு!

அப்படிப்பட்ட காலகட்டத்தில் 'சுயம்பு' போல கிளம்பி விசுவரூபமெடுத்து, வியப்பையும் பிரமிப்பையும் ஏற்படுத்தும் அளவுக்கு நடிப்பில் மறுமலர்ச்சியை ஏற்படுத்திக் காட்டிய மாபெரும் சக்தி சிவாஜி!

திரையுலகில் சிங்கம்போல கம்பீரமாகப் பவனிவந்த சிவாஜியின் நடிப்பை ஒப்பிட இன்னொரு நடிகரைத் தேடிப்பிடிப்பது இயலாது. உதாரணமாக, அவரால் சோகக் காட்சி ஒன்றில், தான் அழுது மற்ற வர்களின் பரிதாபத்தையும் பெற முடியும்; தான் அழாமலேயே மற்ற வர்களை அழவைக்கவும் முடியும்!

உண்மையில், தமிழர்கள் தங்களுடைய ரசிப்புத் திறனைத் தீட்டிக் கூர்மைப்படுத்திக் கொள்ளக்கூடிய அற்புதமான ஒரு நடிப்புப்பட்டறை யாக நமக்கு வந்து வாய்த்தவர் சிவாஜி.

தமிழின் பெருமையை நிலைநாட்ட தமிழன்னை கவிச்சக்ரவர்த்தி கம்பனைக் கொடுத்ததாகச் சொல்வதுண்டு.

அது இந்த நடிப்புச் சக்ரவர்த்திக்கும் பொருந்தும்!

- 30.4.95 இதழ் தலையங்கம்

அந்த ஆயிரம் ரூபாய்!

எட்டு ஆண்டுகளுக்கு முன்பு அட்டைப்படத்தில் வெளியான நகைச்சுவைக்காக, விளக்கம் அளிக் கக்கூட வாய்ப்பு தரப்படாமல், விகடன் ஆசிரியருக்கு மூன்று மாதம் கடுங்காவல் தண்டனை விதித்தது தமிழக சட்டசபை.

குமரி முதல் இமயம் வரை எழுந்த எழுச்சியால், மூன்றே நாளில் ஆசிரியர் விடுதலை ஆனா லும், இழைக்கப்பட்ட அநீதியைச் சுட்டிக்காட்டி அவர் வழக்குத் தொடர்ந்தார். உயர்நீதிமன்றமும் 'நடந்தவை அனைத்தும் தவறு! அடையாள நஷ்ட ஈடாகத் தமிழக சட்டசபை ஆயிரம் ரூபாய் தர வேண்டும்' என்று தீர்ப்பளித்தது.

தமிழக அரசும் இப்போது ஓசை இன்றி ஆயிரம் ரூபாய் நஷ்டஈடு வழங்கியிருக்கிறது.

ஒரு தனி நபருக்கு மாநில சட்ட சபை இப்படி நஷ்டஈடு வழங்குவது முன் எப்போதும் நடந்திராத வரலாற்று முக்கியத்துவம் பெற்ற நிகழ்ச்சியாகும்.

'எட்டு ஆண்டு ஆகிவிட்டதே... நம் ஆட்சியில் நடந்த விஷயமில் லையே... கதையை முடிப்போம்' என்ற ஒருவித அலட்சிய எண்ணத்தோடு இந்த அரசு நஷ்டஈட்டை வழங்கியிருக்காது என்று நம்பு வோம்!

'எதிர்காலத்தில் சபா மண்டபத்தில் ஜனநாயகத்தின் குரல் ஒலிக்கும், பத்திரிகையாளர்களின் குரல்வளை நசுக்கப்படாமல் இருக்கும், சகிப்பு உணர்ச்சி வளர்க்கப்படும், யார் மீதும் விதிமுறைகளுக்குக் கட்டுப் படாமல் சகட்டுமேனிக்கு அதிகார துஷ்பிரயோகம் செய்யப்படமாட் டாது' என்று இனியாவது ஓர் உறுதியான கொள்கை எடுத்து அரசு செயல்பட வேண்டும்.

அப்போதுதான் இந்த நஷ்டஈடு மனமுவந்து செலுத்தியதாக ஆகும்!

- 26.2.95 இதழ் தலையங்கம்

முன்னாள் பாரதப் பிரதமர் மொரார்ஜி தேசாய் மறைந்தார்.

மொரார்ஜியின் மன உறுதி!

"மொரார்ஜி பிரதமராக இருந்த போது நடந்த சம்பவம் இது... அவரும், அவரது மகன் காந்திலால் தேசாயும் அஸ்ஸாம் பகுதியில் ராணுவ விமானம் ஒன்றில் பயணம் செய்துகொண்டிருந்தார்கள். அப்போது விமானம் பழுதாகிக் கீழே விழுந்துவிட்டது. விமானத்தின் மூக்குப் பகுதி தரையில் மோதியதில் முன்பக்கம் இருந்த விமானிகள் பலியாகிவிட்டனர். உள்ளே இருந்த மொரார்ஜியின் மகனான காந்திலால் தேசாய்க்குப் பலமான அடி. எலும்பு முறிவு. கீழே விழுந்து உடைந்த விமானத்திலிருந்து மொரார்ஜி மட்டும் தப்பி வெளியே வந்தார். சிறுது தூரம் நடந்து சென்று, எதிர்ப் பட்ட கிராமவாசிகளிடம் விபத்தைப் பற்றிச் சொல்லி, டாக்டரையும் அதிகாரிகளையும் விபத்து நடந்த இடத்துக்கு வரச் செய்தார். பிறகு அதிகாரிகள், மருத்துவர்கள் வந்து காந்திலாலுக்குச் சிகிச்சை செய்து, இறந்தவர்களின் சடலங்களை மீட்டு... நிவாரணப் பணியில் ஈடுபட்டார்கள்.

இந்தச் சம்பவம் நடந்த ஒரு வாரத்துக்குப் பிறகு, நான் காந்திலால் தேசாயைப் பார்த்துவிட்டு மொரார்ஜியையும் சந்தித்தேன். அப்போதுதான் அவர் அந்த திடுக்கிடும் உண்மையைச் சொன்னார். விபத்து நடந்த பிறகு மொரார்ஜிக்கும் லேசாக நெஞ்சில் வலி இருந்ததாம். அன்று இரவு எச்சில் உமிழ்ந்தபோது ரத்தம் வந்ததாம். ஆனால், அதைப் பற்றி யாரிடமும் சொல்லாமலேயே வலி யைத் தாங்கிக்கொண்டு இருந்திருக் கிறார் என்று அறிந்தபோது நெகிழ்ந்து போனேன். அது அவருக்கே உரிய மன உறுதி!"

- இரா.செழியன்

'பிள்ளையார் பால் குடிக்கிறார்' என்கிற வதந்தி காட்டுத்தீயாகப் பரவி, இந்தியா முழுக்கப் பரவியது!

பால் குடிக்கிறார் பிள்ளையார்!

சென்ற வருடம் பிளேக் பீதி பரவ, எலியார் சிக்கிக்கொண்டார்; இப்போது அவரது எஜமான் பிள்ளையாரே சர்ச்சையில்!

சென்னை நகரில் முதலில் பதற்றம் துவங்கியது, தங்கசாலையில் உள்ள ஏகாம்பரேஸ்வரர் கோயிலில் தான்! போலீஸை வைத்துக் கூட் டத்தைக் கன்ட்ரோல் செய்யும் அள வுக்குப் போய்விட்டது நிலைமை. பஞ்சநாக விநாயகர் மற்றும் பஞ்ச முக விநாயகர்கள்தான் நிறையப் பால் குடித்திருந்தார்கள். கோயில் தரையெங்கும் பால், பால்... மேலும் பால்!

ஒரே நேரத்தில் எல்லோருமே பாலும் ஸ்பூனுமாக அலைந்தால்..? தட்டுப்பாடுதான்! பால் என்று சொல்லப்பட்ட அந்தத் திரவம், லிட்டர் 100 ரூபாய் வரை விலை போனது. அன்றைய தினம் சென்னை நகரின் பெரும்பாலான டீக்கடைகளில் டீ இல்லை என்ற போர்டு தொங்கவிடப்பட்டது.

பல இடங்களில் திடீரென முளைத்த ஆன்மிகவாதிகள், கோயில் முன்னால் திரண்டிருந்த கூட்டத்தை கர்ம சிரத்தையோடு கட்டுப்படுத்திக் கொண்டிருப்பதைப் பார்த்துப் புல்லரித்துப் போய் விசாரித்தால், அவர்கள் பிள்ளையாருக்குப் பால் கொடுக்கத் தலைக்கு ஐந்து, பத்து என்று 25 ரூபாய் வரை வசூலித்த கதைகளைச் சொன்னார்கள் பலர்.

கோயில் வாசல்களில் ஏகமாகக் கூடியிருந்த கூட்டத்தினரிடையே புகுந்து பிக்பாக்கெட் அடித்த பல சம்பவங்கள் சென்னை நகர் முழுவதும் நடந்திருக்கின்றன.

"பௌதிக அறிவியல்படி இது பரப்பு இழுவிசை என்ற தத்துவத்தில் நடந்ததுதான்! பால், தண்ணீரைவிட அடர்த்தி குறைந்த திரவம் என்பதால், பிள்ளையார் சிலையின் மேல் மெலிதாகப் படலமாக படர்ந்து வழிந்துவிடும். பிறகு, அந்தப் பட லத்தின் வழியாகச் செல்லும் பாலை நாம் சாதாரண கண்களால் பார்க்க முடியாது. அந்த நிகழ்ச்சியைத்தான் பிள்ளையார் பால் குடிப்பதாக எல்லோரும் சொல்லியிருக்கிறார்கள்" என்றனர் பௌதிகப் பேராசிரியர்கள்.

சென்ற ஆண்டு விகடன் அறிவித்த மெகா பரிசுத் திட்டத்தின் ஓர் அங்கம், 'மாணவ எடிட்டர்கள்' போட்டி. இதில் தமிழகத்திலிருந்து கலந்துகொண்ட ஏராளமான மாணவ இதழ்களிலிருந்து சென்னை- ஸ்டெல்லா மாரிஸ் பெண்கள் கல்லூரி, கோவை- பி.எஸ்.ஜி. கலை அறிவியல் கல் லூரி, சென்னை- லயோலா கல்லூரி... என எட்டு கல்லூரி இதழ்களை மட்டும் முதல் கட்டப் பரிசீலனையில் தேர்ந்தெடுத்தது விகடன். பின்னர், அந்தந்தக் கல்லூரிகளின் மாணவர் குழுவினர், விகடன் அலுவலகத்துக்கே வந்திருந்து இதழ் தயாரிப்பில் ஈடுபட்டார்கள்.

அவர்கள் தயாரித்த புத்தகங்கள் உருவம், அந்திமழை, அக்னி குஞ்சு, சிறகு எனத் தனித்தனித் தலைப்புகளில், ஆனந்த விகடனோடு இலவச இணைப்பாக எட்டு வாரங்களுக்கு வழங்கப்பட்டன. அவற்றில், பெரும்பாலான விகடன் வாசகர்களால் மிகச் சிறப்பான இதழ்களாகத் தேர்ந்தெடுக்கப்பட்டு தலா ரூ.25,000 பரிசு பெற்றவை, சென்னை- அரசினர் சித்த மருத்துவக் கல்லூரி மாணவிகள் தயாரித்த 'ஊர்வசி', மதுரை- தியாகராசர் கல்லூரி மாணவர்கள் தயாரித்த 'சிம்புட் பறவை' ஆகிய இரண்டு இதழ்கள். இதில், 'சிம்புட் பறவை' இதழ் தயாரிப்பில் ஈடுபட்ட மாணவர் குழுத் தலைவர் வெ.செந்தில்குமார், விகடன் ஆசிரியர் குழுவில் இணைந்து சில காலம் பணியாற்றினார். 'இம்சை அரசன் 23-ம் புலிகேசி' தொடங்கி, இதுவரை மூன்று திரைப்படங்களை இயக்கி யுள்ள 'சிம்புதேவன்'தான் அவர். 'சிம்புட் பறவை' என அவர் தயாரித்த புத்தகத்தின் தலைப்பிலிருந்து பிறந்ததே அவரின் புனைபெயர் என்பது குறிப்பிடத்தக்கது.

புதுக்கோட்டை- மாமன்னர் கல்லூரி மாணவர்கள் தயாரிப்பான 'அக்னிகுஞ்சு' இதழில் வெளியான ஒரு கற்பனை நகைச்சுவைக் கட்டுரையிலிருந்து ஒரு துளி இங்கே...

ரோபாட்... 625 கோடியில் ஒரு ஹோலிவுட் படம்!

அன்று கோடம்பாக்கத்தின் 'பிளைவுட் ஸ்டூடியோவில்' 625 கோடி ரூபாய் செலவில் ஒரு புதுப் பட பூஜை. 'ஆஸ்கார் அவார்டுக்காக' என்ற வாசகத்துடன் அன்றைய பத் திரிகைகளில் விளம்பரம் வந்திருந்தது. இதைக் கண்ட நம் 'கொட்டாவி' தன் சகாக்களுடன் பேட்டிக்காக ஸ்டூடி யோவுக்குள் நுழைய, நாமும் உள்ளே நுழைவோம் வாருங்கள்!

(அந்த ஃப்ளோரில், அரங்கமே அதிசயமாய், ஏதேதோ அறிவியல் ஆய்வுக்கூடம்போல் காட்சியளித்தது. ஆங்காங்கே ரோபாட்டுகள் நின்றுகொண்டும் உட்கார்ந்து கொண்டும் இருந்தன.

இயக்குநர் இம்சைராஜ், ஆர்ட் டைரக்டர் ஸீன் செட்டிங் சிங்காரம், ஒளிப்பதிவாளர் ஃபிளாஷ் லைட் பிச்சாண்டி ஆகியோர் இருக்க, கொட்டாவியும் பெருச்சாளியும் உள்ளே நுழைகின்றனர்.)

தலையில் தொப்பி மேல் தொப்பி வைத்துக்கொண்டு இருந்த ஆர்ட் டைரக்டரை நெருங்கி...

கொட்டாவி: சார், இந்தப் படத்துலே உங்க ஒர்க் பத்தி கொஞ்சம் சொல்லுங்களேன்..!

ஆர்ட் டைரக்டர்: இது முழுக்க முழுக்க விஞ்ஞானப் படம்ங்கிறதால ரோபாட்டுகள்தான் நடிக்குது. அதுக் காக நான் 150 ரோபாட்டுகளைச் செஞ்சேன். ஒரு ரோபாட் செய்ய லட்ச ரூபா ஆச்சு. ஏன்னா... அது நடக்கும், ஓடும், குதிக்கும், ஆடும், பாடும். இப்படி எல்லா வேலையும் தானே இழுத்துப் போட்டுக்கிட்டுச் செய்யும்.

பெருச்சாளி: சார்! நம்ம படத்துலே கதாநாயகன்- கதாநாயகி ரோபாட்டுகள் ரெண்டும் ரொம்ப அழகா இருக்குமே! நாங்க பார்க்க லாமா சார்?

ஆர்ட்: ஸாரி ஜென்டில்மென், அந்த ரெண்டு ரோபாட்டும் இன்னும் செஞ்சு முடிக்கலே. கொஞ்சம் டிங்கர் ஒர்க் பாக்கி. ஒர்க் ஷாப்ல இருக்கு.

கொட்டாவி: வணக்கம் டைரக்டர் சார்! படத்துல பிரமாண்ட காட்சிகள் ஏதாவது உண்டா?

டைரக்டர்: ஓ... நிறைய இருக்கே! 20 ஆண் ரோபாட்டுகள், 20 பெண் ரோபாட்டுகளுடன் ஹீரோ, ஹீரோ யின் ரோபாட்டுகளும் சேர்ந்து ஆட ணும்... அதானே 'டூயட் சாங்'கில் வழக்கம்? அதையே நாங்க கொஞ்சம் வித்தியாசமா, முழுக்க முழுக்க 'பூமி லைட்'டுல படம் பண்ணப் போறோம். இது ரொம்பப் புது மையா, அற்புதமா வரப்போகுது பாருங்க!

கொட்டாவி: சன்லைட், மூன்லைட், ஃபிளாஷ்லைட், ஸ்பாட்லைட்டுன்னெலாம் கேள்விப்பட்டிருக்கேன். அது என்ன சார் 'பூமி லைட்'..?!

ஒளிப்பதிவாளர்: அதாவது சார்... பூமியில நிலா வெளிச்சம் தெரிஞ்சா அது 'நிலா வெளிச்சம்'. அதே மாதிரி நிலாவுல இருந்து பார்த்தா தெரியற வெளிச்சம் 'பூமி வெளிச்சம்'. அங்கே போய் எடுக்கறதுதான் இந்த 'பூமிலைட் சாங்'. ஆமாம்... இந்த டூயட் காட்சியை எடுக்க நாங்கள் நிலாவுக்கே அவுட்டோர் ஷூட்டிங் போறோம். மக்கள் எல் லாம் பரபரப்பா பேசப்போறாங்க பாருங்க!

கொட்டாவி: அது சரி... நிலாவுக்கு எப்படிப் போகப் போறீங்க? எல்லாமே சிங்காரம் சாரோட செட்டிங் கெட்டப்பா?

டைரக்டர்: அட, என்ன சார் நீங்க! இவ்வளவு செலவு பண்ணிப் படம் எடுக்கிறோம்... இதுக்காகக்கூட நாங்க நிலவுக்குப் போகாட்டி, எப் படி சார் ரியலிஸமா படம் வரும்? அதனால, நெஜமாலுமே நிலாவுக் குதான் போறோம்.

கொட்டாவி: ரொம்ப அதிசயமா இருக்கு சார்! இந்த யோசனைக்காகவே உங்க பேரை கின்னஸ் புக்குல போடலாம், சார்!

பெருச்சாளி: அது சரி, எப்ப எல்லாரையும் மேல அனுப்பப் போறீங்க?

டைரக்டர் (சிரித்தபடி): சீக்கிரத்துலயே!

- மேகலைவாணன்

எஸ்.எஸ்.வாசன் அவர்களின் மனைவி திருமதி பட்டம்மாள் அமரர் ஆனார். அப்போது விகடனில் வெளியான தலையங்கத்திலிருந்து ஒரு பகுதி...

ஒளி வீசிய தாய்...

ஆனந்த விகடன் நிறுவனத்துக்குப் பலம் தரும் ஆத்ம சக்தியாகவும், விகடன் ஆசிரியருக்கு மட்டுமின்றி இந்த நிறுவனத்தில் பணிபுரியும் அனைவருக்குமே தாயாகவும் விளங்கிய திருமதி பட்டம்மாள் வாசன் அவர்கள் மறைந்துவிட்டார்.

திருமதி பட்டம்மாள் வாசன் அவர்களின் வாழ்க்கை, இந்தியப் பெண்குலத்தின் பெருமைக்குச் சான்றாக ஒளிவீசும். கணவர் எஸ்.எஸ்.வாசன் அவர்களின் ஒவ்வொரு முயற்சிக்கும் கைகொடுத்தவர். தம் கணவர் சிந்தித்து எடுக்கும் முடிவுகள் வெற்றியைத்தான் தேடித்தரும் என்று உற்சாகமூட்டி, நம்பிக்கையும் உறுதியும் தரும் நல்வார்த்தைகளையே கனிவோடு சொல்லி வந்தார்.

ஒவ்வொரு வெற்றி மனிதரின் பின்னால் ஒரு பெண்மணி இருப்பார் என்பார்கள். ஆசிரியர் வாசன் அவர்களுக்குத் தம்மை அர்ப்பணித் துக் கொண்ட திருமதி பட்டம்மாள், இந்த வார்த்தைகளுக்கு முழு எடுத் துக்காட்டு!

எளிமையின் பிறப்பிடமாகவும், எதற்கும் அஞ்சாத உறுதியான நெஞ்சம் படைத்தவராகவும் இருந் தார் திருமதி பட்டம்மாள். தமிழகத்து ஆட்சியாளர்கள் ஒரு முறை விகடன் ஆசிரியர் என்ற முறையில் தம் மகனைச் சிறையில் பூட்டியபோது, இவர் சற்றும் பதறவில்லை. அமைதி காத்தார். 'ஆட்சியாளர்களுக்கு ஏதோ ஆகிவிட்டது' என்று இவர் சிரித்தவாறு சொன்னதைக் கேட்டு, ஆறுதல் சொல்ல வந்தவர்களே வியந்தனர்.

தம் கடமையைப் பரிபூரணமாகச் செய்து முடித்த திருப்தியுடன், திருமதி பட்டம்மாள் வாசன் உயிர், தமது கணவரைத் தேடிச் சென்றுவிட்டது.

தலைவணங்கி அஞ்சலி செலுத்துகிறோம்!