"கண்ணதாசனைப் பாடச் சொல்லாதே!"

மாடர்ன் தியேட்டர்ஸ் கதை இலாகாவில் கண்ணதாசன் பணியாற்றி வந்த சமயம். அப்போது மாடர்ன் தியேட்டர்ஸ் மானேஜராக எம்.ஏ. வேணு இருந்து வந்தார். படப்பிடிப்பு நிலையத்தில் வேலை சுறுசுறுப்பாக நடந்து கொண்டிருந்தது. கண்ணதாசன் ஒரு பக்கமாக அமர்ந்து ஏதோ பாடல் ஒன்றைப் பாடிக் கொண்டிருந்தார்.

அப்போது அந்தப் பக்கமாக வந்த டி.ஆர். சுந்தரம் மானேஜர் வேணுவை அழைத்து, ''வேணு, அதோ அவரை (கண்ணதாசன்) பாட்டு எழுதுவதோடு நிறுத்திக் கொள்ளச் சொல். பாடச் சொல்லாதே!'' என்று சொல்லிவிட்டுப் போய்விட்டார்.

அன்றிலிருந்து பாட்டுப் பாடுவதை விட்டுவிட்டார் கண்ணதாசன்.

தகவல்:
மன்னார்குடி விசுவநாதன்
(5-6-66)

''கள் குடித்தால் மட்டும்தான் மயக்கம் வரும் என்று நாம் நினைத்துக் கொண்டிருக்கிறோம். அது தவறு. கள் என்று பேசினாலே மயக்கம் வரும். எப்படி? ''நீங்கள் வாருங்கள்'' என்று உங்கள் விருந்தினரை மரியாதையுடன் அழைத்துப் பாருங்கள். அவர் அந்த மரியாதையில் மயக்கம் கொண்டு உங்களுக்கு வேண்டியதைச் செய்வார். உங்கள் காரியமும் கைகூடும். ஆகவே, அந்தக் கள் நமக்கு வேண்டாம். இந்தக் 'கள்'ளைப் பிடித்துக் கொள்ளுங்கள்.''

-கிருபானந்த வாரியார்.
(3-9-78)

''நான் வெளிநாடுகளுக்குக் கச்சேரி செய்யப் போகும்போதெல்லாம் அங்குள்ள என் ரசிகர்கள் என்னை அங்கேயே தங்கிவிடச் சொல்லி வற்புறுத்துகிறார்கள். எனக்குத் தேவையான எல்லா வசதிகளையும் செய்து தருவதாக வாக்குறுதி அளிக்கிறார்கள். அவர்களுக்கெல்லாம் நான் அளிக்கும் ஒரே பதில்- 'நான் தங்குவதற்கு பெனாரஸ் நகரத்தை உருவாக்க வேண்டும். குளிப்பதற்கு கங்கை நதி தேவை. தினம் சாப்பிடுவதற்கு ஜிலேபியும் சூடான பூரியும் வேண்டும். இதற்கெல்லாம் ஏற்பாடு செய்து தரமுடியுமா?'''

-'ஷெனாய்' மேதை பிஸ்மில்லாகான்
(10-10-76)

இந்த சிறுமிக்கு நாட்டியம் என்றால் உயிர்.

ஒரு நாள் இச் சிறுமியின் அம்மா, பெரியம்மா, அக்கா எல்லோருமாகச் சேர்ந்து இவளுக்குத் தெரியாமல் சினிமாவுக்குப் போய் விட்டார்கள். பாட்டியோடு தூங்கிக் கொண்டிருந்தவள், எப்படியோ தன்னை ஏமாற்றிவிட்டு மற்றவர்கள் சினிமாவிற்குப் போனதை ஊகித்து விட்டாள். மெதுவாகப் பாட்டிக்குத் தெரியாமல் சினிமாத் தியேட்டருக்கு ஓடினாள். ஒவ்வொரு தியேட்டராகப் போய் ''எங்க அம்மா, பெரியம்மா, எல்லோரும் இங்கே வந்திருக்காங்களா?'' என்று பரிதாபமாக வினவினாள். சரியான பதிலே கிடைக்கவில்லை.

இரவு ஒன்பது அல்லது பத்து மணி இருக்கும். வீட்டிற்குத் திரும்பி வர வழி தெரியவில்லை. கால் வலி, தண்ணீர் தாகம் வேறு. தெருக் குழாயில் தண்ணீர் குடித்துவிட்டு, மெல்ல நடந்தாள்.

வீட்டிலோ ஒரே குழப்பம்! சினிமாவிலிருந்து திரும்பி வந்தவர்கள் குழந்தையைக் காணாமல் துடிதுடித்துப் போய் போலீசுக்கும் தெரிவித்துவிட்டனர். காலைப் பத்திரிகையில் 'குழந்தை காணவில்லை' என்று விளம்பரம் கொடுக்க ஏற்பாடாகிக் கொண்டிருந்தது!

தெருவில் அழுதுகொண்டிருந்த சிறுமியை மளிகைக் கடைக்காரர் ஒருவர் அடையாளம் கண்டு, பத்திரமாக வீட்டில் கொண்டு போய்ச் சேர்த்தார்.

அந்தச் சிறுமிதான் தற்போது சினிமா வானில் நட்சத்திரத் திலகமாக விளங்கும் சாவித்திரி.

(10-4-66)

'Y' என்கிற எழுத்தைக் கண்டுபிடித்தது யார் தெரியுமா? பிரசித்தி பெற்ற ட்ரோஜன் யுத்தத்தில் ஈடுபட்டிருந்த வீரன் பாலமேடஸ் என்பவன்தான். பாசறையில் ஒரு நாள் உட்கார்ந்து ஆகாயத்தைப் பார்த்துக் கொண்டிருந்தபோது கொக்குக் கூட்டம் ஒன்று 'Y' வடிவத்தில் பறப்பதை அவன் பார்த்தான். அதை அப்படியே ஓர் எழுத்தாக 'காப்பி' செய்து ஆங்கில அரிச்சுவடிக்கு வழங்கி விட்டான்.

(26-11-72)